Ođđa vejolašvuohta ohcat čavčča oanehisáiggeoahpuide
Sámi allaskuvlla studeanttat. Govven: Johtti Productions/Ánne Kátjá Gaup
Sámi allaskuvla lea guhkidan ohcanáigemeari oahpuin main leat ain rabas oahpposajit. Jus it háhppehan ohcat čavčča oahppofálaldagaide ovdal cuoŋománu 15. Beaivvi, de lea dus dál vejolašvuohta.
Oahpuin main leat rabas oahpposajit:
Guhkit áiggi oahppoprográmmat (30 oahppočuoggá):
- Sámegiella ja sámi girjjálašvuohta 1. Ohcanáigemearri: 31.07.2023
- Osku ja eallináddejupmi Sámis. Ohcanáigemearri: 15.08.2023
Oahppoovttadagat - oanehit áiggi fágat bachelordásis:
- SÁM 102 Davvisámegiela morfologiija ja cealkkaoahppa. Ohcanáigemearri: 31.07.2023
- SÁM 108 Davvisámi fonetihkka, fonologiija ja čállinvuogit. Ohcanáigemearri: 31.07.2023
- SÁM 111 Sámi girjjálašvuođa vuođđokursa. Ohcanáigemearri: 31.07.2023
- SÁM 241 - Láidehus sámi báikenammadutkamii. Ohcanáigemearri: 31.07.2023
- Girječállioahppu 1 - Lyrihkka ja teáhterteavsttat. Ohcanáigemearri: 31.07.2023
- Girječállioahppu 2 - Prosa ja muitalusat. Ohcanáigemearri: 31.07.2023
- OKT 101 Eamiálbmotfilosofiija. Ohcanáigemearri: 15.08.2023
- OKT 102 Dieđalaš čállin ja guorahallan. Ohcanáigemearri: 15.08.2023
- PED 170 Lärare i en mångfaldig skola och ett mångfaldigt samhälle. Ohcanáigemearri: 1.09.2023
- PED 1001 Introduction to Indigenous perspectives on special education. Ohcanáigemearri: 1.09.2023
- JUR 103 – Sámi riekteipmárdusat. Ohcanáigemearri: 30.07.2023
- Osku ja eallináddejupmi Sámis 1.Ohcanáigemearri 15.08.2023
- Sámi kultur- ja servodatdiehtu 1. Ohcanáigemearri: 15.08.2023
Oahppoovttadagat - oanehit áiggi fágat mat eai leat bachelordásis
- SAAL 1ÅAR Sørsamisk i praktiske situasjoner – Introduksjon del 1. Ohcanáigemearri 31.07.2023
Ohcanvuogádat: Báikkálaš ohcanvuogádat/Søknadsweb
Sisabeassangáibádusat
Gáibádussan beassat studeantan Sámi allaskuvlii lea oppalaš lohkangelbbolašvuohta ja sámegiella. Jus dus ii leat oppalaš lohkangelbbolašvuohta, de sáhtát ohcat reálagelbbolašvuođa vuođul. Sámi allaskuvlla vuođđooahpuin ja eanaš eará oahppofálaldagain gáibiduvvo dihto dási sámegielmáhttu. Muhtin oahppofálaldagain sáhttet erenoamáš gáibádusat. Dát čilgejuvvojit sierra iešguđet oahppofálaldagas.
Oppalaš lohkangelbbolašvuođa gáibádusat gávdnojit Samordna opptak siiddus.
Mii lea reálagelbbolašvuohta?
Reálagelbbolašvuohta lea gelbbolašvuohta maid leat háhkan ovdamearkka dihte fidnohárjehallamis, bálkákeahttas barggus, organisašuvdnadoaimmain, kurssain dahje eará oahppoduogážis. Ohcci bargo – ja oahppoduogáš árvvoštallojuvvo dan oahppofálaldaga gáibádusa ektui masa ohcá.
Gáibádussan lea:
- ahte ohcci galgá deavdán 25 jagi dahje deavdá 25 jagi dan oahppojagi go álgá ohppui, ja
- ahte ohccis lea unnimusat vihtta jagáš bargo/oahppovásáhus.
Reálagelbbolašvuođagáibádusat gávdnojit Sámi allaskuvlla sisaváldinnjuolggádusain.
Sádde duođaštusaid
Muitte laktit duođaštusa ahte deavddát sisabeassangáibádusaid nu jođánit go vejolaš maŋŋel go ohcan lea registrerejuvvon.
Jearaldagat?
Jus dus leat gažaldagat sisabeassangáibádusaid ektui, de váldde áinnas oktavuođa oahppohálddahusain e-boasta bokte: oahppohalddahus@samas.no
