Kapihttal 10. Oahppoduođaštusaid hálddašeapmi

Ulbmil

Dokumeanta galgá sihkkarastit ahte Sámi allaskuvlla oahppoduođaštusaid hálddašeamis lea alla kvalitehta.

Doaibmaguovlu

Dát dokumeanta gusto ollislaččat vuolit ja bajit dási grádaid oahppoduođaštusaid hálddašeapmái, ja maiddái kvalifikašuvnnaide mat vrd. rápmaplána galget addit oahppoduođaštusa. Dokumeanta čilge buot oktasašvuođaid mat leat oassin dán barggus. Oahppohálddahus ja fágagoađit sáhttet hábmet prosedyraid Sámi allaskuvllaskuvlla oppalaš kvalitehtasihkkarastinvuogádaga ja gustovaš njuolggadusaid siskkobealde. Doavttergráda oahppoduođaštusat leat čilgejuvvon sierra.

Lágat ja njuolggadusat

Oahppoduođaštusaid hálddašeapmi Sámi allaskuvllas lea regulerejuvvon čuovvovaš lágaid ja mearrádusaid bokte: 

Oahppoduođaštusaid hálddašeami ovddasvástádusjuohku

Oahppohálddahus ovddasvástida:

  • Ođasmahttit progrešuvdnašiehtadusaid FS;as.
  • Dárkkistit sisabeassama ja oahppoduođaštusa vuođu ovdal oahppoduođaštusa juolludeami
  • Gárvet oahppoduođaštusaid
  • Arkiveret ja vurkkodit oahppoduođaštusaid ja dasa relevánta duođaštusaid ja dieđuid
  • Hábmet oahppoduođaštusaid ja Diploma Supplementaid ja diŋgot dáidda teavsttaid fágagođiin
  • Áššemeannudit oahpuin beassama, oahpuid sisaheiveheami ja dohkkeheami ohcamiid
  • Áššemeannudit ja mearridit friddja bachelora ohcamiid
  • Implementeret oahppoduođaštusa ja Diploma Supplementa málle FS:ii
  • Diŋgot oahppoduođaštusaide báhpiriid ja eará dárbbašlaš neavvuid
  • Olahuvvon grádaid raporteret DBH:ii.

Fágagoađit ovddasvástidit:

  • Hábmet teavsttaid oahpuid birra oahppoduođaštusaide ja Diploma Supplementtaide.

Rektor ovddasvástida:

  • Vuolláičállit buot oahppoduođaštusaid ovttas oahppohoavddain.

Oahppoduođaštusat oppalaččat

Oahppoduođaštus lea árvobábir mii duođašta:

  • Makkár gráda kandidáhtta lea olahan
  • Čađahuvvon eksámeniid ja oahppoprográmma, dákko bokte gelbbolašvuođa.

Oahppoduođaštus galgá oanehaččat čilget makkár gelbbolašvuođa kandidáhtta olaha čađahuvvon oahpuin.

Čađahuvvon oahppu mii addá bachelorgráda Sámi allaskuvlla bachelorgráda láhkaásahusa § 3 mielde, duođaštuvvo oahppoduođaštusain. Kandidáhtta  gii galgá oažžut bachelorgrádaduođaštusa Sámi allaskuvllas, galgá leat čađahan unnimusat 60 oahppočuoggá Sámi allaskuvllas. Bachelorgráda oahppoduođaštus friddja bachelorii čálihuvvo ohcama vuođul. Ohcci galgá ieš duođaštit ahte deavdá gáibádusaid.

Unnimusat 60 oahppočuoggá mat galget vuođđun bachelorgrádii, eai galgga leat oassin ovdal olahuvvon grádas dahje ámmátoahpus. Ođđa oahppoovttodagat galget ovttas ovdal čađahuvvon oahppoovttadagaiguin, dahje lassin dáidda, mielddisbuktit ahte ođđa grádas lea eará fágalaš čiekŋudeapmi/deaddu go ovdal olahuvvon grádas.

