Studeanttaid rolla

Guovddáš oassi kvalitehtasihkkarastimis lea ovddidit ásahus mii oahppá bargiid ja studeanttaid vásáhusain ja mii geavaha dáid vásáhusaid oahpuid plánemii ja čađaheapmái.

Studeanttat galget aktiivvalaččat searvat oahpuid kvalitehtaovdánahttin ja -sihkkarastin bargguin. Ásahusa jođihangoddi ja fágabiras dárbbaha áiggis áigái oažžut studeanttain kommentáraid ja árvvoštallamiid oahpuid sisdoalu, oahpahusmálliid ja oahpu sosiála ja fysalaš rámmaid ektui. Dát lea dehálaš oassi Sámi allaskuvlla oahppofálaldagaid kvalitehtasihkkarastimis.

Studeanttaid ovddasvástádus:

• Geavahit váikkuhanvejolašvuođa ja konstruktiivvalaččat oassálastit studeantaárvvoštallamiin maid Sámi allaskuvla čađaha buoridan dihte oahppokvalitehta.

Árvvoštallamiiguin studeanttat buktet dehálaš jurdagiid oahpuid kvalitehtasihkkarastinbargui:

Prográmmaid árvvoštallan

Prográmmaárvvoštallamat galget čađahuvvot jahkásaččat. Árvvoštallamis galget fáttát mat leat relevánttat prográmmakvalitehtii váldot bajás, nu mo ovdamearkka dihte:

• Ovttadagaid oktiibidjan ja fágalaš čiekŋudeapmi
• Studeanttaid oahppobiras
• Árvvoštallat leatgo oahpahus-, oahppan- ja árvvoštallanvuogit heivehuvvon oahpu oahppanjoksosiid olaheapmái
• Gávdnosat studeanttaid ja koordináhtoriid oahpuid ja hárjehallamiid árvvoštallamiin
• Oppalaš bargohivvodat studeanttaide
• Studeanttaid iešáŋgiruššan
• olgoriikkaorrun
• Relevánsa
• Dieđut oahpu ja oahpu hálddašeami birra.

Oahppobirrasa iskkadeamit

Sámi allaskuvlla oahppobiraslávdegoddi galgá initieret stuorát oahppobirasiskkademiid. Lassin galget oahppobirrasii guoskevaš áššit ja dilálašvuođat leat oassin ovttadagaid ja prográmmaid systemáhtalaš studeantaárvvoštallamiin. Dáid iskkademiid fáddá galgá leat čadnon áššiide mat leat relevánttat studeanttaid fysalaš, psykososiálalaš ja organisatuvrralaš oahppobirrasii main lea fokus áigeguovdilis čuolmmaide ja hástalusaide. Fágalaš ja sosiála biras, buorit dieđut mat leat olámuttos oahpporelaterejuvvon dilálašvuođaid birra leat maiddái dehálaš fáttát.Iskkademiid gávdnosat addet dieđuid mo studeanttat vásihit oahppobirrasa ja galgá leat vuođđun dárbbašlaš buoridemiide.

Geavaheaddji iskkadeamit

Girjerájus ja DGT-ossodat leat dehálaš oasit studeanttaid oahppobirrasis. Girjerájus ja DGT-ossodat galget áiggis áigái (unnimusat juohke goalmmát jagi) čađahit geavaheaddjiiskkademiid gos studeanttaide addo vejolašvuohta árvvoštallat oahppobirrasii guoskevaš bálvalusaid. Geavaheaddjiiskkademiid gávdnosat galget leat oassin jahkásaš kvalitehtaraporttas, dan jagi go iskkadeamit leat čađahuvvon.

Kandidáhtta iskkadeamit

Sámi allaskuvla galgá čađahit systemahtalaš kandidáhtaiskkadeami, ja nu ahte leat doallevaš dieđut dan birra ahte maid min kandidáhtat dahket maŋŋel go leat geargan oahpuin. Kandidáhtaiskkademiid ulbmil lea gávnnahit mo kandidáhtat árvvoštallet dan oahpu maid leat váldán ja čanastagaid bargoeallimii. Ulbmil čađhan dihte dákkár iskkadeami Sámi allaskuvlla ovddeš studeanttaid gaskkas lea háhkat doallevaš dieđuid Sámi allaskuvlla oahpuid relevánssa birra bargoeallima ektui.

