Sisaheiveheapmi ja fágain beassan
Universitehta ja allaskuvlalága § 9-1 mielde galgá Sámi allaskuvla dohkkehit oahpu maid studeanta lea čađahan eará Norgga universitehtain ja allaskuvllain, oassin studeanta oahpus Sámi allaskuvllas. Jus ovdal čađahuvvon oahpus leat oahppanjoksosat mat vástidit daid oahppanjoksosiid mat leat mearriduvvon Sámi allaskuvlla oahpus, de galgá allaskuvla sisaheivehit oahpu seamma mađe oahppočuoggáiguin. Go studeanta oažžu dohkkehuvvot ovdal čađahuvvon oahpu oassin iežas oahpus Sámi allaskuvllas, de ii galgga dárbbahit čađahit vástideaddji oahpu ođđasit.
Jus oahppu stivrejuvvo našunála rámmaplána vuođul, de sáhttá rámmaplánas dahje oahpu nášunála njuolggadusain leat gáibádusat dasa makkár fágait sáhttet sisaheivehuvvot.
Sámi allaskuvla sáhttá maid luoitit osiin oahpus eará heivvolaš eksámena dahje geahččaleami vuođul. Duođaštuvvon reálagelbbolašvuohta sáhttá maid leat vuođđun beassamii.
Oppalaš prinsihpat sisaheivehemiide ja fágaid beassamii Sámi allaskuvllas
- Earuhit guovtti dábálaš vuogi gaskkas movt ovdal čađahuvvon oahppu sáhttá addit vuođu beassamii:
- Ovdal čađahuvvon oahppoovttadat sisaheivehuvvo, ja addá vuođu beassat oahpus. Studeanta oažžu ovdal čađahuvvon oahppoovttadaga dohkkehuvvo oassin oahpus.
- Ovdal čađahuvvon oahppu addá vuođu beassat geatnegahtton osiin oahpus. Studeanta sáhttá beassat geatnegahtton oahpahusas ja/dahje geatnegahtton bargguin, muhto čađaha olles eksámena oahppoovttadagas. Studeanta oažžu olles oahppoovttadaga dohkkehuvvot oassin oahpus.
- Oasis fágas/oahppoovttadagas lea dušše vejolaš beassat jus oahppoovttadat, geatnegahtton barggut ja eksámen lea čielgasit juhkkojuvvon unnit osiide (omd. modulaide).
- Oahppu mii lea oassin sisabeassanvuođus ovtta grádii, ii sáhte sisaheivehuvvot oassin grádas.
- Bachelordási oahput eai sáhte sisaheivehuvvot masterdási / nuppi syklus oahpuide.
FUOMÁŠ! Studeanta ferte čuovvut oahppoprográmma dábálaš progrešuvnna vaikko beassá fágain. Dábálaččat ii fállojuvvo vejolašvuohta čađahit iešguđetge oahppojagi fágaid oktanaga, vaikko lea beassan muhtin fágain ovtta oahppojagis. Dat mearkkaša ahte sáhttet leat váikkuhusat du lotnii ja stipendii jus besset fágain ja dainna lágiin it čađat 60 oč ovtta oahppojagis.
Sierra njuolggadusat ja prinsihpat guskket sisaheivehemiide Sámi vuođđoskuvlaoahpaheaddjeoahpu masteriidda bohtet ovdan prinsihppanotáhtas sisaheivehemiide ja fágaid beassamii Sámi allaskuvllas.
Sisaheivehemiid ja fágaid beassama birra sáhtát nai lohkat eanet Sámi allaskuvlla oahppodoaimmaid kvalitehtagiehtagirjji kap. 7:s.
Ohcat sisaheiveheami ja beassat fágain
Sisaheiveheami ozat studeantawebas. Mer vuolde gávdno søknader, man vuolde gávdnojit sisaheivehanohcanskovit ja reálagelbbolašvuođa dohkkeheami skovvi. Jus ozat olu fágaid sisaheivehuvvot, de sáhtát nai atnit sierra skovi maid gávnnat dáppe: Skovit | Sámi allaskuvla (samas.no).
Ohcamis galgá boahtit ovdan makkár fága(id) studeanta ohcá sisaheivehuvvot vástideaddjin makkár fágii/fágaide Sámi allaskuvllas.
Ohcan dábálaččat ii meannuduvvo ovdal go studeanta lea álgán ohppui. Studeanttas lea alddis ovddasvástádus oassálastit, čađahit geatnegahtton bargguid ja vejolaččat čađahit eksámena fágas mas ohca beassat, dassážii go ohcan lea meannuduvvon.
Sisaheivehanohcamiidda dahkko fágalaš árvvoštallan, ovdal meannuduvvojit hálddahuslaččat. Sisaheivehanohcamiiddá lea dábálaččat 3 mánu meannudanáigi, nu ahte ođđa studeanttat ávžžuhuvvojit árrat ohcat vai čielgá makkár fágaid galget čađahit.