Oahppoduođaštusa lassin galgá Transcript of Records ja Diploma Supplement (DS), internašunála oahppoduođaštusa lasáhus, čálihuvvot. Dokumeanttat addet dievasmahtti čilgehusa gelbbolašvuođas maid kandidáhtta lea olahan. Dát eai buhtte oahppoduođaštusa, muhto dievasmahttojit dan. Transcript of Records ja Diploma Supplement leat gustovaččat dušše dalle go leat vuolláičállojuvvon, steampilastojuvvon ja ovttas oahppoduođaštusain.

Áššemeannudeaddji guhte ovddasvástida oahppoduođaštusa vuođu dárkkisteami vuolláičállá oahppoduođaštusa goalmmát siiddu, ja maiddái Transcript of Records ja Diploma Supplement. Rektor ja oahppohoavda vuolláičálliba oahppoduođaštusa ovdasiiddu.

Dehálaš prinsihppa mii galgá vuhtiiváldot oahppoduođaštusa čáliheamis lea ahte galgá čálihuvvot dušše okta oahppoduođaštus juohke olahuvvon grádii. Lea maiddái dehálaš ahte oktasaš praksis čuvvojuvvo juohke gráda hálddašeamis.

Dárkkisteapmi ovdal loahpalaš eksámena

Čuovvovaš dárkkisteamit galget dahkkon buori áiggis ovdal studeantta loahpalaš eksámena:

Sisabeassanvuođđu

Studeanttain geat leat oahpuin main lea báikkálaš sisaváldin, galgá sisabeassanreive/-mearrádus dárkkistuvvot kontrolleren dihte ahte gráda juolluduvvo rievttes vuođu vuođul. Jus lea dahkkon evttolaš sisaváldin, de ferte dárkkistuvvot ahte eaktu/eavttut lea/leat devdon/devdojuvvon. Jus dát eai leat devdojuvvon, de galgá studentii mannat diehtu dán birra ja son ferte dasto deavdit eavttu ovdal sáhttá dieđihuvvot loahpalaš eksámenii..

Progrešuvdnašiehtadus ja gáibádusat olahuvvon grádii

Go loahpalaš eksámen lea cevzojuvvon, de ferte dárkkistuvvot ahte studeanta olaha doarvái oahppočuoggáid ja deavdá fágagáibádusaid mat leat mearriduvvon guoskevaš oahppoprográmma prográmmaplánas. Dieđuid grádaid gáibádusaid birra gávdno mastergrádaláhkaásahusas, bachelorgrádaláhkaásahusas ja guoskevaš oahppoprográmma prográmmaplánas.

Duođaštusat čađahuvvon olggobealde oahpuin mat galget oassin grádas galgá álo leat gávdnamis. Oahppohálddahus galgá dárkkistit ahte buot olggobealde oahput mat galget oassin grádas leat biddjon person eksternstudium FS:s. Duođaštusat galget leat gávdnamis FS:a dokumeantavuorkkás dahje elektrovnnalaš vuorkká studeantamáhpas.

Vejolaš fágalaš latnjalasvuohta galgá maid dárkkistuvvot. Dát lea earenoamáš dehálaš studeanttain geat leat ožžon sisaheivehuvvot dahje dohkkehuvvot oahpuid maid leat čađahan eará oahppoásahusain. Maiddái muhtun siskkáldas oahppoovttadagain Sámi allaskuvllas lea fágalaš latnjalasvuohta.

Dárkkisteapmi ovdal oahppoduođaštusa čáliheami

Giella

Oahppoduođaštusat čálihuvvojit dábálaččat dušše sámegillii. Jus kandidáhtta dáhttu ahte oahppoduođaštus galgá čálihuvvot eará gillii, de galgá čálalaččat addit dieđu dán birra ovdal go duođaštus lea čálihuvvon.

Oahppoduođaštusa sisdoallu

Oahppohálddahus galgá dárkkistit ahte oahppoduođaštusa sisdoallu ja prográmmaplána sisdoallu/gráda gáibádusat oktiivástidit. Standárdateaksta oahppoduođaštusa nuppi siiddus galgá oanehaččat čilget makkár gelbbolašvuođa kandidáhtta lea olahan čađahuvvon oahpuin.

