Muhtun áššiid lea buorre čoavdit ovdal go oahppu álgá. Oahpu álgima oktavuođas lea dávjá ollu mii dáhpáhuvvá, ja ollu áigi sáhttá sestojuvvot jus muhtun áššit leat čovdojuvvon ovdal oahpu álgima. 

Dáppe gávnnat muhtun praktihkalaš dieđuid mat leat ávkkalaččat dutnje gii leat ođđa studeanta dahje leat váldán vuostá oahpposajifálaldaga Sámi allaskuvllas. Dáppe gávnnat maiddái liŋkkaid Sámi allaskuvlla guovddáš neahttasiidduide. 

Orrunsadji ja/dahje mánáidgárdesadji

• Orrunsadji

Sis - Finnmárkku studeantaovttastusas (SSO) lea vejolaš láigohit ásodaga studeanttahaddái. SSO`as leat oktiibuot 42 iešguđetlágan ásodaga mat leat várrejuvvon Sámi allaskuvlla studeanttaide. Sáhtát láigohit ásodaga sihke guhkit ja oanehisáigái. Lea ovdamearkka dihte vejolaš láigohit orrunbáikki dalle go lea deaivvadanvahku. Eanet dieđuid viessobálvalusa birra gávnnat dáppe: https://ssosamas.no/bolig/

• Studeantamánáidgárdi

Studeanttaide geain leat mánát geat dárbbašit mánáidgárdesaji, leat sihkkarastojuvvon mánáidgárdesajit olles studeren áigodahkii. Lea vejolaš fitnet mánáidgárdesaji oanehisáigái go leat ovdamearkka dihte deaivvadeamit. Eanet dieđuid mánáidgárdesaji birra gávnnat dáppe: https://ssosamas.no/barnhage/

Individuála heiveheapmi earenoamáš dárbbuide

Studeanttain geain leat earenoamáš dárbbut ja doaibmahehttejumit, lea riekti oažžut heiveheami studeantaárgabeaivvis ja eksámenii sihkkarastindihte dásseárvosaš oahppovejolašvuođaid. 

Heiveheapmi sáhttá ovdamearkka dihte oainnu ja/dahje gulu dihte, lihkadanhástalusaid ektui, lohkan- ja/dahje čállinváttisvuođaid geažil, kronalaš vigiid ektui (ástmá, allergiija, diabetes/sohkardávda, váibmo – ja varrasuotnavihki, epilepsiija jna.), psyhkalaš váttisvuođaide, kognitiiva doaibmahehttejumiid ektui ja maiddái sosiála váttisvuođaid geažil. 

Jus dárbbašat heiveheami, de váldde oktavuođa oahppohálddahusain nu árrat go vejolaš ovdal go oahppu álgá. De beassat gulahallat dan birra ahte makkár čovdosiid sáhttit gávdnat du dárbbuide.

Oahppohálddahusain sáhtát váldit oktavuođa juogo oktasaš e -boasta bokte oahppohalddahus@samas.no dahje fitnat vuostáiváldimis Diehtosiidda vuosttaš gearddis. 

Lohkanbadjedivvaga máksin

Lohkanbadjedivat galgá máksojuvvon ovdal go beasat registreret iežat studeantan ja nu oažžut studeantavuoigatvuođaid. Máksindieđuid gávnnat StudentWebas, dat ii sáddejuvvo boastta ii ge e-boastta mielde. Don logget sisa StudentWebai seamma geavaheddjiin ja beassansániin go mainna ohcet ohppui Søknadswebas. 

Fuomáš: Studeanttat geain ii leat Norgga personnummár fertejit váldit oktavuođa oahppohálddahusain oažžundihte fiktiiva Norgga riegádannummára (geavaheaddjinamma) ja beassansáni.

Buot studeantattat mákset 400 NOK lohkanbadjedivvaga SSO:i ja ávnnasdivvaga Sámi allaskuvlii. Ávnnasdivvaga sturrodat vuolgá das makkár oahpus don leat, ja leat go ollesáiggestudeanta vai oasseáiggestudeanta. Máksináigemearri čakčalohkanbajis lea 01.09. ja 01.02. giđđalohkanbajis.

Studeantaovttastuslága bokte sáhttet studeanttat geat eai ása oahppoásahusa lahka, válljet máksit lohkanbadjedivvaga studeantaovttastussii mas leat fálaldagat studeanta orrunbáikki lahka. Fuomáš nai ahte jus don leat studeantan máŋgga oahppoásahusas, de it galgga dárbbahit máksit lohkanbadjedivvaga eanet go ovtta studeantaovttastussii. Váldoprinsihppa lea ahte mávssát lohkanbadjedivvága dan ásahussii gos anát bálvalusaid. Jus leat máksán lohkanbadjedivvága eará ásahussii, de sáddet duođaštusa oahppohálddahussii.

