Sámi allaskuvla lágida gaskariikalaš sámi ja eamiálbmoga oahpahuskonferánssa. Ulbmilin lea lonohallat vásáhusaid oahpahusa ja dutkama oktavuođas. Go lonohallat ja juogadit vásáhusaideamet ja dutkanbohtosiid, de leat dat doarjagin ja vuođđun pedagogalaš jurddašeapmái, ja sáhttet leat ávkkin mánáidgárddiid, skuvllaid, ja alitoahpahusa árgabeaivvi sámáidahttimis ja dekoloniseremis.   

Konferánssa fáttát leat: 

• Sámi ja eamiálbmoga girjás árvovuođđu pedagogalaš jurddašeamis, geavadagas ja oahpaheaddjivuođas  

• Guoddevaš ovdáneapmi  áddejupmi ja geavadagat sámi ja eamiálbmot birgemis 

• Sámi- ja eamiálbmotmánáid ja oahppiid  identitehta, resiliensa ja vuoigatvuođat 

• Seanadeami sajádat ja geavadagat oahpahussuorggis 

Buresboahtin  oahpaheaddjit, bargit, jođiheaddjit buot oahpahusa dásiin ja buohkat geat barget sámi- ja eamiálbmot mánáiguin ja nuoraiguin dahje sin guoski áššiiguin. Buresboahtin studeanttat ja dutkit.  Sávvat gullat din ovdanbuktimiid ja vásáhusaid dáin fáttáin.  Mii  ávžžuhit várret áiggi konferánsii ja boahtit lonohallat iežadet vásáhusa oahpahusas  ja dutkamis. Buresboahtin ovttastallat ja juogadit!