Kapihttal 13. Studeanttaid dohkálašvuođaárvvoštallan

Ulbmil
Dokumeanta galgá sihkkarastit alla kvalitehta studeanttaid dohkálašvuođaárvvoštallama hálddašeamis Sámi allaskuvllas.

Doaibmaguovlu
Dát dokumeanta guoská ollislaččat Sámi allaskuvlla studeanttaid dohkálašvuođaárvvoštallanáššiide. Dohkálašvuođaárvvoštallamis árvvoštallojuvvojit studeantta fágalaš ja persovnnalaš eavttut sáhttit bargat oahpaheaddjin/mánáidgárdebargin ollislaččat. Dat dokumeanta čilge oktasašvuođaid mat leat oassin studeanttaid dohkálašvuođaárvvoštallama barggus.

Njuolggadusat ja lágat
Čuovvovaš lágat ja njuolggadusat mearridit Sámi allaskuvlla studeanttaid dohkálašvuođaárvvoštallama:

Dohkálašvuođaárvvoštallan oppalaččat
Dohkálašvuođaárvvoštallama ortnet galgá sihkkarastit ahte oahpaheaddjeoahpuid kandidáhtat devdet gáibádusaid mat bargoámmáhis leat. Studeanta guhte lea vejolaš vahágin mánáidgárdemánáid ja/dahje ohppiid eallimii, fysalaš ja psyhkalaš dearvvašvuhtii, vuoigatvuođaide ja sihkarvuhtii, ii leat dohkálaš ámmáhii. Máhttodepartemeanta lea forskrift om skikkethetsvurdering i høyere utdanning § 1 mearridan makkár oahpuide guoská dohkálašvuođaárvvoštallan universitehta ja allaskuvlalága § 4-10 vuođul. Dát guoská čuovvovaš oahpuide Sámi allaskuvllas:

  • Sámi vuođđoskuvllaoahpaheaddjeoahppu 1.-7.
  • Sámi vuođđoskuvllaoahpaheaddjioahppu 5.-10.
  • Sámi mánáidgárdeoahpaheaddjeoahppu
  • Praktihkalaš pedagogalaš oahppu

Ovddasvástádusjuohku studeanttaid dohkálašvuođaáššiid hálddašeamis

Allaskuvlastivra ovddasvástida:

  • Nammadit bargi ásahusas dohkálašvuođaárvvoštallama ásahusovddasvástideaddjin, vrd. forskrift om skikkethetsvurdering i høyere utdanning § 7.

Dohkálašvuođaárvvoštallama ásahusovddasvástideaddji ovddasvástida:

  • Vuostáiváldit ja meannudit eahpádusdieđihemiid
  • Ovddidit vejolaš áššiid allaskuvlla dohkálašvuođaárvvoštallama lávdegoddái
  • Bagadit bargiid, hárjehallanbáikkiid ja studeanttaid dohkálašvuođaárvvoštallama ektui ja gažaldagain mat gusket eahpádusdieđihemiide
  • Studeanttaide ja bargiide juohkit dieđuid dohkálašvuođaárvvoštallama birra

Universitehta ja allaskuvlalága § 4-10 goalmmát lađđasa njuolggadusaid vuođul vrd. forskrift om skikkethetsvurdering i høyere utdanning § 6, lea allaskuvlastivra nammadan sierra dohkálašvuođaárvvoštallama lávdegotti.

Allaskuvlla dohkálašvuođaárvvoštallama lávdegoddi ovddasvástida:

  • Meannudit dohkálašvuođaáššiid maid ásahusovddasvástideaddji ovddida
  • Ráhkadit mearrádusárvalusa dohkálašvuođaáššiin allaskuvlla váiddalávdegoddái

Allaskuvlla váiddalávdegoddi ovddasvástida:

  • Mearridit dohkálašvuođaárvvoštallama áššiid.

Fágagoađit ovddasvástidit:

  • Guoskevaš oahpu studeanttaid dohkálašvuođa árvvoštallat áiggis áigái
  • Hárjehallanbáikkiide muitalit dohkálašvuođaárvvoštallama birra
  • Nammadit gulahallanolbmo dohkálašvuođaárvvoštallanáššiide
  • Studeanttaide ja bargiide juohkit dieđuid dohkálašvuođaárvvoštallama birra

Oahppohálddahus ovddasvástida:

  • Doaibmat čállin dohkálašvuođaárvvoštallanlávdegottis ja váiddalávdegottis dohkálašvuođaáššiin.

