SÁÁL 1 Nordsamisk i praktisk læringssituasjon - innføringsstudium 1. del / SÁM Davvisámegiella praktihkalaš dilis - álgooahppu 1. oassi

Oahppu lea álggahalliide, geat eai máhte hupmat eaige čállit sámegiela.

Oahppu lea álgodásis. Maŋŋil dán oahpu sáhttá joatkit oahpuin SAAL2 Sámegiella praktihkalaš dilis - álgooahppu 2. oassi, SÁM-0104 Davvisámegiela álgokurssa 2. oassi dahje vástideaddji oahpuin. 

Oahpahus- ja eksámengiella: Sámegiela geavaheapmi deattuhuvvo ja geavahuvvo álggu rájes.

Oahpahusbáiki: Sámi allaskuvllas

Oahppočuoggá: 15 
Oahppoáigi: 1 lohkabaji
Oahpahan- ja oahppanvuogit: 

Studeanttaid aktiivvalaš searvan njálmmálaš hárjehallamiidda, joavkobargguide ja bagadallamii lea eaktun dasa ahte oahpahus ja oahppan lihkostuvvá. Vurdojuvvo nai ahte studeanttat barget iešheanalaččat oahpuin. 

Fágaoahpaheaddji lágida oahppandiliid dan láhkái ahte studeanttat besset oadjebas birrasis hárjehallat giela.

Mielstudeanttat ja movttiidahtti biras ja oahppanresurssat konkretiserenávdnasiiguin doibmet gielalaš buvttadeapmái doarjjan. 

Sámegielagat ja earenoamážit árbečeahpit, geat bivdojit searvat vissis temáid olis, dorjot studeanttaid háhkat gulahallangelbbolašvuođa. 

Studeanta duođašta iežas oahppama bargomáhpa bokte. Studeanta dokumentere gielalaš buvttadeami temáid oktavuođas omd. govvateavsttaiguin ja dialogaiguin. 

Oahpu čađaheami oktavuođas fállo bagadallan. Vuođđun bagadallamii lea studeanta reflekšuvdnalogga ja bargomáhppa.

Oahpu lágideapmi: oahpus leat intensiiva oahpahusvahkut oahppobáikkis.

  
Diibmoplána ja deaivvadanplána

Lohkanmearri Legantos

Kursadivat: 1200,- ávnnasdivat ja 500,- lohkanbadjedivat

Sisabeassangáibádusat:

Oahppu lea álggahalliide, geat eai máhte hupmat eaige čállit sámegiela. Forskrift om opptak til høyere utdanning vuođul álgogurssaide ja lohkanbadjeohppui ii gáibiduvvo oppalaš lohkangelbbolašvuohta jus ohccis lea sámi gullevašvuohta daid njuolggadusaid vuođul maid ásahus lea mearridan. 

Mearrádus guoská sidjiide geain lea sámi gullevašvuohta dáid čuoggáid vuođul

 • Sápmelaš gii lea massán giela, ja gii háliida oahppat sámegiela, dahje

 • Bargi almmolaš ásahusas sámegielat guovllus gii háliida oahppat sámegiela, dahje • Eará (omd. ohcci orru sámi bearrašis dahje sámi guovllus ja háliida oahppat sámegiela)

Ohccit geain ii leat oppalaš lohkangelbbolašvuohta fertejit čállit motivašuvdnareivve mas čilgejit guđe čuoggá vuođul ohcet oahpposaji.

Oahpu sisdoallu: 

Gulahallanbiras láhččojuvvo geavatlaš doaimmaide. Studeanttat sámástit gaskaneaset ja oahpaheddjiiguin barggadettiin. Guovddáš oahppotemát čatnasit sámi árbevieruide, birgejumiide ja duovdagiidda. Temáid láidestanbajilčállagat leat: 

Lagašbiras 

• Báikedoallu ja huksehusat 
• bivut
• servvoštallan ja bálvalusdilálašvuođat 

Birgen 

• áigedoahpagat (diibmu, jándor, mánut, jahkeáigodagat) 
• dálki, johtin ja dádjadeapmi 
• luonddunamahusat ja báikenamat
• sámi árbevirolaš birgenlágit 

Servodatlaš dilálašvuođat 

• dáidda, duodji, girjjálašvuohta, osku ja musihkka 
• sámegielat bargo- ja kulturásahusat 
• media ja eará gulahallangaskaoamit 

Cealkkaoahpa, hápmeoahpa ja jietnadatoahpa ovttageardáneamos vuođđoáššit gieđahallojuvvojit. Sátneluohkáid sojahanminstariid ja dássemolsašumi oahpahallat giehtalagaid geavatlaš doaimmaiguin iešguđet birrasiin. Jietnadatoahppa čatnasa lunddolaččat njálmmálaš giellageavaheapmái.

Gáibádusat beassat eksámenii

• Studeanta lea geatnegahtton čuovvut 80 % oahpahusas. 
• Oanehis njálmmálaš ovdanbuktimat searválaga joavkolahtuiguin (unnimustá 5 háve) iešguđet temáid oktavuođas olles luohkkái. 
• Reflekšuvdnaloggat mas árvvoštallá iežas gielalaš ovdáneami (unnimustá 3 logga ja juohke logga galgá leat sullii ½ siiddu) 
• Prošeaktabarggu (eanemustá 3 studeantta) searvan ja njálmmálaš ovdanbuktin (sullii 10 minuhta). Sámegiela geavaheapmi bargoproseassa vuolde deattuhuvvo. Prošeakta galgá vuođđuduvvot dasa mii lea relevánta oahpu sisdoalu ja máhtolašvuođa ektui. 
• Teaksta (1 siidu) mas čájeha iežas gielalaš máhtu. Prošeaktabarggu temá addá jođu čállit teavstta. 

Ovdal eksámendilálašvuođa vállje studeanta bargomáhpas osiid čájehanmáhppii 

• 1 dialoga dahje ságastallan joavkobarggu vuođul 
• 1 reflekšuvdnalogga 
• 1 temábargu 
• 1 teaksta prošeaktabarggu vuođul 

Barggut galget sisabuktojuvvot šihttojuvvon áigemearrái ja dohkkehuvvot fágaoahpaheaddjis.

Eksámen

Oktagaslaš njálmmálaš eksámen čájehanmáhpa vuođul mii bistá sullii 15 minuhta. Árvvoštallamis deattuhuvvo njálmmálaš giellageavaheapmi Eksámen árvvoštallo ceavzán dahje ii ceavzán.

Čiekŋudanvejolašvuođat

Sáhttá joatkit sámegiela álgooahpu 2. oassái. Sámegiela álgooahppu 1 ja 2 leat vuođđun álgit Davvisámegiela lohkanbadjeohppui.

Bargovejolašvuođat

Sámegiela hálddašanguovllu bargosajiin gáibiduvvo sámegiela máhttu. Dát oahppu lokte sámegiela gelbbolašvuođa sidjiide geat barget sámegielat bargosajiin ja ámmátolbmuide geat barget sámi guovlluin.

Oahppoplána sámegillii

Studieplan norsk

Curriculum english

Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no