Ovdal beasat čađahit eksámena, fertet:  

• registreren iežat eksámenii - iskka StudentWebas leat go dieđihuvvon daidda eksámeniidda maidda galggat
• ožžon dohkkehuvvot gáibádusaid beassat eksámenii mat bohtet ovdan oahppoovttadaga oahppoplánas (geahča 9. čuoggá vuolde).

Gáibádusat beassat eksámenii sáhttet leat omd. hárjehallamat, čálalaš barggut, máhppabarggut, raporttat, njálmmálaš ovdanbuktimat, kurssat, seminárat, joavkobarggut ja oassálastin oahpahussii.

• Gáibádusat árvvoštallojuvvojit dohkkehuvvon / ii dohkkehuvvon.
• Oaččut dieđu iežat oahppokoordináhtoris jus gáibádusat leat dohkkehuvvon, dábálaččat Canvasa bokte.
• Studeanta galgá sáhttit vuordit oažžut máhcahaga fágaoahpaheaddjis geatnegahtton bargguide.

Jus it leat čađahan geatnegahtton bargguid dahje doaimmaid:

• Jus studeanta ii leat ožžon dohkkehuvvot gáibádusaid beassat eksámenii, de ferte dábálaččat ođđasit čađahit oahpu nuppes go dat lágiduvvvo.
• Jus studeanttas lea dohkálaš ágga manin ii leat buktán dahje čađahan geatnegahtton barggu dahje searvan geatnegahtton oahpahussii, galgá jođáneamos lágiin, ja maŋemusat 5 beaivvi maŋŋel áigemeari dahje oahpahusa, buktit duođaštusa oahppohálddahussii.
• Čuovvovaš ákkat sáhttet adnot dohkálaš ággan: du dahje máná (vuollel 12 jagi) buozanvuohta, buozanvuohta/jápmin/lihkohisvuohta lagas bearrašis, militeara dahje siviila vearjogeatnegasvuohta, riektevihtanstevdnen, oassálastin álbmotválljejuvvon orgánain dahje orgánain mat gáibidit studeantarepresentašuvnna lága bokte, dahje eará earenoamáš ákkat.
• Studeanta gii sáhttá duođaštit ahte lea jávkan geatnegahtton oahpahusas dahje ii leat čađahan geatnegahtton bargguid dohkálaš ákkaid geažil, sáhttá oažžut ođđa sisabuktináigemeari dahje eará áiggi čađahit barggu, dahje eará bargguid maiguin buhtte jávkama.

Ane dán skovi buktit duođatusa: Doavtterduođaštusa dahje eará duođaštusa buktin

Verrošeapmi geatnegahtton bargguin

Verrošeami njuolggadusat Universitehta ja allaskuvlalágas § 12-4, ja Sámi allaskuvlla eksámen- ja loahpalaš árvvoštallama láhkaásahusas gustojit maid geatnegahtton bargogáibádusaide. 

Loga eanet verrošeami birra dáppe: Verrošeapmi

Váidin

Geatnegahtton bargguide gustojit seamma váidinvejolašvuođat go eksámenii. Studeanta sáhttá váidit:

• Geatnegahtton bargguid bohtosa (ii-dohkkehuvvon) jus bargogáibádusa sáhttá ođđasit árvvoštallat. Geahča eanet dáppe: Árvosáni váidin
• Formála meattáhusa. Geahča eanet dáppe: Formála meattáhusa váidin