3. Kvalitehtadimenšuvnnaid mihtut

Sisaváldinkvalitehta

Sisaváldinkvalitehta guoská sihke formála gáibádusaide mat gusket sisaváldimii ja sisaváldima bohtosiidda. Buriin sisaváldinkvalitehtain oaivvilduvvo ahte Sámi allaskuvllas leat doarvái ohccit ja ahte ohcciin lea buorre dássi sin ovdalgihtii máhtolašvuođas.

Sámi allaskuvllas galgá leat buorre sisaváldinvuogádat mii fátmmasta proseassaid rekrutterema rájes gitta ođđa studeanttaid vuostáváldimii. Sámi allaskuvla galgá sihkkarastit kvalitehta dieđuin mat raporterejuvvojit siskkáldasat ja olgguldasat. Sámi allaskuvla galgá systematiseret ja analyseret čoavddaloguid ja doaimmaide mat gullet studeantasisaváldimiidda. Dát dieđut galget leat mielde jahkásaš raporttas stivrii.

Dutkan- ja oahppostivrras lea ovddasvástádus sisaváldinkvalitehtii. Oahppohoavddas lea ovddasvástádus hálddahuslaččat láhčit dili buori sisaváldinkvalitehtii.

 

Oahppokvalitehta

Oahppokvalitehta guoská dilálašvuođaide mat váikkuhit studeanttaid oahppanprosessii, ja dakko bokte dasa man ávkkálaš oahppu lea studeanttaide. Oahppokvalitehta sisttisdoallá prográmmakvalitehta, oahpahuskvalitehta ja relevánsa sámi servvodaga dárbbuid ektui. Dát doibmet ovttas ja váikkuhit nubbi nubbái.
 Sámi allaskuvllas galgá leat vuogádat mii sihkkarastá buori oahppokvalitehta. Guovddážis oahppokvalitehtas leat árvvoštallamat, ja Sámi allaskuvllas galgá leat vuogádat oahppokvalitehta árvvoštallamiidda iešguđet dásiin ja vuogádat árvvoštallamiid čuovvolahttimii.  Dát dieđut galget leat oassin oahppoásahusa jahkásaš raporttas stivrii.

Dutkan- ja oahppostivrras lea ovddasvástádus oahppokvalitehtii. Goahtejođiheddjiin lea ovddasvástádus sihkarastit buori oahppokvalitehta ja kvalitehtaovdáneami iežas fágagoađis. Oahppohoavddas ja oahppohálddahusas lea ovddasvástádus hálddahuslaččat láhčit dili buori oahppokvalitehtii.

 

Eksámenkvalitehta

Eksámenkvalitehtii gullá studeanttaid oahppanávki ja oahpu relevánsa oahppoplána mihttomeriid, studeantta persovnnalaš ovdáneami ja čađaheami ektui. Sámi allaskuvla galgá bargat dan guvlui ahte nu olu studeanttat go vejolaččat ožžot buriid fágalaš bohtosiid ja čađahit oahpuid  dábálaš oahppoáiggis.  Sámi allaskuvla galgá čuovvut našuvnnalaš ja báikkálaš eksámennjuolggadusaid

Sámi allaskuvllas galget leat vuogádagat ja rutiinnat eksámena oktavuođas, ja sihkkarastit kvalitehta dain dieđuin mat raporterejuvvojit siskkáldasat ja olgguldasat. Ásahus galgá systematiseret ja analyseret čoavddaloguid mat gullet eksámenbohtosiidda. Dát dieđut galget leat oassin ásahusa jahkásaš raporttas stivrii.

Dutkan- ja oahppostivrras lea ovddasvástádus eksámenkvalitehtii. Oahppohoavddas ja oahppohálddahusas lea ovddasvástádus hálddahuslaččat láhčit dili buori eksámenkvalitehtii.

 

Dutkankvalitehta

Dutkankvalitehta sisttisdoallá dutkiid dieđalaš bargodili Sámi allaskuvllas ja dan ulbmil lea sihkarastit systemáhtalaš vuhtiiváldima allaskuvlla dutkangelbbolašvuođas. Guovddážis dán kvalitehtadimenšuvnnas leat dutkanbohtosat. Sámi allaskuvla galgá láhčit buori eavttuid dutkama čađaheapmái. Sámi allaskuvla galgá sihkarastit dutkanbohtosiid almmuheami ja gaskkusteami servvodahkii. Sámi allaskuvla galgá maid sihkarastit ahte dutkanbohtosat bohtet ávkin Sámi allaskuvlla siskkáldas ovdáneapmái ja oahpahussii.

Sámi allaskuvla galget leat  doarjjadoaimmaid mat sihkkarastet buori jođiheami, oktiiordnema  ja raporterema ásahusa ollislaš dutkan- ja ovdánahttinbargguin. Ásahus galgá systematiseret ja analyseret čoavddaloguid ja doaimmaid mat gullet dutkamii. Dát dieđut galget leat oassin ásahusa jahkásaš raporttas stivrii.  

Dutkan- ja oahppostivrras lea ovddasvástádus dutkankvalitehtii. Goahtejođiheddjiin lea ovddasvástádus fágalaččat čuovvolahttit ja láhčit dili buori dutkankvalitehtii iežas fágagoađis. Oahppohoavddas ja dutkanhálddahusas lea ovddasvástádus hálddahuslaš doarjjadoaimmaide.

