Dutkanráđđi juolludii ruđa Eatnama Mánát Skuvlema Bálgáid alde prošektii
Dutkanprošeakta maid Sámi allaskuvla jođiha, lea ožžon lahka 12 mill ruvnno Norgga dutkanráđis sámi skuvllaid metodihka dutkat. Prošeakta lea ovttasbargu gaskal Sámi allaskuvlla, Ubmi universitehta ja University of Arizona.
Ylva Jannok Nutti jođiha dutkanjoavkku mas leat mielde maiddái Marikaisa Laiti (Sámi allaskuvla), Rauna Rahko-Ravantti (Sámi allaskuvla), Charlotta Svonni (Umeå universitet), Valerie Shirley (University of Arizona) ja Jeremy Garcia (University of Arizona). Dutkanjoavku lea dahkan buori dieđalaš ovdabarggu Eatnama Mánát Skuvlema Bálgáid alde: Strengthening Sámi Childrens Identity and Resilience by Transforming Educational Institutions ohcamušain Norgga dutkanráđđái.
Sámi skuvladutkan lea dehálaš boahtteáiggi oahpahusa ovdáneapmái
Dán dutkanprošeavtta ulbmilin lea dutkat lahkonanvugiid transformeremii ja nuppástuhttit sámi skuvllaid metodihka vuođđoskuvllas ja oahpaheaddjeoahpus vai dat nannejit sámi mánáid identitehta ja ceavzilvuođa. Ulbmil lea maiddái guorahallat soabadeami nationála oahppodásis, sámiid ja álgoálbmogiid vuoigatvuođaid ja ceavzilvuođa. Ulbmilat leat kritihkalaččat guorahallat, válddahit ja analyseret pedagogalaš sisdoalu ja strategiijaid movt transformeret sámi teorehtalaš ja didákttalaš perspektiivvaid ja eananvuođut máilmmigovaid pedagogalaš práksisii.
- Mii oaidnit dehálažžan oažžut eanet dieđuid sámi oahpahusaid birra ja dutkat ovttas sámi oahpaheaddjiiguin mánáidgárddiin ja skuvllain, dadjá prošeaktajođiheaddji Ylva Jannok Nutti.
Dutkanráđđi lea meannudan ohcama čakčamánu 27. b. 2024 ja juolludeapmi lea gitta 11.946.000 ruvnno prošektii.
- Lei hui buorre sáhka ahte Sámi allaskuvlla dutkit lihkostuvvet ná bures stuorra dutkanprošeavttaid ohcamiin ja dát prošeakta duođašta Sámi allaskuvlla fágabargiid nana gelbbolašvuođa. Illudan čuovvut dutkanproseassa ja lea dehálaš Sámi allaskuvlii čađahit eamiálbmotdutkamiid ovttas eará universitehtaiguin, dan vuoro Ubmi universitehtain ja University of Arizona. Sávan lihkku Sámi allaskuvlla čeahpes dutkiide geat leat bargan buori vuđolaš barggu ohcamiin, dadjá rektor Liv Inger Somby.
