JUR 103 - Sámi riekteipmárdusat
Dán oahpus oahpásmuvvet studeanttat iešguđet sámi riekteipmárdusaide.
- Oahpahus- ja eksámengiella: Oahpahusa váldogiella lea davvisámegiella. Oasit oahpahusas sáhttet leat eŋgelasgillii dahje davviriikkalaš gielaide. Eaŋgalasgiel oahpahus ii dulkojuvvo. Eará gielaid oahpahus dulkojuvvo dárbbu mielde. Eksámengiella lea sámegiella.
- Oahppočuoggá: 10
- Oahppoáigi: Ovtta lohkanbaji badjel
- Oahpahan- ja oahppanvuogit: Oahpahan- ja oahppanvuogit leat logaldallamat, joavkobarggut, digaštallamat, čállinbarggut ja bagadallamat. Vurdojuvvo ahte studeanttat oassálastet aktiivvalaččat buotlágan oahpahusvugiide ja lohket lohkanmeari áŋgirit ja iešheanalaččat. Studeantabarggut galget dábálaččat ovdanbuktot plenumas.
- Oahpu lágideapmi: Neahttaoahpahus
Diibmoplána ja deaivvadanplána: TimeEdit
Ohcanwebas vállje: "4026 Sámi riekteipmárdusat(Bachelornivå)10sp"
- Sisabeassangáibádusat:
• Dábálaš sisabeassangáibádusat alitohppui. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla/logahaga/gymnása) dahje reálagelbbolašvuohta. Oppalaš lohkangelbbolašvuođa gáibádusat olgoriikkaohcciide bohtet ovdan GSU-listtus.
• Davvisámegielmáhttu.
Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200–300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul
- Oahpu sisdoallu:
Sámit ellet iešguđet riikkain ja iešguđet riikkaid stivrejumiid ja riektevuogádagaid vuolde. Riikkaid riektevuogádagat leat huksejuvvon váldoservvodaga álbmogiid kultuvrralaš árbevieruid nala. Go sámit leat sierra álbmot ja sámiin lea sierra kultuvra, de lea sis maiddái sierra riekteárbevierru ja riekteipmárdusat. Dán oahpus oahpásmuvvet studeanttat iešguđet sámi riekteipmárdusaide. Oahppu gieđahallá sámiid riekteipmárdusaid dološ áiggiid rájes gitta dálá áigái, ja fokusere riekteipmárdusaide mat gusket eanan- ja čáhcegeavaheapmái ja luondduávkkástallamii. Oahppu addá maid vuođđodieđuid sámi riekteáddejumiid riektesuodjalusa birra riikkaidgaskasaš konvenšuvnnaid ja šiehtadusaid vuođul.
- Gáibádusat beassat eksámenii
Ovdal beassá eksámenii, studeanta galgá:
- čađahan ja ožžon dohkkehuvvot ovtta oktagaslaš čálalaš 4-5 siidosaš bargobihtá (ovdasiidu ja referánsalisttu ii leat oassin oppalaš siidogáibádusas).
- Eksámen
Eksámen lea 5-beaivásaš ruovttueksámen mas studeanta čállá 7−10 siidosaš čállosa addojuvvon fáttá vuođul.
Árvosánit addojuvvojit ECTS−vuogádaga mielde, mas A lea buoremus árvosátni ja E lea vuolemus ceavzinárvosátni. F-árvosátni mearkkaša ahte ii leat ceavzán. Muđui čujuhuvvo Sámi allaskuvlla loahpalaš árvvoštallan- ja eksámennjuolggadusaide.
Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no