Álggahit sámi mánáidgiela dutkiid fierpmádaga
Sámi allaskuvla ja UiT Norgga árktalaš universitehta čohkkejit sámi mánáidgiela dutkiid Romsii cuoŋománu 20.–21. beivviide 2015.
Deaivvadeami ulbmil lea álggahit davviriikkalaš fierpmádaga dutkiide geat guorahallet sámi mánáid giellaoččodeami. Dasa lassin dutkit muitalit deaivvadeamis iežaset dutkamušaid birra.
Sáhkavuoruid doallaba earret eará doavttirgrádastipendiáhtat Inga Lill Sigga Mikkelsen ja Ritva Nystad. Soai muitaleaba julevsámegiela sátneortnega oččodeamis ja davvisámegiela biehttalancealkaga oččodeamis. Eará logaldallit leat Mikael Vinka ja David Kroik Ubmi universitehtas, Carola Kleemann, Biret Ánne Bals Baal ja Kristine Bentzen UiT Norgga árktalaš universitehtas ja Johanna Johansen Ijäs Sámi allaskuvllas. Sáhkavuorut dutkanbargguid birra leat rabas buohkaide.
Sámi allaskuvlla Gielladieđagoađi dekána Mai Britt Utsi lea hui duhtavaš dainna ahte Sámi allaskuvla, Romssa universitehta ja Ubmi universitehta ovttasbarget sámi mánáid giellaoččodeami dutkamiin ja álggahit dasa fierpmádaga. Lea hui dehálaš ahte dán suorggi dutkit miehtá Sámi besset lonuhit dieđuid iežaset dutkamušain.
Deaivvadeapmi lea UiT Norgga árktalaš universitehta Teoriijafágagárdimis, viesus 1, njealját gearddis, lanjas TEO-H1 1.441.
Eambbo dieđuid addet
Johanna Johansen Ijäs, tlf. 78 44 85 19 ja 977 56087,
Biret Ánne Bals Baal, tlf. 77 64 67 42 ja 905 47317 ja
Kristine Bentzen, tlf. 77 64 66 65 ja 922 60289.
