Anja Somby virgáduvvon sámi buohccidivššároahpu prošeaktajođiheaddjin
Sámi allaskuvla lea virgádan Anja Somby sámi buohccidivššároahpu prošeaktajođiheaddjin. Sus šaddá guovddáš rolla oahpu ásaheamis ja illuda bargat iežas váibmoáššin.
- Illudan juo hui sakka bargat sámi buohccedivššároahpuin. Mun lean juo smiehttagoahtán bargguid birra. Dat han lea leamaš mu váibmoáššin guhka. Sihkkarit dan rájes go ieš gergen buohccidivššároahpuin, Somby muitala.
Somby válddii buohccidivššároahpu Sámi allaskuvllas man dalá Finnmárkku allaskuvlla lágidii. Oahppu lei dalle geahččalanprošeakta man Biret Bongo jođihii áigodagas 1998-2001. Dál galgá Somby ieš leat guovddážin mielde álggahit vuosttaš bistevaš sámi buohccidivššároahpu.
- Sámi buohccidivššároahppu lea hirbmat mávssolaš. Giella lea dieđusge dehálaš, muhto leat ollu eará ge oasit mat gáibidit fuomášumi. Lea hui miellagiddevaš go kultuvra ja árbevierut gávnnadit ođđa dieđuiguin, dutkamiin ja ođđamállet teknologiijain aiddo fal buohčadivššársuorggis, Somby áŋgirit čilge.
Lassin buohccidivššárohppui lea Sombys maid mastergráda psyhkalaš dearvvašvuođas.
Oahppu álgá 2021s
Goahtejođiheaddji Marit Meløy lea duhtavaš go Somby lea váldán vuosttá virggi.
- Dearvvašvuohta lea Sámi allaskuvlii ođđa ja dehálaš suorgi, ja leange hui duhtavaš go oažžut nana čeahpes fágaolbmo virgái, Meløy lohká.
Sámi buohccidivššároahppu lea ovttasbargu gaskal Sámi allaskuvlla ja Romssa Universitehta. Oahppu galgá plána mielde álggahuvvot ođđajagis 2021s ja lea ollu maid ferte ráhkkanit ovdal dan. Sámi allaskuvla lea verddeásahus ja oahppu lágiduvvoge doppe. Dasa lassin galgá Sámi allaskuvla fállát oahppoosiid sámi servodat- ja kulturmáhtus. Tromssa universitehtas ges lea oahpu obbalaš fágalaš ovddasvástádus.
