Seammahat hástalusat vuođđun ovttasbargui
-Mihttun lea cegget ovttasbargguid gaskal Sámi ja min, dadjá Mimi Karlsen, Ruonáeatnama parlameantta ovdaolmmoš maŋŋel galledeami Sámi allaskuvllas.
Ruonáeatnama parlameanttas ovdaolmmoš lea dáid beivviid galledan earret eará Sámedikki ja Sámi allaskuvlla. Allaskuvllas lei sus čoahkkin rektoriin, prorektoriin ja direktevrrain. Su sávaldat lea oahpásmuvvat sámiin, ja geahčadit mot sáhtášii nannet ovddasbarggu álgoálbmotservodagaid gaskkas.
Son čujuha earret eará kultuvrralaš ja gielalaš hástalusaide, muhto maiddái dálkkádatrievdademiide ja luonddugeavaheapmái mii máŋgga dáfus áitá sihke sin ja sámiid árbevirolaš eallinvugiid.
- Dan maid Sámi allaskuvllas erenoamážit lean fuomášan ja maid válddán mielde ruoktot, lea ahte mii maid fertet geahččalit čohkket oahpuid ovtta sadjái dan sadjái go fállat oahpuid duoppil dáppil. Go čohkke oahppofálaldagaid, de čohkket maiddái ohppiid, min nuoraid, geat de šaddet inspirašuvdnan ja veahkkin earáide, oaivvilda son.
Karlsen maid lohká sutnje leamaš riggodahkan oaidnit allaskuvllas ahte vaikko álbmot lea unni, de dattege leat sámis nagodan cegget dehálaš oahppofálaldagaid allaskuvllas.
-Maiddái mis lea stuora hástalussan ahte leat unnán oahppan oahpaheaddjit geat máhttet min giela. Dávjá váldet oahpu stuorát báikkiin, ja bisánit dohko. Rekrutteren lea dan dáfus maiddái oktasaš hástalus man birra fertet hupmat eanet.
Eará suorgi mii su vuorjá, leat dálkkádatrievdamat.
- Dies lea maiddái oktasaš hástalus mis ja sámis, ja berret geahčadit fárrolaga mot dustet dán dili.
Go jorgala ruoktot, de son váldá mielde dearvvuohtan eará politihkkáriidda doppe ahte sis leat ustibat máilmmis geat leat seamma dilis go sii.
-Sihke parlamentáralaččat ja oahpahusa dáfus fertet hutkat vugiid mot veahkehit nubbi nuppi, loahpaha Mimi Karlsen.
Ovttasbargat alit oahpahusas ja dutkansuorggis
Sámi allaskuvlla rektor Liv Inger Somby logai dehálaččan čoahkkinastit Kalallit Nunaat parlameantta, Inatsisartut, ovdaolbmuin Mimi Karlsenin. Sáhkan lei sámi alitoahppu ja dutkan ja mo Sámi allaskuvllas bargat riikarájáid rastá.
- Mii maid hálaimet Karlsenin mo sáhttit bargat ovttas Ruonáeatnama ásahusaiguin ja makkár oahppofálaldagat livččejit ávkin sihke sápmelaččaide ja inuihtaide, dadjá Somby.
Rektor lea máŋgii galledan Ruonáeatnama ja dovdá bures sin guovllu ásahusaid.
