Oahppu ii deatte - ođđa podkasta
Sámi allaskuvla lea almmuhan ođđa podkasta mas namma lea Oahppu ii deatte. Vuosttaš oassi almmuhuvvui dán vahkus ja prográmmajođiheaddji olles ráiddus lea Ellen Oddveig Hætta Gaup. Podkasta ságastallamat leat pedagogihkkafágii čadnon ja heive bures oahpaheddjiide, váhnemiidda ja earáide geat barget mánáiguin ja nuoraiguin.
- Dál skuvlajagi álggedettiin lea hui vuogas fállat ođđa podkastráiddu mii lea inspirašuvdnan guldaleddjiide, erenoamázit oahpaheddjiide ja sámi studeanttaide. Oahppu ii deatte ráiddus guoskahat máŋggalágan fáttáid ja šaddá miellagiddevaš oahppat sis geat servet dása, dadjá rektor Liv Inger Somby.
Maid ferte diehtit go sápmelažžii oahpaha matematihka?
Nubbi oassi ilbmá borgemánu 29.beaivvi. Dalle leaba studioguossin Ann Synnøve Steinfjell ja Ole Einar Hætta. Nuppi oasi fáddá lea gávdno go sierra sámi matematihkka ja mii dat livččii?
Girjjálašvuođa sajádat skuvllas ja sámi servodagas
Vuosttaš oasi studioguossi lei Sámi allaskuvlla girjjálašvuođaprofessor Harald Gaski. Girjjálašvuođaprofessor dieđusge oaivvilda ahte girjjálašvuohta lea dehálaš otná skuvllas, ja dás ságastallaba girjjálašvuođa ja máinnasteami mearkkašumi mánáid eallimis ja oahpus.
Ođđa oassi oktii vahkus
Juohke distaga almmuhuvvo ođđa oassi. Leat oktiibuot logi oasi ráiddus. Lea Forest People mii lea buvttadan podkasta Sámi allaskuvlla ovddas.
Gávdno dáin kanálain:
Spotify
Google Podcasts
Apple Podcasts