Liige oahppoovttadagat/fágat

Jus kandidáhtas leat eambbo oahppočuoggát go gráda unnimusgáibádus, de galgá guoskevaš kandidáhtta čálalaččat dieđihit makkár fágat/oahppoovttadagat galget leat mielde oahppoduođaštusas. Jus dát ii leat dieđihuvvon, de berre oahppohálddahus váldit oktavuođa guoskevaš kandidáhtain čielggadan dihte dán. Jus kandidáhtta ii leat olámuttos ja dieđit makkár fágat/oahput galget oassin oahppoduođaštusas, de mearrida oahppohálddahus dán ja kandidáhtas ii leat vejolašvuohta váidit mearrádusa. Liige fágat/oahppoovttadagat duođaštuvvojit árvosátnečállosiin.

Registreren

Oahppohálddahus galgá dárkkistit ahte kandidáhtta lea dieđihuvvon guoskevaš eksámenii dan lohkanbajis go loahpalaš eksámen čađahuvvo. Jus giđđalohkanbajis galgá alit dási gráda gárvet, de galgá loahpalaš eksámen das leat čađahuvvon áigodagas 7.1-12.8. Vástideaddjin čakčalohkanbadjái lea áigodat 13.8-6.1.

Korrektuvra

Oahppohálddahus galgá lohkat korrektuvrra buot dieđuin mat gusket grádaide mat leat biddjon FS:ii.

Dokumeanttat mat galget gávdnamis go oahppoduođaštus čálihuvvo

Studeantadieđut FS:s

Muitalit earret eará makkár fágat/oahppoovttadagat leat oassin grádas, semesterregistrerema birra ja vejolaš ovdal olahuvvon gráda birra.

FS:a árvosátnečálus

Duođašta buot eksámeniid ja oahpuid maid kandidáhtta lea čađahan Sámi allaskuvllas.

Sisabeassanduođaštusat

Earenoamáš fuomášupmi berre biddjot evttolaš sisaváldimiidda.

Reivvet vejolaš beassamiid, ja olggobealde oahpuid sisaheivehemiid ja/dahje dohkkehemiid birra.

Duođaštus buot olggobealde oahpuin mat galget leat oassin grádas.

Sensorprotokolla

Loahpahuvvon mastergrádas galgá sensorprotokolla gávdnamis. Dás gávdno loahpalaš masterbarggu árvvoštallan, oasseeksámenat mat leat oassin mastergrádas/progrešuvdnašiehtadusas ja maddái masterdutkosa namma. Árvvoštallanboađus registrerejuvvo FS:ii ja sensorprotokolla vurkejuvvo elektrovnnalaš vuorkái.

Duođaštusaid dárkkisteapmi

Geassemánu 1. beaivvi 2012 rájes sisafievrriduvvui originála duođaštusaid čájeheami gáibádus. Sámi allaskuvlla bivdima vuođul galget studeanttaid buktit ovdan originála duođaštusaid mat leat vuođđun sisabeassamii dahje oahppoduođaštusa čáliheapmái Sámi allaskuvllas. Studeanttat geat eai čuovo dán bivdima ja buvtte originála duođaštusaid dárkkisteapmái, sáhttet massit oahpporievtti. Oahppoduođaštusat maid Sámi allaskuvla čáliha sáhttet doalahuvvot dassá originála duođaštusat leat buktojuvvon ja dárkkistuvvon.

Oahppoduođaštusa praktihkalaš prosedyra

Oahppohálddahusa siskkáldas prosedyrat oahppoduođaštusaid guoskevaš bargguide leat gávdnamis oahppohálddahusa siidduin Sámi allaskuvlla ruovttusiiddus. Dáppe gávdnojit maiddái dievasmahtti prosedyrat oahppoduođaštusaide guoskevaš bargguide FS:s.

Ođđa oahppoduođaštusa čáliheapmi

Ođđa oahppoduođaštus ii čálihuvvo jus kandidáhtta maŋŋel ceavzá ođđa eksámeniid mat sáhttet leat oassin grádas. Ođđa eksámenat duođaštuvvojit árvosátnečállosiin.