Studeantaregistreren

Go leat máksán lohkanbadjedivvaga ja máksu lea boahtán midjiide, de beasat registreret iežat studeantan. Dan dagat studentweb bokte. Fuomáš ahte sáhttá ádjánit moadde beaivvi ovdal mii oažžut máksindieđu báŋkkus ja ovdal dasto beasat registreret. 

Go leat registreren iežat studeantan, de sáhtát easka ráhkadit IT-konto, oažžut studeantaduođaštusa, čoavddagoartta ja stipeandda ja loana Loatnakássas.

IT konto ja IT veahkki

Buot studeanttat fertejit ráhkadit IT- konto Sámi allaskuvllas jus galget olahit buot bálvalusaid maid mii fállat, nugo omd. logget sisa dihtorii, čálihit, skánnet, beassat studeanta e-bostii jna. Ávžžuhit du ráhkadit IT – konto buori áiggis ovdal oahppu álgá vai beasat vuogádagaide dalle go oahppu álgá.

Dáppe oainnát mot ráhkadat IT – konto:  https://samas.topdesk.net/solutions/open-knowledge-items/item/KI%200134/no/

IT - support
Ávžžuhit muđui oahpásnuvvat min teknihkalaš čovdosiidda ovdal go oahppu álgá, nu go Office 365, Zoom, Wi-Fi, prentenbálvalusaide ja nu ain. Loga eanet IT – čovdosiid birra dáppe: https://samas.no/se/a/it-support

IT – veahkki 
Jus dárbbašat veahki IT – bálvalusaide, de sáhtát váldit oktavuođa Sámi allaskuvlla IT – supportain sin oktasaš e – boasta bokte support@samas.no dahje fitnat ovdakantuvrras Diehtosiidda boađáhagas.

Loatna ja stipeanda

Sámi allaskuvlla studeanttain lea vejolaš ohcat stipeandda ja loana earret eará Loatnakássas. Ohcamuša sáhtát sáddet ovdal go leat registreren iežat studeantan. Loatnakássas leat rutiinnat nu ahte stipeanda- ja loatna máksojuvvo dutnje easka go leat máksán lohkanbadjedivada ja registrerejuvvon studeantan. 

Sámi allaskuvllas manná automáhtalaččat diehtu loatnakássii go don leat dahkan buot maid galggat. Eambbo dieđuid ja ohcanskovi gávnnat Loatnakássa ruovttusiiddus: http://www.lanekassen.no/  

Geahča maiddái Sámedikkiid sihke Norggas, Suomas ja Ruoŧas leat go doppe stipeanddat alitoahpahussii.

Álggahanvahkku

Sámi allaskuvla lágida jahkásaččat álggahanvahkku. Álggahanvahkku lea earenoamážit heivehuvvon ođđa studeanttaide ja ávžžuhit buot ođđa studeanttaid searvat álggahanvahkku doaimmaide. Álggahanvahkku lágiduvvojit iešguđetlágan kursat, diehtojuohkimat, studeantaeahkedat ja muđui doaimmat studeanttaide mas oahpásnuvvan lea guovddážis.

Álggahanvahkku lágiduvvo Guovdageainnus borgemánu gaskamutto. Maŋŋil álggahanvahku álget oahput ja leat reaiddut ja soames áššit maid berret fuomášit:

Canvas

Canvas lea gulahallanreaidu gaskal oahpaheddjiid, studeanttaid ja oahppohálddahusa. Canvasii biddjojit visot dieđut oahpu birra, lohkanmearri ja muđui eará dehálaš dieđut. Geavaheaddjinamma ja beassansátni leat seamma go IT-konttos. Canvasii beasat go leat registrerejuvvon studeantan ja rahkadan IT-konto. 

Appa telefovdnii: Ávžžuhit muđui viežžat Canvas – appa mobiltelefovdnii. Appas oaččut seamma dieđuid go muđui oaččut dihtora bokte. Appas sáhtát maiddái oažžut “push – dieđuid” (ođđa dieđuid ja muittuhusaid), ja sáhttá maiddái doaibmat gulahallanreaidun oahppokoordináhtorin. Appa doaibmá sihke iOS ja Android vuogádagain.