Ohcanáigemearri oahpuide láhkonišgođii
Sámi allaskuvllas álget ollu oahput čakčat, ja maidda lea ohcanáigemearri cuoŋománu 15. beaivvi. Leat sihke ollesáigge masteroahput, bacheloroahput, lohkanbadjeoahput, joatkkaoahput oahpaheddjiide ja oanehit kurssat. Máŋggaid kurssaid ja lohkanbadjeoahpuid lea vejolaš lohkat seammás go leat barggus, jus válddát virgelobi deaivvademiide ja logaldallamiidda.
Norgga Sámedikkis lea sierra stipeandaortnet sidjiide geat váldet oahpaheaddjeoahpuid dahje oahpaheddjiide geat váldet lassi oahpu sámegielas - loga eambbo stipeanddaid birra Sámedikki neahttasiiddus.
Jus dus leat jearaldagat oahpuid dahje ohcanvuogádaga birra, de váldde áinnas oktavuođa oahppohálddahusain, e-poasta: oahppohalddahus@samas.no dahje telefuvnna bokte 78 44 84 00.
Dieđut koronadilálašvuođa birra mii guoská oahpuid álgimii/čađaheapmái čakčalohkanbajis, boahtá dađistaga. Sámi allaskuvllas lea vejolaš čađahit oahpuid digitála oahpahussan.