Oahppomátkkiid árvvoštallan

Oahpuin main leat oahppomátkkit galget dát aktivitehtat árvvoštallojuvvot dađistaga. Árvvoštallama fáttát galget čadnot dáidda:

• Oahpu oahppanjoksosat
• Oahpahus dearvvašvuođa, birrasa ja sihkarvuođa ektui
• Leatgo studeanttat ožžon doarvái dieđuid geatnegasvuođaid ja vuoigatvuođaid, oktavuođaolbmuid, sihkarvuođa jna. birra.
• Hálddašeapmi ja láhčin.

Bohtosat galget raporterejuvvot koordináhtorii ja goahtejođiheaddjái.

Hárjehallama árvvoštallan

Studeanttaid hárjehallanáigodaga árvvoštallan sisttisdoallá:

1. Hárjehallanáigodaga árvvoštallan gaskkamuttus áigodaga

Gaskamuttuárvvoštallama ulbmil lea čielggadit manná go hárjehallama čađaheapmi plána mielde ja leat go vejolaččat áššit mat sáhttet buoriduvvot dan botta studeanta lea hárjehallamis. Ávžžuhuvvo ahte koordináhtor ja hárjehallanovddasvástideaddji ovttas ráhkadeaba bagadusa árvvoštallama vejolaš fáttáide. Árvvoštallan sáhttá čađahuvvot joavkkuin dahje ovttaskas studeanttain.

Čálalaš diehtu osiid birra main sáhttá leat dadjamuš hárjehallanáigodaga čađaheapmái galgá dieđihuvvot buot beliide: hárjehallanáigodaga oahppanjoksosat, gáibádusat hárjehallanáigodaga ceavzimii, studeanttaid, hárjehallanbáikki ja oahppobáikki ovddasvástádus ja barggut ja vejolaš eará bealit main lea dadjamuš hárjehallanáigodaga čađaheapmái. Dát diehtu galgá leat oassin árvvoštallama ja kvalitehtabuorideami doaimmaid čađaheami duogášmateriálas. Árvvoštallan galgá sihkkarastit ahte dokumenterejuvvon dieđut vižžojit jeavddalaččat buot beliin ja ahte earenoamážit deattuhuvvo studeanttaid oahppanjoksosiidda hárjehallanáigodagas.

Ohcciid- ja álggaiskkadeamit

Juohke oahppojagi čađahuvvo iskkadeapmi mii galgá identifiseret ođđa ohcciid vásáhusaid ohcan- ja sisaváldinproseassaiguin ja ođđa studeanttaid vásáhusaid oahppojagi álgimiin. Ulbmil dáinna jearahallamiin lea oažžut dihtosii earret eará manne ohccit ohcet Sámi allaskuvlii, man duhtavaččat leat diehtojuohkimiin, makkár dieđuid váillahit ja makkár bealit ohcanproseassas ja álgimis leat buorit ja maid berre buoridit. Dát galgá mielddisbuktit ahte boahttevaš studeanttat ožžot nu buori álgima go vejolaš.

Spiehkastatvuogádat

Spiehkasteapmi lea kvalitehtamihtuid váilevaš olaheapmi. Spiehkasteamit leat maid dilálašvuođat ja dáhpáhusat mat hehttejit Sámi allaskuvlla doalahit ja buoridit kvalitehta. Sámi allaskuvlla bargiin ja studeanttain lea ovddasvástádus dieđihit spiehkastemiid, spiehkastatvuogádaga bokte mii lea ásahuvvon dan váste. Spiehkasteamit galget raporterejuvvo allaskuvlastivrii jahkásaš kvalitehtaraportta mielde.

Sámi allaskuvllas lea sierra prosedyra spiehkastemiid čuovvoleapmái. Mihttun prosedyrain lea sihkkarastit ahte buot spiehkastatdieđut registrerejuvvot ja meannuduvvojit riekta ja sihkkarastit ahte spiehkastatdieđut čuovvolahttojuvvojit nu ahte sullásaš spiehkasteamit eai dáhpáhuva boahtteáiggis. Spiehkastatdieđut sáddejuvvojit Sámi allskuvlla E-boastačujuhussii, postmottak@samas.no dahje dieđihuvvojit ruovttusiiddu bokte.

Stivrrain ja lávdegottiin searvan

Sámi allaskuvlla stivrrat ja lávdegottiit leat guoddáš oasit kvalitehtasihkkarastimis ja dán hálddašeamis. Eanas stivrrain ja lávdegottiin galget leat studeantaáirasat. Dáid bokte sáhttá ovttaskas studeanta ovddidit oaviliid ja leat mielde dehálaš mearrádusaid dahkamis.