 

Rámmakvalitehta

Sámi allaskuvla galgá fállat ođđaáigásaš vuođđostruktuvra, teknologiija ja bálvalusaid oahppo- ja dutkandoibmii.  Sámi allaskuvllas galgá leat buorre ja beaktilis bargobiras mii joksá biddjojuvvon mihttomeriid.   Geavaheddjiidguvllot- ja oassálastin, stabilitehta, beaktilvuohta ja bálvalankvalitehta leat dehálaš mihttomearit rámmakvalitehta buot osiide.

Allaskuvladirektevrras lea bajitdási ovddasvástádus buot hálddahuslaš ovttadagaid kvalitehtasihkkarastinbargguide. Dáid ovttadagaid gaskajođiheddjiin lea ovddasvástádus iežaset ovttadagaid kvalitehtabargguide ja ovdáneapmái.  Lea gaskajođiheddjiid ovddasvástádus ahte doibmii ráhkaduvvojit rutiinnat ja systemat ja ahte dat čuvvojuvvojit.


Kvalitehta spiehkasteamit

Spiehkasteapmi lea kvalitehtamihtuid váilevaš olaheapmi. Spiehkasteamit leat maid dilálašvuoðat ja dáhpáhusat mat hehttejit Sámi allaskuvlla doalahit ja buoridit kvalitehta. Sámi allaskuvlla bargiin ja studeanttain lea ovddasvástádus dieđihit spiehkastemiid, spiehkastatvuogádaga bokte mii lea ásahuvvon dan váste. Dutkan ja oahppostivrras lea ovddasvástádus dán vuogádahkii, ja dát galget raporterejuvvo allaskuvlastivrii jahkásaš kvalitehtaraportta mielde.

Sámi allaskuvllas lea sierra prosedyra spiehkastemiid čuovvoleapmái. Mihttun prosedyrain lea sihkkarastit ahte buot spiehkastatdieđut registrerejuvvot ja meannuduvvojit riekta ja sihkkarastit ahte spiehkastatdieđut čuovvolahttojuvvojit nu ahte sullasaš spiehkasteamit eai dáhpáhuva boahtteáiggis.

Spiehkastatdieđut sáddejuvvojit Sámi allaskuvlla E-boastačujuhussii, postmottak@samiskhs.no. Oassin dieđus galgá leat ovddideaddji namma ja e-boastačujuhus, čilgehus makkár spiehkasteamis lea sáhka, jus spiehkasteapmi guoská ohppui de galgá boahtit ovdan makkár ohppui ja lassin galgá evttohuvvon buoridandoaibma leat mielde dieđus.

Ovdakantuvrras sáddejuvvo spiehkastat diehtu guoskevaš jođiheaddjái, geas lea ovddasvástádus čuovvolahttit spiehkastatdieđu. Oahpuide ja oahppobirrasii guoskevaš spiehkastatdiehtu sáddejuvvo oahppohovdii. Teknihkalaš rusttegiid spiehkastatdieđut sáddejuvvojit teknologiijahovdii ja girjerádjosii guoskevaš spiehkastatdieđut girjerádjosa hovdii.

Jus ášši guoská fágii, de lea oahppohoavddas ovddasvástádus sáddet dieđu guoskevaš oahpu goahtejođiheaddjái ja koordináhtorii. Goahtejođiheaddji galgá sihkkarastit ahte koordináhtor bidjá johtui buoridandoaimmaid. Spiehkasteami dieđiheaddji galgá dohkkehit spiehkasteami čuovvolahttima ja čovdosa. Jus spiehkastatdieđu dieđiheaddji ii dohkket čovdosa maid koordináhtor lea bidjan johtui, de lea goahtejođiheaddji ovddasvástádus čuovvolahttit ášši. Goahtejođiheaddji ovddasvástida ahte buoridandoaimmat biddjojit johtui. Go spiehkasteami dieđiheaddji dohkkeha spiehkasteami čuovvolahttima ja čovdosa, de ášši sáhttá gokčojuvvot. Ášši sáddejuvvo dasto fas oahppohovdii guhte gokčá ášši.

Spiehkastatdieđut galget meannuduvvot nu jođánit go vejolaš ja maŋemusat 2 vahkku maŋŋel spiehkastatdieđu dieđiheami. Vaikko bistevaš čoavddus ii leat sajis golmma vahkku siste, de galgá dieđiheaddjái maŋemusat dalle dieđihuvvot mo ášši čuovvolahttojuvvo.

Spiehkastatdieđuid meannudeapmi ja stáhtus galgá leat oassin jahkásaš kvalitehtaraporttas.

Jus leat spiehkasteamit oahpuidguoskevaš áššiin mat dáhpáhuvvet máŋgii, de galgá oahppohoavda ovddidit dáid spiehkastatdieđuid jođiheaddjejovkui, geat árvvoštallet mo buoremusat čuovvolit ja čoavdit dáid.

Spiehkasteami sáhttá maiddái dieđihit báberhámis sierra skoviin.

 


Kvalitehtasihkkarastin:

  1. Ulbmil ja huksehus
  2. Aktevrrat ja ovddasvástádusjuohku
  3. Kvalitehtadimenšuvnnaid mihtut
  4. Evalueremat
  5. Oahppokvalitehta analysa
  6. Bargo- ja ovddasvástádusjuohku kvalitehtasihkkarastimis ja oahpuid hálddašeamis
Oahppodoaimmaid kvalitehtagiehtagirji
Filesize: 1226 KB