Jus kandidáhtta maŋit áiggis buorida árvosáni mii lea oassin oahppoduođaštusas, de sáhttá ođđa oahppoduođaštus čálihuvvot. Boares oahppoduođaštus ferte buktot Sámi allaskuvlii ja makulerejuvvot ovdal ođđa duođaštus sáhttá čálihuvvot. Garvin dihte eahpečielggasvuođaid dan oktavuođas go dáhton oahppoduođaštusa sisdoalus ii oktiivástit dáhtoniin mii lea oahppoduođaštusa ovdasiiddus, de galget čuovvovaš dieđut lasihuvvot oahppoduođaštussii:

  • Sámegillii: “Árvosátni lea buoriduvvon maŋŋel go gráda lea olahuvvon.”
  • Bokmål: “Karakteren er forbedret etter at graden er oppnådd.”
  • Nynorsk: “Karakteren er forbetra etter at graden er oppnådd.”
  • Engelsk: “The grade has been improved after the degree was awarded.”

Máŋgosa (duplikata) čáliheapmi

Gávdno dušše okta originála oahppoduođaštus. Jus oahppoduođaštusa eaiggát massá su oahppoduođaštusa ja/dahje oahppoduođaštusa lasáhusa (Diploma Supplementa), de galget earenoamáš buorit ákkat ovdal máŋggus (duplikata) čálihuvvo. Dát sáhttá dáhpáhuvvat ovdamearkka dihtii jus oahppoduođaštus lea jávkán buollima geažil, billahuvvan čáhcevahágiid geažil jna. Dákkár sivat galget duođaštuvvot. Máŋggus lea originála oahppoduođaštusa kopiija, mii lea čálihuvvon originála báhpirii ja steampilastojuvvon “DUPLIKAT” buot siidduide.

Jus oahppoduođaštusa dieđut leat gávdnamis dušše elektrovnnalaččat, de čálihuvvo ođđa oahppoduođaštus oahppoduođaštusa báhpirii ja báhpirat vuolláičállojuvvojit, vejolaččat sáhttet ođđa olbmot vuolláičállit. Juohke siidui steampilastojuvvo ”DUPLIKAT”.  Vuolláičállima dáhton sáhttá leat eará go originála duođaštusas.

Jus originála oahppoduođaštusas gávdno kopiija, de kopierejuvvo dát ja steampilastojuvvo ”Rett kopi” oktan báikkiin, dáhtoniin ja vuolláičállagiin juohke siidui.

Oahppoduođaštusa čáliheapmi olgoriikka kandidáhtaide

Oahppo- ja dutkandepartemeanta celkkii reivvestis 24.03.98 ahte galgá dušše okta originála oahppoduođaštus čálihuvvot maŋŋel oahpu gárvema. Dát galgá leat dárogillii, jus prográmma ii leat ollislaččat čađahuvvon eŋgelasgillii. Oahppoduođaštus galgá dievasmahttojuvvot Diploma Supplementain ja árvosátnečállosiin eŋgelasgillii.

Dárbbu mielde lea vejolaš oažžut oahppoduođaštusa almmolaččat duođaštuvvot. Dása gávdnojit goabbatlágán prosedyrat, mat leat čadnon dasa ahte háliida go kandidáhtta originála oahppoduođaštusa dahje dán kopiija legaliserejuvvot. Jus dát guoská originála oahppoduođaštussii, de sádde kandidáhtta duođaštusa Máhttodepartementii verifiserema váras. Dasto sádde Máhttodepartemeanta dán Olgoriikadepartementii dahje fylkkamánnii, gii lasiha oahppoduođaštussii apostille. Goappá sajis apostille lasiheapmi dahkko, boahtá das guđe riikkas kandidáhtta lea eret dahje guđe riikkas oahppoduođaštus galgá geavahuvvot. Muhtun riikkat leat vuolláičállán konvenšuvnna mii mielddisbuktá ahte lea doarvái ahte fylkkamánni lasiha apostille. Muhtun riikkat eai leat vuolláičállán namuhuvvon konvenšuvnna ja dáid riikkaid oktavuođas lasiha Olgoriikkadepartemeanta apostille. Jus lea origináladuođaštusa kopiija, de ferte okta notarius publicus dan duođaštit ovdal dán sáhttá sáddet Máhttodepartementii ja dasto Olgoriikkadepartementii dahje fylkkamánnii.

