Sámi hálddašansuohkaniid sátnejođiheaddjit čoahkkanan Sámi allaskuvllas

Odne lei rektor Liv Inger Somby bovden sámi hálddašansuohkaniid sátnejođiheddjiid čoahkkinastet Sámi allaskuvllas.

Ulbmil čoahkkimiin lei geahččat vejolaš ovttasbargovugiid mat sáhtášii gokčat sámi servodaga dárbbuid. Áššelisttus lei maiddái ságastallan movt vuoruhit oahpposuorggi mat leat relevánta sámi álbmogii, ja čohkket dieđuid makkár dárbbut leat suohkaniin. Bođii maid sávaldat ahte Sámi allaskuvla lágida čoahkkima jahkásaččat.  

Oassálastit čoahkkimis ledje Jon Erland Balto, Deanu gieldda sátnejođiheaddji, Jo Inge Hesjevik, Porsáŋggu gieldda sátnejođiheaddji, Elle Mari Dunfjell Oskal, Guovdageainnu suohkana várresátnejođiheaddji, Mathis Nilsen Eira, Kárášjoga gieldda várresátnejođiheaddji ja Berit Ranveig Nilssen, Unjárgga gieldda sátnejođiheaddji.

Mii giitit čoahkkima ovddas ja illudit ovttasbargat ain viidáset!