Rektor

Laila Susanne Vars (Iŋguna Susánna Elle-Márjjá Láilá Susánna) válljejuvvui Sámi allaskuvlla rektorin 2019 giđa. Sus lea gullevašvuohta Láhpoluobbalii, Guovdageainnu suohkanis, doppe son lea bajasšaddan ja doppe orrot su lagasolbmot. Laila Susanne lea láhkačeahppi ja sus lea PhD olmmošvuoigatvuođaid ja álgoálbmotvuoigatvuođaid suorggis. Son lei stipendiáhtta Romssá Universitehta- Norgga Árktalaš Universitehta Juridihka Fakultehtas 2004-2009 ja son lei vuosttaš sámi nissonolmmoš gii olahii juridihkalaš doavttirgráda jagis 2010. Son lea válljejuvvon ON álgoálbmotvuoigatvuođaid áššedovdilávdegotti láhttun (United Nations Expert Mechanism on the Rights of Indigenous Peoples- EMRIP) 2017-2020. EMRIP lea ON Olmmošvuoigatvuođaráđi áššedovdilávdegoddi ja addá rávvagiid ON miellahttostáhtaide álgoálbmotvuoigatvuođa áššiin. Laila Susanne lea badjel 20 jagi bargan álgoálbmotvuoigatvuođaid ovddidemiin sihke politihkalaččat, hálddáhuslaččat, sámiservviid bokte ja dutkama oktavuođas. Son lea Sámedikki ovddeš sadjásaš presideanta (2009-2013) ja ovddeš sámediggeáirras (2009-2017), ja son lea leamaš direktevra GÁLDU- Álgoálbmotvuoigatvuođaid gelbbolašvuođaguovddážis (2013-2017) ja fágadirektevra Norgga Olmmošvuoigatvuođaásahusas (NIM) (2017-2019). Son barggai Sámedikki hálddahusas 2001-2004 juridihkalaš ráđđeaddin Finnmárkkulága šiehtadallamiid oktavuođas, mas lei boađusin earet eará ođđa hálddašanorgána Finnmárkkuopmodat (FeFo) ásaheapmi ja Finnmárkkukommišuvnna ásaheapmi. Laila Susannes lea davvisámegiella eatnigiellan ja son orru Máttaluobbalis, Guovdageainnus iežas bearrašiin.

Laila Susanne Vars rektoráigodat lea 2019-2023, sadjásaš rektor lea Ylva Jannok Nutti.

Oktavuođadieđut:
E-poastta: Laila-Susanne.Vars@samiskhs.no
Telefonnummar: +47 453 97 700