Ohcciidlohku lassánan ollu moatti jagis
Sámi allaskuvlla ohcciidlogut prográmmaoahpuide leat guovtti jagis sakka lassánan. Logut čájehit ahte dán jagi leat oktiibuot 140 ohcáma, 101 ohcci ja 48: s sis leat bidjan Sámi allaskuvlla oahpuid vuosttašvuoruhussan go leat ohcan allaskuvllaide ja universitehtaide. Diibmá ledje diet logut 70 ohcáma, 57 ohcci ja 28 vuosttašvuoruheami. Measta bealli dán jagi ohcciin leat ohcan sámegiela ja girjjálašvuođaohppui ja duodjeoahpuide, ja nubbe bealli fas oahpaheaddjeoahpuide.
Oahpaheaddjeoahpuide buorit ohcciidlogut
Geabbilis sámi mánáidgárdeoahppu lea ođđa oahppu dán jagi, ja dasa leat 10:s ohcan ja vuođđoskuvlla oahpaheaddjeoahpuide leat oktiibuot 12:s ohcan.
- Nationála treanda ahte oahpaheaddjeoahpuide leat arvat unnit ohccit go ovdal lihkus ii váikkuhan dán jagá ohcciidloguide allaskuvllas, go mis leat oppalašlogut sullii seamma go diibmá ja ovddit jagi. Earenoamáš mearkkašahtti ja illudahtti lea go geabbilis mánáidgárdeoahpu leat logi studeantta vuoruhan vuosttažiin iežaset ohcamis. Dat dieđus čájeha ahte lea dárbu eambbo heivehit oahpuid, omd. neahta bokte lágidit oahpuid ja nu maiddái heivehit sihke geabbilis oahpuid ja oasseáigge oahpuid sidjiide geat leat juo bargguin. Sápmi dárbbaša mánáidgárdeoahpaheddjiid ja sávan ahte sii geat leat ohcan dán ohppui váldet oahpposaji, šattašii hui buorre joavku go álget 10 ođđa studeantta go mis leat jo 8 studeantta mánáidgárdeoahpaheaddjeoahpus dál, dadjá rektor Laila Susanne Vars.
Giella ja duodji bivnnuhat
Sámegiella ja girjjálašvuohta lea fága masa dássedit leat ohccit jagis jahkái, dán jagi leat 11:s bidjan dan fága vuosttažiin iežaset vuoruhanlisttus. Duodji ja design ohppui leat 15:s ohcan, juoga mii lea alla lohku go buohtastahttá loguiguin ovdalaš duodjeohppui.
- Lea illudahtti oaidnit ahte duodjeoahppu geasuha ollu ohcciid. Sámi allaskuvla lea áidna skuvla gii fállá dákkár oahpu, dáppe besset studeanttat duoji ja sámi designa oahpu háhkat bachelordásis ja joatkit masteroahpuin. Duodjefága biras lea unni allaskuvllas ja dáid studeanttaid gaskkas soitet boahttevaš allaskuvlaoahpaheaddjit duojis go dan fágabirrasa ferte beaktilit nannet. Maiddái sámegiela ja girjjálašvuođa ohppui leat oalle ollu ohccit, mii speadjalastá servodaga dárbbu eambbo sámegielat bargiide. Sámi allaskuvllas lea ge nanu sámegielat fágabiras, ja alit oahppu sámegillii dat dárbbašuvvo juohke sajis servodagas, ovdamearkka dihte Sámedikkiin, Sámi allaskuvllas, sámi skuvllain, suohkaniin, mediain ja lágádusain, dadjá Vars.
