Dán siiddus gávnnat dieđuid ja skoviid mat veahkehit min nannet Sámi allaskuvlla bargo- ja oahppobirrasa. Leat golbma tearpma mat geavahuvvojit iešguđet diliide:

1. Dieđiheapmi (Varsling) 

Dieđiheapmi geavahuvvo go dáhpáhuvvá juoga mii lea duođalaš ja rihkku lágaid dahje dábálaš ehtalaš norpmaid. 

Dieđihanášši sáhttá omd. leat

• Ahte jođiheaddji dahje oahpaheaddji geavaha iežas posišuvnna givssidit dahje áitit studeantta/bargi. 
• Korrupšuvdna
• Seksuálalaš loavkašuhttin

Bargiin ja studeanttain lea sihke vuoigatvuohta ja geatnegasvuohta dieđihit moaittehahtti dili birra. 

Eambbo dieđut dieđiheami duođalaš dili birra. 

2. Spiehkasteapmi (Avvik)

Spiehkasteapmi guoská áššiide mat rihkkot min siskkáldas rutiinnaid dahje njuolggadusaid, dahje mii sáhttá leat várálaš dearvvašvuhtii ja dorvovuohtii (DBS/HMS).

Spiehkastanášši sáhttá omd. leat ahte

• Oainnat ásahus ii čuovo GDPR njuolggadusaid 
• Oahpahus ii lágiduvvo nu go plánejuvvon
• Muhtin njalkkiha feaskáris man nu siva geažil ja bávččagahttá iežas. 

3. Áican ja buoridanevttohus (Observasjon og forbedring)

Áicama dahje buoridanevttohusa dieđihat jus fuobmát juoga mii ii leat justa dál várálaš, muhto sáhttá šaddat spiehkasteapmin. Dahje jus fuopmát juoga maid sáhttit buoridit.  Dás lea olu maid sáhtát dieđihit. 

Nu go omd.

• Visttis leat dávjá luovos rávdnjefievrredeaddjit (ledning) fieradeame láhttis. Ii oktage leat vel guossalan daidda, muhto dat sáhttá dáhpáhuvvat (ja de šattašii spiehkasteapmin)
• Allaskuvla geavaha menddo olu báberskoviid, livčče álkidit árgabeaivvi jus geavahat baicca neahttaskoviid
• Joavkolanjain galggaše eambbo stuolut

Dieđit dieđiheami, spiehkasteami, áicama/observerema dahje evttot buorideami

Allaskuvlii lea buorre diehtit gii lea sádden skovi jus dárbbaha eanet dieđuid viežžat áššái, muhto lea maid vejolaš sáddet skovi anonymalaččat.

Jus juoga dáhpahuvva; loga eambbo dan birra dáppe: Sikresiden.no

Loga mot eastadit dáhpahusaid: Sikresiden.no

Dieđit dieđiheami

Dieđit spiehkasteami

Dieđit áicama/observerema

Buvtte buoridanevttohusa

Spiehkasteami sáhttá maid dieđihit báberskovi bokte. Dán sáhtta doalvut ovdakántuvrii dahje boasta mielde sáddet: Spiehkastanskovvi (báberhámis)

Dieđit dohkálašvuođa eahpádusa:

Buohkat geat leat oktavuođas studeanttain sáhttet dieđihit dohkálašvuođa eahpádusa, dás sihke fágaoahpaheaddjit, hárjehallanoahpaheaddji, eará fágabargit ja hálddáhusbargit ja mielstudeanttat. Eanet dieđut dáppe: Dohkálašvuođa árvvoštallan | Sámi allaskuvla

Dieđit eahpáhusa dáiguin skoviiguin: Oahpaheadjeoahpuide dahje Dulkaohppui