Kapihttal 5. Studeanttaid registreren ja studeantaregistrerema ođasmahttin

Ulbmil

Dokumeanta galgá sihkkarastit ahte Sámi allaskuvlla studeanttaid registreremis, studeantaregistera ođasmahttimis ja eksámenii dieđihemiin lea alla kvalitehta.

Doaibmaguovlu

Guoská buot osiide mat gullet bargui mii guoská studeanttaid registreremii ja studeantaregistera ođasmahttimii.

Ph.D.-oahpuid studeanttaid registreren ja eksámendieđiheamit leat čilgejuvvon sierra 14. kapihttalis.

Sámi allaskuvlla studeanttaid registrerema ja árvvoštallamii dieđihemiid mearridit čuovvovaš lágat ja mearrádusat: 

Studeanttaid vuostáváldin

Sámi allaskuvllas lea dehálaš bures váldit vuostá studeanttaid. Oahppojagi álgima oktavuođas lágiduvvo álggahanvahkku mas leat iešguđet lágán doalut. Álggahanvahkkuprográmma galgá sáddejuvvot ođđa studeanttaide ja almmuhuvvot ruovttusiidui maŋemusat borgemánu 1. beaivve.

Dehálaš oassi oahpuid álgimis lea oahpásmuvvat digitála oahppovuogádahkii, Digigiisái. Juohke lohkanbaji álggus sádde oahppohálddahus ođđa studeanttaid geat leat vuostáiváldán oahpposajifálaldaga namaid, luohkkágullevašvuođa ja e-boastačujuhusaid DGT-ossodahkii. DGT-ossodat ráhkada geavaheaddjinamaid ja čiegussániid ođđa studeanttaide geat leat vuostáiváldán oahpposajifálaldaga ja sádde dáid sidjiide ovdal lohkanbaji álgima. Jus studeanttas lea ovdalaččas beassanvuoigatvuohta Digigiisái, de sáhttá DGT-ossodat sirdit su guoskevaš oahpu latnjii. Geavaheaddjinamaid ja čiegussániid ráhkadeapmái gávdno sierra siskkáldas prosedyra DGT-ossodaga siidduin Sámi allaskuvlla ruovttusiiddus.

Oahppojagi álgima oktavuođas doallá DGT-ossodat Digigiisákurssa. Dán birra ožžot studeanttat dieđuid buresboahtinreivves maid oahppohálddahus sádde sidjiide go vuostáiváldet oahpposajifálaldaga. Kurssa báiki ja áigi almmuhuvvo maiddái Sámi allaskuvlla ruovttusiidui.

Kurssas DGT-ossodat guoskkaha čuovvovaš fáttáid:

  • Sisaloggen ja geavaheaddjinama ja čiegussáni rievdadeapmi
  • Luohkkálanjaid gávdnan
  • Mo buktit sisa bargguid
  • Mo gávdnat sisabuktináigemeari
  • Mo lohkat dieđuid
  • Persovdnadieđut
  • Profiilasiidu/ blogga/ mikroblogga
  • Bloggii publiseren/beassan
  • Persovnnalaš máhpat
  • Logaldallamiid geahččan/ mo čoavdit iešguđet lágán oassebargguid
  • Fiillaid bidjan: jietna, video jna.
  • Foruma/aviissa geavaheapmi
  • Chat

Giđđalohkanbaji álggus fállojuvvo Digigiisákursa ja oahppohálddahusa diehtojuohkin studeanttaide geat eai leat ovdal leamaš studeantan Sámi allaskuvllas.

Sámi allaskuvlla studeanttaid registreren ja studeantaregistera ođasmahttin oppalaččat

Sámi allaskuvlla eksámen ja loahpalaš árvvoštallama láhkaásahusa bokte leat studeanttat geatnegahtton registreret iežaset studeantan juohke lohkanbaji. Registrerema oktavuođas galget studeanttat dárkkistit dieđuid studeantawebas, mat leat registrerejuvvon FS:s. Registrerema áigemearit almmuhuvvojit Sámi allaskuvlla ruovttusiidui.

Studeanttat guđet eai registreret iežaset ja mávsse lohkanbadjedivvaga áigemeriide masset rievtti bagadallamii, semináraide ja eará oahpahusdoaimmaide oassálastimii ja rievtti čađahit eksámena. Oahppohálddahus sáhttá ohcama vuođul addit studentii dispensašuvnna registrerema ja máksima áigemeriin.     

Dieđut ja bálvaleapmi ohcciide, studeanttaide ja bargiide lea stuorra oassi dán barggus. Dán dihte lea dehálaš ahte lea buorre gulahallan dan birra ahte makkár oahput fállojuvvojit juohke lohkanbaji.

