Min birrasat konferánsii dieđiheapmi

Sámi allaskuvla lágida konferánssa 26.-27.10.23 mas lea namma Min birrasat - bistevaš ealáhusaid ja eallevaš birrasiid duovdagat Sámis. Konferánssa áigumuš lea geahččat ásahuvvon ja geahččaluvvon vugiid suodjalit guovlluid bisuhettiin báikkálaš ealáhus- ja  eallinlágiid oktanaga dainna ahte gáhttet máŋggabealat luonddubirrasiid.

- Sámis leat dássážii eanas vásihan luonddubirrasa suodjaleami mii lea vuolggahuvvon earáid ja amas vuohkái, nugo mat daid nugohčoduvvon naturreservahtaid bokte. Seammás dávjá dovdat dárbbu suodjalit eatnamiiddamet ja čáziideamet iežamet eavttuid ja stivrejumi mielde. Dán konferánssas iskat suodjaleami lágiidemiid, earret eará biosfearaguovlluid,  mat soaittáše buorebut heivet min guovlluide ja eallinlágiide. Erenoamáš dehálaš lea diet ášši dál go máilmmiviidosaččat lea biddjon mihttun eanet suodjalit luonddubirrasa ja bissehit sisabáhkkemiid. Movt sáhttit hutkat čovdosiid buorrin sihke luonddubirrasiiddamet ja eallinlágiidasamet? Mielde ságastallamii dáid birra leat bovden dutkiid, guovlohálddašeaddji olbmuid, politihkalaš ásahusaid, servviid ja guovlluid geavaheddjiid, muitala vuosttašamanueansa Mikkel Nils M. Sara.

Konferánsagielat leat sámegiella ja skandinávagielat, ja gielad gaskkas lea dulkon.

• Prográmma
• Dieđiheapmi - dieđihanáigemearri lea 16.10.23

Konferánsadivat lea kr 400,- mii gokča guokte lunšaboradeami. Konferánsa ii leat diŋgon idjadanbáikki, ii ge mávsse gaskabeivviid ja idjadeami.

Bures boahtin!