Olgoriikka studeanttat geat olahit gráda Sámi allaskuvllas galget oažžut:

  • Oahppoduođaštusa dárogillii.
  • Ollislaš árvosátnečállosa eŋgelasgillii.
  • Diploma Supplement.

Olgoriikkastudeanttat geat leat čađahan eaŋkileksámeniid Sámi allaskuvllas galget oažžut:

  • Ollislaš árvosátnečállosa eŋgelasgillii.

Oahppoduođaštusaid relevánta duođaštusaid vurkkodeapmi

Sámi allaskuvla lea geatnegahtton sáhttit duođaštit makkár vuođuin mii leat čálihan gráda, maiddái maŋit áiggis. Máŋgga siva geažil sáhttá šaddat dárbu ođđasit čálihit oahppoduođaštusa/oahppoduođaštusa vuođu. Dán dihte lea dárbu ahte gávdnojit buorit vuogádagat ja rutiinnat juohke kandidáhta oahppoduođaštusa relevánta dieđuid vurkkodeapmái.

Sámi allaskuvla lea geatnegahtton vurkkodit buot dieđuid mat leat oahppoduođaštusaide relevánttat. Dát mearkkaša duođaštusaid mat dahket oahpuid sisabeassama vuođu (oahppoduođaštusat, árvosátnečállosat, bargoduođaštusat ja eará mii lea relevánta sisabeassama vuđđui), ja maiddái duođaštusaid mat gusket olggobealde oahpuid mat leat sisaheivehuvvon, dohkkehuvvon dahje addán vuođu beassat Sámi allaskuvlla eksámeniin.

Oahppohálddahus ovddasvástida namuhuvvon duođaštusaid vurkkodeami.

Buot duođaštusat galget vurkejuvvot elektrovnnalaččat FS:ii ja elektrovnnalaš vuorkái.

Oahppoduođaštus ja Diploma Supplement (DS) vurkejuvvo pdf-hámis ovdalis namuhuvvon báikkiide.

Vurkkodeapmi ovdal 2009

Oahppoduođaštusaid vuolláičállojuvvon kopiijat, DS, Transcript of Records, sensorprotokollat ja eará oahppoduođaštusaid relevánta duođaštusat leat gávdnamis báberhámis studeantamáhpain.

Eará gráda dahje oahpu dohkkeheapmi

Sus geas lea oahppu olgoriikka dahje Norgga ásahusas mii ii boađe Universitehta ja allaskuvlalága vuollái, sáhttá ohcat oažžut gráda dahje oahpu dohkkehuvvot oassin grádii dahje vástideaddjin grádii dahje eará ohppui maid Sámi allaskuvla fállá, vrd. Universitehta ja allaskuvlaláhka § 3-4. NOKUT:a dohkkehanáššit galget leat bagadeaddjin dakkár ohcamiid meannudeapmái Sámi allaskuvllas.

Dákkár dohkkeheamit galget raporterejuvvot NOKUT:ii, vrd. forskrift om akkreditering, evaluering og godkjenning etter lov om universiteter og høgskoler av 8. september 2005 nr. 1040 § 5-2.

Dohkkeheami duođaštus galgá biddjot studeantamáhppii.

Olggobealde oahpuid dohkkeheapmi ja sisaheiveheapmi lea čilgejuvvon kapihttalis 6.

Skovvi mainna diŋgo friddja bachelora lea gávdnamis Sámi allaskuvlla ruovttusiiddus.

Det vil bli publisert linker til følgende dokumenter og veiledere senere:

Oahppohálddahusa siskkáldas prosedyrat oahppoduođaštusaid guoskevaš bargguide leat gávdnamis oahppohálddahusa siidduin Sámi allaskuvlla ruovttusiiddus.

 


Kvalitehtasihkkarastin:

  1. Ulbmil ja huksehus
  2. Aktevrrat ja ovddasvástádusjuohku
  3. Kvalitehtadimenšuvnnaid mihtut
  4. Evalueremat
  5. Oahppokvalitehta analysa
  6. Bargo- ja ovddasvástádusjuohku kvalitehtasihkkarastimis ja oahpuid hálddašeamis

 

Oahppodoaimmaid kvalitehtagiehtagirji
Filesize: 1226 KB