Studeanttaid registrerema ja eksámendieđiheami birra diehtojuohkin studeanttaide

Registrerenáigodaga ovdal sáddejuvvo e-boasta buot studeanttaide geain lea oahpporiekti. E-boasttas dieđihuvvo ahte studeantawebas lea registreren rahppon. Ovdalaš registrerenáigemeari sáddejuvvo e-boasta registrerema ja máksima muittuheapmin. Seammás ožžot maid studeanttat geat leat dušše máksán muittuhusa registrerehit iežaset. Oahppohálddahus ovddasvástida dáid e-boasttaid sáddema.

Sámi allaskuvlla studeanttaid registrerema ja eksámenii dieđiheami bargo- ja ovddasvástádusjuohku

Oahppohálddahus ovddasvástida:

  • Lohkanbadjedivvaga máksingáibádusaid sáddema
  • Ovdakantuvrii sáddet listtuid main boahtá ovdan geat leat máksán
  • Studeanttaid oahpporivttiid doalahit riektan áiggis áigái FS:s
  • Čuovvolahttit ja doalahit áigeguovdilin studeanttaid progrešuvdnašiehtadusaid ja oahpahusplánaid FS:s
  • Permišuvnnaid registrerema FS:s.

Lohkanbadjediva

Lov om studentsamskipnader § 10 viđat lađas geatnegahttá oahpposajiid gáibidit lohkanbadjedivvaga máksot.  Lohkanbadjediva mákso Sis-Finnmárkku studeanttaidovttastussii ja lea 400 ruvnno (2014 čavčča rájes). Studeanttat leat geatnegahtton máksit lohkanbadjedivvaga. Máksin ferte dáhpáhuvvat unnimusat 1-5 beaivve ovdal studeanta sáhttá registrerehit iežas studeantawebas. Máksindieđut gávdnojit studeantawebas ja sáddejuvvojit boastta mielde ođđa studeanttaide. Sisaloggen studeantawebii gáibida pin-koda. Dát lea gávdnamis rehkegis mii sáddejuvvo ođđa studeanttaide. Studeanta sáhttá maiddái oažžut sáddejuvvot dán iežas e-bostii studeantaweba ruovttusiiddus.

Studeanttat guđet leat máksán lohkanbadjedivvaga eará studeantaovttastussii eai dárbbat máksit Sis-Finnmárkku studeanttaidovttastussii seamma áigodaga ovddas. Dát studeanttat fertejit duođaštit ahte leat máksán ovdal sáhttet registrerehit iežaset.

Refušuvdnagažaldagat ja gažaldagat mat gusket lohkanbadjedivvaga máksima beassamii galget ovddiduvvot oahppohálddahussii.

Lohkanbadjedivvaga máksimis beassan

Forskrift om studentsamskipnader § 17 vuođul sáhttet studeanttat geat leat váldon sisa oahpuide maid viidodat lea unnánat go 15 oahppočuoggá juohke lohkanbajis válljet háliidit go máksit lohkanbadjedivvaga vai eai. Buohkat galget dattege máksit lohkanbadjedivvaga dan lohkanbaji go čađahit eksámena.

Lonohallanstudeanttat eai dárbbat máksit lohkanbadjedivvaga Norgga studeantaovttastusaide. Norgga studeanttat galget máksit lohkanbadjedivvaga ruovttu studeantaovttastussii go mannet olgoriikii lonohallamii oahpu gazzat.

Registreren ja progrešuvdnašiehtadusa/oahpahusplána dohkkeheapmi

Buot studeanttat galget registrerehit iežaset. Sii galget máksit lohkanbadjedivvaga ja registrerehit iežaset studeantawebas. Prográmmastudeanttat galget dohkkehit progrešuvdnašiehtadusa, mas leat guokte oasi. Oahppoovttadagaid studeanttat galget dohkkehit oahpahusplána, mas lea dušše okta oassi. Oahppohálddahus fállá veahki dása.

Studeanttat vižžet studeantakoartta ja mearkka mii duođašta máksima Diehtosiidda ovdakantuvrras. Jus lea dárbu oažžut dán/dáid sáddejuvvot boastta mielde, de fertejit studeanttat váldit oktavuođa ovdakantuvrrain Diehtosiiddas. Jus dát galget sáddejuvvot boastta mielde, de lea dehálaš ahte studeanttat dárkkistit čujuhusaideaset go registrerehit iežaset.

