Gurut ravddas: stud. Frank Ole Vars, stud. Mikkel Rasmus Logje, stud. Karen Marit Vars, stud. Aslak Anders Gaino, stud Berit Ellen Skum, Rector Evgenia I. Mikhailova North-Eastern Federal University, stud. Espen Andre Eira, Sámi allaskuvlla fágaoahpaheaddji Nils Dannemark, Northern Philology ossodatdirektevra Varvara Belolybskaya, hárjehallanoahpaheaddji Marina Olsen, ovttasbargoprošeavtta koordinator Antonina Vinokurova.

miessemánu 21. beaivi 2014

Studeanttat Yakutias

Sámi allaskuvlla 2. Jagi vuođđoskuvlaoahpaheaddjestudeanttat vulge sotnabeaivvi 18.5 oahppomátkái Nuorta- Sibiriai, Yakutskii, mii lea Ruoššas, Sakha republihka guovllus. Studeanttat leat mátkkošteame ovttas fágaoahpaheddjiin Nils Dannemark ja hárjehallanoahpaheddjiin Marina Olsen, ja jávket beannot vahku. Oahppomátki lea oassi ovttasbarggus mii Sámi allaskuvllas lea verddeásahusain North-Eastern Federal University ( NEFU). Sámi allaskuvla ja NEFU ovttasbargaba studeantalonohallamiin, gos Sámi allaskuvlla oahpaheaddjestudeanttat ja  NEFU oahpaheaddje- ja giellastudeanttat ovttasbarget, earret eará bachelorbargguid oktavuođas. Studeanttat galget guorahallat ja buohtastahttit guovttegielatvuođaáššiid Sámis ja Yakutias. “Šaddá somá oahpásmuvvat sin vuogádahkii ja oaidnit movt Yakutias lea dilli guovttegielalašvuođa hárrái; sihke gielaid stáhtusa ja skuvllaid organiserema. Dát lea nu buorre vejolašvuohta midjiide studeanttaide oaidnit eará báikkiid ja oahpásmuvvat eará kultuvrraide. Jáhkán dán šaddat duohta somás ja miellagiddevaš vásáhussan”, dadjá studeanta Mikkel Rasmus Logje.

Studeanttat geat mátkkošteame leat Mikkel Rasmus Logje, Frank Ole Vars, Aslak Anders Gaino, Espen Eira, Berit Ellen Skum ja Karen Marit Vars.