Fágagoaðit

Sámi allaskuvllas leat guokte fágagoađi:

Goahti lea fágabargiid gulahallanorgána ja lea ráđđeaddi orgána jođihangoddái. Dan jođiha goahtejođiheaddji. Sámi allaskuvllas leat fágagoađit juhkkojuvvon fágasurggiid vuođul. Goahti árvala ja čađaha oahpuid ja dutkanprošeavttaid gođiid siskkobealde ja gođiid gaskka. 

Goahtejođiheaddjit ja studeantaáirasat leat mielde Dutkan ja oahppostivrras (DOS), mii lea Sámi allaskuvlla stivravuollásaš mearridanorgána.

Giela, duoji ja servodatdiehtagiid goahti

(Insititutt for språk, duodji og samfunnsvitenskap / Department of Language, Duodji and Social sciences)

Risten Länsman lea goahtejođiheaddji.

Dán goahtái gullet čuovvovaš oahput:

Giellaoahput:

  • Sámegiella praktihkkalaš diliin álgokurssat ja davvisámegiela lohkanbadjeoahppu (gealbuda beassat viidásabbot Sámi allaskuvlla oahpuide ja prográmmaide)
  • Sámegiela ja sámi girjjálašvuođa bachelor ja master
  • Sámegiella ja sámi girjjálašvuohta jahkeovttadat
  • Sámegiela ja sámi girjjálašvuođa doavttirgrádaprográmma 

Duodjeoahput:

  • Duoji ja hábmema bachelor ja Duoji master

Boazoealáhusoahput:

  • Boazoealáhus bachelor

Servodatfágaoahput:

  • Eamiálbmotfilosofiija ja Dieđalaš čállin ja guorahallan
  • Árbediehto-oahppu
  • Osku ja eallináddejupmi Sámis
  • Sámi kultur- ja servodatdiehtu 1 ja 2

Journalistihkkaoahput:

  • Sámi journalistihka bachelor ja Sámi jouranlistihka master álgoálbmotperspektiivvas

Manin lea dehálaš váldit dáid oahpuid?

  • Sámi servodat dárbbaša giellabargiid ja bargiid geat bures hálddašit sámegiela
  • Sámi servodat dárbbaša olbmuid geain lea alit oahppu duojis
  • Sámegiella sáhttá addit lassi bálkká ja karriearavejolašvuođaid
  • Vejolašvuohta šaddat sámegiela ja/dahje girjjálašvuođa dutkin
  • Boazodoallu ja servodat muđui dárbbaša olbmuid geain lea boazodoallogelbbolašvuohta alit dásis dihto fágasurggiid siskkobealde (jus, ekonomiija, ekologiija, hálddašeapmi jnv.)
  • Sámi servodat dárbbaša oahppan sámegielat journalisttaid
  • Eamiálbmotservodagat dárbbašit masterdási oahppan journalisttaid

 

Sámi oahpaheaddjeoahpuid goahti

(Insitutt for samiske lærerutdanninger / Departement of Sámi Teacher Educations)

Dán goađi jođiha John-Marcus Kuhmunen ja oahpaheaddjeoahput leatge váldooahput dás; 

Oahpaheaddjeoahput

  • Sámi vuođđoskuvlaoahpaheaddjeoahppu 1.-7. ceahki ja 5.-10 ceahki masteroahput
  • Sánu mánaidgárdeoahpaheaddjeoahppu

Manin lea dehálaš váldit dáid oahpuid?

  • Sámi mánáidgárddit ja skuvllat dárbbašit oahppan sámegielat oahpaheddjiid
  • Maiddái stuoraservodaga mánáidgárddiin ja skuvllain dárbbašit oahpaheddjiid geain lea gelbbolašvuohta sámegielas ja sámi kultuvrras