2022 Gollegiella bálkkašupmi Ole Henrik Maggai
Sámi allaskuvlla professor emeritus Ole Henrik Magga lea ožžon Davviriikkaid sámi giellabálkkašumi Gollegiella 2022.
Ruoŧŧa lea dán jagi ovddasvástideaddji riika Gollegiella giellabálkkašumi geigemis, mii geigejuvvo logát gearddi. Bálkkašupmi geigejuvvo ministtariid ja sámediggepresideanttaid čoahkkima olis mii lei Stockholmmas ođđajagimánu 18. beaivvi 2023.
Sámi allaskuvla sávvá lihkku bálkkašumiin
Magga lea Sámi allaskuvlla professor emeritus gii lea sihke oahpahan studeanttaid, ovdánáhttán sámegielaid čállingiellan ja dutkan sámegielaid ja dainna lágiin leamaš dehálaš giellafágalaš ovddasmanni ja maiddái doarjjan fágabirrasiidda.
- Ole Heandarat gal duođai ánssáša fuomášumi sámegielaid ovdánahttinbargguid ovddas, ja sávan hui ollu lihkku bálkkašumiin. Sus lea nanu fágamáhttu máŋgga sámegielas ja lea leamaš ollu jagiid ja lea ain earenoamáš dehálaš olmmoš fágabirrasii Sámi allaskuvllas. Dasa lassin lea sus viiddis servodatipmárdus ja beroštupmi ja lea áŋgir oainnusin dahkat ja fuomášuhttit sámi áššiid maiddái olggobealde Sámi, dadjá Sámi allaskuvlla rektor Laila Susanne Vars iežas lihkusávaldagain Gollegiella 2022 bálkkašumi vuoitái.
