juovlamánu 17. beaivi 2014
Duodječájáhus Diehtosiiddas
Leatgo oaidnán man fiinna duodječájáhus mis lea Sámi allaskuvllas?
Govven: Máhtte Sikku Valio
Sámi allaskuvla lea dán čavčča lágidan vuosttas gearddi oahppu mii lea gohčoduvvon Bistevaš design.
Lea 15 oahppočuoggá oahppu mas studeanttat leat lagabuidda oahpásmuvvan sierralágan duddjomii ja hábmemii mas váldá vuhtii kultuvrralaš ja ekologalaš bistevašvuođa.
Govven: Máhtte Sikku Valio
Studeanttat leat geahččaladdan báikkálaš ávdnasiid, nugo guollečuomaid/náhkiid dikšut ja dain duddjon dujiid, leat ođđasit duddjot (redesignen) oapmebiktasiid ja nu duddjoma bokte bargan bistevašvuođain.
Studeanttat leat maiddái barggadettiin oaidnán duddjoma ja designa sullasašvuođaid ja sierranasvuođaid.
Mánnodaga 15.12, rahppoi dát čájáhus Sámi allaskuvllas. Čájáhus bistá juovlamánu 18. beaivvi rádjái diimmu 17:00
Doppe beassá oaidnit studeanttaid bargobohtosiid.
Eanet dieđu čájáhusa ja oahpu birra sáhttá oažžut koordináhtoris:
Britta Marakatt Labba
Mobil +46705906569