Jotkkolaš dohkálašvuođaárvvoštallan

Universitehta ja allaskuvlalága § 4-10 vuosttaš lađđasa nuppi čuoggá vuođul galgá guoskevaš oahpuin dáhpáhuvvat jotkkolaš árvvoštallan mas árvvoštallojuvvo leago guhtege studeanta dohkálaš bargat ámmáhis masa son lea váldime oahpu. Čađahuvvon oahpu oahppoduođaštus eaktuda ahte studeanta lea árvvoštallojuvvon dohkálažžan ámmáhii. Jotkkolaš dohkálašvuođaárvvoštallan galgá leat oassin ollislaš árvvoštallamis mas studeantta fágalaš ja persovnnalaš eavttut sáhttit bargat oahpaheaddjin/mánáidgárdebargin árvvoštallojuvvojit.  Dákkár dohkálašvuođaárvvoštallan lea čadnon ordineara studeantačuovvoleapmái eksámeniid ,oahpahusa, hárjehallamiid, bagadallamiid ja ságastallamiid bokte.

Earenoamáš dohkálašvuođaárvvoštallan

Earenoamáš dohkálašvuođaárvvoštallan galgá dahkkot jus lea ákkastallojuvvon eahpádus studeanta dohkálašvuođas. Earenoamáš dohkálašvuođaárvvoštallan galgá dahkkot dušše earenoamáš dilálašvuođain gos eará formála ja eahpeformála doaibmabijut oahpu áigodagas eai leat buktán rievdadusaid studeantta láhttemii.

Unnimusgáibádus ámmáha váilevaš dohkálašvuođa duođašteapmái lea ahte unnimusat okta árvvoštallaneavttuin guoskevaš oahpus lea devdojuvvon.

Oahpaheaddjeoahpuid studeanttaid árvvoštallaneavttut: 

  • Váilevaš dáhttu dahje dáidu fuolaheamis ja mánáid ja nuoraid oahppanproseassaid jođiheamis mánáidgárdde ja skuvlla doaimma mihtuid ja njuolggadusaid mielde.
  • Váilevaš dáhttu dahje dáidu oaidnit mii dáhpáhuvvá mánnájoavkkus dahje luohkás ja dán vuođul ráhkadit birrasa mii vuhtiiváldá mánáid ja nuoraid sihkarvuođa ja sin psyhkalaš ja fysalaš dearvvašvuođa.
  • Guođđit ovddasvástádusa leat rollamodeallan mánáide ja nuoraide mánáidgárdde ja skuvlla doaimma mihtuid ja njuolggadusaid mielde.
  • Váilevaš dáhttu ja dáidu gulahallat ja ovttasbargat mánáiguin, nuoraiguin ja rávisolbmuiguin.
  • Studeanttas leat váttisvuođat mat dagahit ahte son doaibmá hui hejot su birrasa ektui
  • Studeanta čájeha unnán iešipmárdusa oahpaheaddjeoahpu ja boahttevaš ámmátrolla bargguid oktavuođas
  • Čájeha váilevaš dáhtu dahje dáiddu rievdadit dohkkemeahttumis láhttema bagadallama mielde.

Dát eavttut leat oppalaččat ja fertejit dievasmahttojuvvot kvalifiserejuvvon, fágalaš ja ámmátlaš árvvoštemiin. Jus studeanta deavdá ovtta dahje máŋga eavttu, de galgá árvvoštallojuvvot sáhttá go dát okto dahje ovttas eará diliiguin dagahit vejolaš vahága/vahágiid mánáidgárdemáná dahje oahppi eallimii, psyhkalaš ja fysalaš dearvvašvuhtii, vuoigatvuođaide ja sihkarvuhtii.

Dohkálašvuođaárvvoštallama dilálašvuođat dábálaččat čatnasit oahppodilálašvuhtii. Oahppodilálašvuođain oaivvilduvvo sihke teoriija- ja praksisoahpahus. Dilálašvuođat dahje dáhpáhusat olggobealde oahppodilálašvuođa sáhttet dušše váldot vuhtii dan mielde mo dát čuhcet dahje sáhttet čuohcat dasa mo studeanta doaibma oahpaheaddjin. Boahtá go dilálašvuohta leat hehttehussan studentii doaimmahit guoskevaš ámmáha dohkálaččat galgá leat mearrideaddjin.