Joatkkaoahpu studeanttaid registreren

Buohkat geat váldojit sisa studeantan Sámi allaskuvlii, maiddái studeanttat joatkkaoahpuin, galget máksit lohkanbadjedivvaga forskrift om samskipnader §§ 15 gitta 22 mearrádusaid vuođul.  Joatkkaoahpuid studeanttaide sáddejuvvo máksingáibádus boastta mielde. Maiddái joatkkaoahpu studeanttat galget registrerehit iežaset studeantawebas. Studeanttat geat váldojit sisa olggobealde dábálaš ohcan- ja registrerehanáigemeriid, ožžot sierra registrerehan- ja máksináigemeari.

Oktasaš máksingáibádus dábálaččat ii ráhkaduvvo. Lohkanbadjedivvaga máksingáibádusat FS:s leat čadnon indiviiddaide, iige joavkkuide dahje oahppoluohkáide. Go oktasaš máksu vuostáiváldo, de ferte FS manuálalaččat ođasmahttojuvvot. Dát buktá lassibarggu. Dán geažil eai berre oktasaš máksingáibádusat ráhkaduvvot.

Studeantaregister

Oahppohálddahus doalaha studeantaregistera dieđuid áigeguovdilin. Dát dahkko dieđuid vuođul maid studeanttat addet registrerema oktavuođas ja muđui. Dása gullet earret eará dieđut oahpporievtti, eksámena, čujuhusrievdama ja nammarievdama birra. Dieđut mannet FS:ii studeantaregistrerema oktavuođas dahje oahppohálddahusa bidjamiin.

Nammarievdadeamit

Studeanttat geat lonuhit nama, fertejit addit dieđu dán birra oahppohálddahussii. Nammarievdan ferte duođaštuvvot.

Persovdnanummára rievdadeamit

Olgoriikka stáhtalahtut geat ožžot oahpposaji Sámi allaskuvllas ožžot fiktiiva persovdnanummára mii adno studeantahálddašanbarggus. Dát nummár adno dušše siskkáldas barggus iige galgga adnot árvosátnečállosiin, studeantakoarttain jna. Sisaloggen studeantawebii registrerema ja sullasaččaid oktavuođas dahkko namuhuvvon nummáriin ja pin-kodain. Studeanttat geat maŋŋel ožžot persovdnanummára álbmotregistaris galget dieđihit dán birra oahppohálddahussii, geat dasto bidjet dán FS:ii. Ođđa persovdnanummára duođaštuvvo álbmotregistara čállosiin.

Heaitima dieđiheapmi

Studeanttat guđet heitet Sámi allaskuvllas ovdal oahpu ollašuhttima galget addit dieđu dán birra oahpu koordináhtorii dahje oahppohálddahussii. Jus studeanta dieđiha koordináhtorii, de galgá koordináhtor addit dieđu dán birra oahppohálddahussii. Jus studeanta dieđiha oahppohálddahussii, de galgá oahppohálddahus addit dieđu dán birra koordináhtorii. Oahppohálddahus registrere heaitima FS:ii ja sihkku eksámendieđihemiid jna.

Permišuvdna

Permišuvdnii guoskevaš mearrádusat bohtet ovdan Sámi allaskuvlla eksámen ja loahpalaš árvvoštallama láhkaásahusas § 6.

Permišuvdna oahpus sáhttá guoskat ovtta dahje máŋgga ohppui. Dát sáhttá mearkkašit ahte studeanttas, geas leat máŋga aktiiva oahpporievtti, lea permišuvdna máŋgga oahpus ja seammás sáhttá son leat aktiiva ovtta dahje máŋgga oahpus.

Permišuvdna addo dábálaččat go studeanta lea čađahan 30 oahppočuoggá dahje eambbo.

Studeanttat geat leat ožžon oahpporievtti ja geat eai dattege áiggo ávkkástallat dán dan lohkanbaji rájes go dát lea gustovaš, eai oaččo permišuvnna. Jus studeanta háliida ávkkástallat oahpporievttis maŋit áiggis, de ferte studeanta ohcat oažžut maŋidit oahpposaji.

Studeanttat geat áigot studeret olgoriikka oahppoásahusain maiguin Sámi allaskuvllas ii leat lonohallanšiehtadus, fertejit ohcat permišuvnna dása. Olgoriikka studeren mii lea oassin oahppoprográmmas ii gáibit permišuvnna.

Studentii sáhttá juolluduvvot 100 % permišuvdna ovtta dahje máŋgga oahpus. Jus studeanta ii hálit 100 % permišuvnna, de progrešuvdnašiehtadus heivehuvvo su ohcama vuođul. Lohkanbadjedivvaga máksin ja registreren dahkko dábálaš vuogi mielde vaikko progrešuvdna rievdaduvvo.

