BA - Sierra kursa

SÁM 215 Sámi girjjálašvuohta: teoriijat ja metodat

  • Oahpu lágideapmi: Luohkkálatnja- dahje neahttaoahpahussan
  • Oahppokoda: SÁM 215
  • 10 oahppočuoggá
  • PDF icon  Prográmmaplána
  • Diibmoplána ja deaivvadanplána: TimeEdit 

Oahpu sisdoallu
Studeanta oahpásmuvvá girjjálašvuođa dutkama guovddáš teoriijaide ja metodaide ja heiveha daid dálá sámi girjjálašvuođa ja dan sierra šlájaid lohkamii.

Oahppoprográmma gullevašvuohta
Sámegiela ja sámi girjjálašvuođa bachelorprográmma.

Oahpahusgiella
Oahpahusgiellan lea davvisámegiella. Studeanta ferte maiddái máhttit lohkat eaŋgalasgielat fágagirjjálašvuođa.

Oahpahan - ja oahppanvuogit
Oahpahus lea omd. logaldallamiid, joavkobargguid, hárjehusaid, semináraid ja bagadallamiid hámis. DGT-veahkkeneavvut nugo Digigiisá adnojuvvojit guovddáš oahppan- ja oahpahanneavvun.

Gáibadusat beassat eksámenii
Oahpu áigge studeanttat lohket lohkanmeari teavsttaid (dieđalaš artihkkaliid ja girjjálašvuođa), maid birra ságastallojuvvo aktiivvalaččat sihke logaldallamiin ja DGT -luohkkálanjas. Oahpu áigge studeanttat galget čađahit guokte geatnegahttojuvvon ruovttubarggu, main nubbi lea teoriijačálus ja nubbi analyserenbargu. Ovttaskas čállosiid guhkkodat lea 3–4 siiddu.
Eaktun beassat eksámenii lea ahte fágaoahpaheaddji lea dohkkehan geatnegahtton bargguid.

Eksámen
Studeanta čállá 8–12 -siidosaš oktagaslaš fágalaš essea sámi girjjálašvuođas ja geahččala suokkardallat válljejuvvon fáttá iežas válljen heivvolaš teoriijain dahje metodain. Fáddá šihttojuvvo ovddalgihtii fágaoahpaheaddjiin ja bargu lea ruovttubargu.

Esseas árvvoštallojuvvojit fágalaš čehppodat, čálalaš giellageavaheapmi ja čehppodat hábmet čálalaš barggu. Eksámen árvvoštallojuvvo bustávvaárvosániiguin (A-F).

Filesize: 705 KB

Sisabeassangáibádusat

  • Dábálaš sisabeassangáibádusat alitoahpahussii. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla/logahaga) dahje realagelbbolašvuohta.
  • Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje guhkes amasgielladutkkus ja Ruoŧa gymnásaseatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohtaohccis lea, de ášši ovddiduvvo fágalaš árvvoštallamii ja meannuduvvo dán vuođul.
  • Dasa lassin sisabeassangáibádus lea Sámi girjjálašvuođa vuođđokursa (SÁM 106) dahje vástideaddji oahppu.