Iešguđet momeanttaid árvvoštallamis galgá deattuhuvvot man guhkas studeanta lea ollen oahpuinis ja boahtá go oahppan ja ovdáneapmi oahpus dahkat studeantta dohkálažžan guoskevaš ámmáhii.

Eahpádusdieđiheapmi

Earenoamáš dohkálašvuođaárvvoštallan álggahuvvo ákkastallojuvvon eahpádusdieđiheami addimiin allaskuvlla ásahusovddasvástideaddjái. Buohkat geat leat oktavuođas studeanttaiguin guoskevaš oahpus sáhttet addit eahpádusdieđiheami, dákko bokte ovdamearkka dihtii fágaoahpaheaddjit, hárjehallanoahpaheaddjit, hálddahusbargit ja studeanttat. Eahpádusdieđiheapmi galgá leat ákkastallojuvvon ja ii sáhte addot anonyman. Dieđiheamit mat čielgasit eai leat ákkastallojuvvon ja vuođustuvvon eai meannuduvvo. Son guhte buktá eahpádusdieđiheami ii rehkenastojuvvo áššebealálažžan dohkálašvuođaáššis ja sus ii leat riekti oaidnit áššedokumeanttaid.  

Ásahusovddasvástideaddji meannudeapmi

Ásahusovddasvástideaddji čielggada ášši ja dieđiha studentii čálalaččat ahte lea ákkastallojuvvon eahpádus su dohkálašvuođa ektui. Ásahusovddasvástideaddji galgá sihkkarastit ahte bovdet studeanta árvvoštallanságastallamii nu jođánit go vejolaš. Studeanta sáhttá váldit mielde ságadoalli árvvoštallanságastallamii, muhto sus ii leat vuoigatvuohta oažžut gokčojuvvot advokáhttagoluid dán áigemuttus. Studentii galgá fállojuvvot viiddiduvvon čuovvoleapmi ja bagadallan jus ii leat nu ahte dákkár čuovvoleapmi ii leat veahkkin studentii. Árvvoštallanságastallamis galgá čállojuvvot čálalaš referáhtta mii sisttisdoallá áššečilgehusa ja vejolaš plánaid studeanta viiddiduvvon čuovvoleapmái ja bagadallamii.

Jus viiddiduvvon čuovvoleapmi ja bagadallan ii mielddisbuvtte dárbbašlaš rievdadusaid ja ovdáneami studeanttas, de galgá ásahusovddasvástideaddji ovddidit ášši ásahusa dohkálašvuođaárvvoštallama lávdegoddái mearrádusárvalusa haga.

Ásahusa dohkálašvuođaárvvoštallama lávdegotti meannudeapmi

Allaskuvladirektevra, oahppohálddahusa bokte, ráhkkanahtte ášši dohkálašvuođaárvvoštallama lávdegoddái ja sádde ovddalgihtii dieđu studentii dohkálašvuođaášši birra. Dieđus galgá boahtit ovdan viidásit áššejohtu, studeanta vuoigatvuođat ja áigemearri buktit cealkámuša áššis. Dán rájes lea studeanttas vuoigatvuohta oažžut gokčojuvvot advokáhttagoluid dahje eará ságadoalligoluid, vrd. universitehta ja allaskuvlalága § 4-10 viđat lađas. Goluid gokčá Sámi allaskuvla.

Dohkálašvuođaárvvoštallama lávdegoddi galgá beassat oaidnit buot čálalaš dieđuid áššis ja sáhttá čielggadit ášši eambbo jus lea dárbu. Dohkálašvuođaárvvoštallama lávdegoddi meannuda ášši ja ovddida mearrádusárvalusa allaskuvlla váiddalávdegoddái mas árvvoštallojuvvo leago studeanta dohkálaš vai ii ja galgá go studeanta olgguštuvvot oahpus. Mearrádusárvalusas galgá boahtit ovdan olggušteami áigodat ja vejolaš eavttut beassat joatkit oahpu. Guovtteoaivilvuohta lávdegottis galgá ákkastallojuvvot ja boahtit ovdan mearrádusárvalusas. Dohkálašvuođaárvvoštallama lávdegottis sáhttá mearrádus dahkkot go guokte goalmmádasoassi miellahtuin leat čoahkis.