Studeanttat sáhttet ohcat permišuvnna olles jagi. Jus permišuvdnaohcan boahtá maŋŋel registrerema, de ii galgga registreren sihkkojuvvot ja lohkanbadjedivvaga máksin ii galgga refunderejuvvot.

Permišuvdnaohcan ovddiduvvo oahppohálddahussii. Dohkálaš permišuvdnaákkat ja duođaštusat bohtet ovdan Sámi allaskuvlla eksámen ja loahpalaš árvvoštallama láhkaásahusas § 6. Jus studeanttas lea oahpporiekti máŋgga oahpus, de ferte ohcamis boahtit ovdan makkár oahpuin studeanta ohcá permišuvnna ja maiddái makkár ovttadagain studeanta áigu váldit eksámena. Oahppohálddahus meannuda ohcama ovttasráđiid fágasurggiin. Ohcan ja buot gulahallan ohcama oktavuođas galgá vurkejuvvot elektrovnnalaš arkiivavuogádahkii.

Permišuvdna ja muđui rievdaduvvon progrešuvdna sáhttá čuohcat oahppodoarjagii maid studeanta oažžu Loatnakássas. Permišuvdnaohcama vástádusas berre dán dihte boahtit ovdan ahte studeanta ferte váldit oktavuođa Loatnakássain čielggadan dihte makkár váikkuhusat leat permišuvnnas dahje eará rievdadusain progrešuvnnas.

Permišuvdnaáigodagas ii leat vejolaš váldit eksámena ovttadagain main studeanttas lea permišuvdna. Permišuvdnaohcama vástádusas berre dán dihte boahtit ovdan ahte vejolaš árvvoštallandieđiheamit, main studeanttas lea permišuvdna, sihkkojuvvojit. Jus studeanta dattege lea dieđihan dákkár eksámenii(dda), de sáhttet dákkár árvvoštallamii dieđiheamit sihkkojuvvot dieđiheami haga.

Permišuvdnaohcama vástádusas galgá maiddái leat diehtu oahpu joatkima birra maŋŋel permišuvnna.

Go mieđihuvvo permišuvdna, de galgá FS:ii registrerejuvvot permišuvnna áigodat, sturrodat ja sivva. Mearkkašumit permišuvnna oktavuođas eai registrerejuvvo. Áššenummár arkiivavuogádagas sáhttá registrerejuvvot, dát sáhttá registrerejuvvot “Journalnr” oassái.

Permišuvdna ohcama mieđiheami oktavuođas galget vejolaš eksámendieđiheamit, mat gusket oahppoovttadagaide main studeanttas lea permišuvdna, sihkkojuvvot. Dušše eksámenii dieđiheamit mat leat permišuvdnaáigodaga siskkobealde galget sihkkojuvvot. Dát guoská maiddái progrešuvnna rievdadeami oktavuođas, gos vejolaš eksámenii dieđiheamit fertejit sihkkojuvvot dahje rievdaduvvot. Eksámenii dieđiheamit sihkkojuvvojit permišuvnna registrerema dahje progrešuvnna rievdadeami oktavuođas.

Studeantakoarta

Studenantakoartta oažžu Diehtosiidda ovdakantuvrras. Studeantakoarta juolluduvvo buohkaide geat leat váldon sisa ohppui Sámi allaskuvllas, beroškeahttá leago sis oppalaš lohkangelbbolašvuohta dahje ii. Privatisttaide ii addo studeantakoarta. Buohkat fertejit leat máksán lohkanbadjedivvaga ovdal ožžot koartta. Dát dattege ii guoskka sidjiide geaidda gusto Forskrift om studentsamskipnader § 17.

Studeanttat geat leat studeantan lávdaduvvon oahpuin Sámi allaskuvllas, sáhttet sáddet gova Sámi allaskuvlii ja oažžut studeantakoartta sáddejuvvot boastta mielde.

Studeantakoarta lea gustovaš dušše go lea mearka mii čájeha ahte studeanta lea máksán lohkanbadjedivvaga. Studeantakoarta doaibmá legitimašuvdnan oahppooktavuođain ja oktavuođain gos addo studeantafálaldat.

 

Kvalitehtasihkkarastin:

  1. Ulbmil ja huksehus
  2. Aktevrrat ja ovddasvástádusjuohku
  3. Kvalitehtadimenšuvnnaid mihtut
  4. Evalueremat
  5. Oahppokvalitehta analysa
  6. Bargo- ja ovddasvástádusjuohku kvalitehtasihkkarastimis ja oahpuid hálddašeamis
Oahppodoaimmaid kvalitehtagiehtagirji
Filesize: 1226 KB