Ásahusa váiddalávdegotti meannudeapmi

Dohkálašvuođaárvvoštallama lávdegotti mearrádusárvalusa vuođul dahká allaskuvlla váiddalávdegoddi mearrádusa unnimusat guokte goalmmádasoasi eanetloguin universitehta ja allaskuvlalága § 4-10 goalmmát ja njealját lađđasa njuolggadusaid mielde. Mearrádus ahte studeanta ii leat dohkálaš ja mearrádus ahte studeanta galgá olgguštuvvot galgá dahkkot guovtti sierra mearrádusain. Studeanta sáhttá olgguštuvvot guoskevaš oahpus gitta golmma jahkái. Jus váilevaš dohkálašvuohta ámmáhii lea dilálašvuođaid geažil maid váiddalávdegoddi oaidná vássevažžan, de sáhttá olgguštanáigodat mearriduvvot unnibun go golbma jagi. Studeanta ii galgga olgguštuvvot guhkit áigodahkii go dan mii lea dárbbašlaš ákka ektui manne studeanta ii árvvoštallojuvvui leat dohkálažžan. Oanehit olggušteamis sáhttá stivra mearridit eavttuid mat galget devdon ovdal studeanta sáhttá joatkit oahpuin.

Olggušteami mearrádusas galgá studentii dieđihuvvot ahte son ii sáhte olggušteami áigodagas ohcat dahje vuostáiváldit oahpposaji vástideaddji oahpus eará ásahusain mat gullet universitehta ja allaskuvlalága vuollai ja ahte ferte ođđasit ohcat beassat ohppui jus oahppu galgá jotkojuvvot maŋŋel olggušteami. Studeanttas lea vuoigatvuohta oažžut árvosátnečállosa eksámeniin maid lea čađahan.

Olggušteami mearrádusa dieđiheapmi

Oahppohálddahus sádde reivve studentii mas dieđihuvvo allaskuvlla váiddalávdegotti mearrádus. Reivves galgá maid boahtit ovdan diehtu váidinvejolašvuođa birra. 

Go lea mearriduvvon ahte studeanta ii leat dohkálaš, de galget dieđut studeanta nama, viidodaga ja vejolaš olggušteami birra sáddejuvvot Samordna opptak registarii. Studentii galgá dieđihuvvot ahte dát dieđut leat sáddejuvvon. Jus mearrádus rievdaduvvo váidima maŋŋel, de galgá sáddejuvvot ođđa diehtu Samordna opptakii. Dieđut registaris sihkkojuvvojit go olggušteami áigodat nohká.

Váiddameannudeapmi

Olggušteami mearrádus dahkko unnimusat guokte goalmmádasoasi eanetloguin váiddalávdegottis. Studeanta sáhttá hálddašanlága vuođul váidit dákkár mearrádusa. Váidináigemearri lea golbma vahkku dan rájes go diehtu mearrádusa birra lea ollen guoskevaš áššeoasálažžii. Vejolaš váidda galgá sáddejuvvot allaskuvladirektevrii oahppohálddahusa bokte. Váiddaášši ráhkkanahttojuvvo ja ovddiduvvo váiddalávdegoddái meannudeapmái. Váiddalávdegoddi sáhttá duššindahkat dahje rievdadit ovddit mearrádusa jus gávdná váidaga ákkastallojuvvon.

Jus váidda ii váldo vuhtii, de galgá ášši ja ášši dokumeanttat sáddejuvvot Felles klagenemnd for behandling av klagesaker universitehta ja allaskuvlalága §§ 4-7 gitta 4-10 vuođul. Departemeanta lea nammadan Felles klagenemnd for behandling av klagesaker ja Samordna opptak hálddaša dán. Oahppohálddahus sádde ášši ja ášši dokumeanttaid.

Váiddameannudeapmi lea lagabui čilgejuvvon 11. kapihttalis.

 

Kvalitehtasihkkarastin:

  1. Ulbmil ja huksehus
  2. Aktevrrat ja ovddasvástádusjuohku
  3. Kvalitehtadimenšuvnnaid mihtut
  4. Evalueremat
  5. Oahppokvalitehta analysa
  6. Bargo- ja ovddasvástádusjuohku kvalitehtasihkkarastimis ja oahpuid hálddašeamis
Oahppodoaimmaid kvalitehtagiehtagirji
Filesize: 1226 KB