SÁÁL 2 Nordsamisk i praktisk læringssituasjon - innføringsstudium 2. del / SÁM Davvisámegiella praktihkalaš dilis - álgooahppu 2. oassi

Oahppu lea álgodásis. Maŋŋil dán oahpu sáhttá joatkit Davvisámegiela lohkanbadjeoahpuin, mii addá vuođu álgit Sámi allaskuvlla oahpuide main gáibiduvvo dihto sámegielgelbbolašvuohta. Oahppu ii dohkkehuvvo oassin Sámi allaskuvlla oahppoprográmmain maidda sámegielmáhttu lea oassin sisabeassangáibádusain

Dát oahppu lea joatkkaoahppu Davvisámegiella praktihkalaš dilis - álgooahpu 1.oassái.

Kursadivat: 1200,- ávnnasdivat ja 500,- lohkanbadjedivat

Oahpahus- ja eksámengiella: Sámegiela geavaheapmi deattuhuvvo ja geavahuvvo álggu rájes.

Oahppočuoggá: 15

Oahpahusbáiki: Sámi allaskuvllas
Oahppoáigi: 1
Oahpahan- ja oahppanvuogit: 

Studeanttaid aktiivvalaš searvan njálmmálaš hárjehallamiidda, joavkobargguide ja bagadallamii lea eaktun dasa ahte oahpahus ja oahppan lihkostuvvá. Vurdojuvvo nai ahte studeanttat barget iešheanalaččat oahpuin. 

Fágaoahpaheaddji lágida oahppandiliid dan láhkái ahte studeanttat besset oadjebas birrasis hárjehallat giela. 

Mielstudeanttat ja movttiidahtti biras ja oahppanresurssat konkretiserenávdnasiiguin doibmet gielalaš buvttadeapmái doarjjan. 

Sámegielagat ja earenoamážit árbečeahpit, geat bivdojit searvat vissis temáid olis, dorjot studeanttaid háhkat gulahallangelbbolašvuođa. 

Studeanta duođašta iežas oahppama bargomáhpa bokte. Studeanta dokumentere gielalaš buvttadeami temáid oktavuođas omd. govvateavsttaiguin ja dialogaiguin. 

Oahpu čađaheami oktavuođas fállo bagadallan. Vuođđun bagadallamii lea studeanta reflekšuvdnalogga ja bargomáhppa.

Oahpu lágideapmi:. Oahpus leat intensiiva oahpahusvahkut oahppobáikkis
  
Diibmoplána ja deaivvadanplána

Lohkanmearri Legantos

Sisabeassangáibádusat

 

 

Ohccis galgá leat sámegiela máhttu mii vástida Sámegiella praktihkalaš dilis – Álgooahppu 1. oassi oahppanjoksosiid. Oahppu lea álggahalliide ja daidda geain lea passiiva giella, muhto eai hálddaš njálmmálaš giela. 

Forskrift om opptak til høyere utdanning vuođul sámegiela álgokurssaide ja lohkanbadjeohppui ii gáibiduvvo oppalaš lohkangelbbolašvuohta jus ohccis lea sámi gullevašvuohta daid njuolggadusaid vuođul maid ásahus lea mearridan. Mearrádus guoská sidjiide geain lea sámi gullevašvuohta dáid čuoggáid vuođul:

• Sápmelaš gii lea massán giela, ja gii háliida oahppat sámegiela, dahje 
• Bargi almmolaš ásahusas sámegielat guovllus gii háliida oahppat sámegiela, dahje 
• Eará (omd. ohcci orru sámi bearrašis dahje sámi guovllus ja háliida oahppat sámegiela) 

Ohccit geain ii leat oppalaš lohkangelbbolašvuohta fertejit čállit motivašuvdnareivve mas čilgejit guđe čuoggá vuođul ohcet oahpposaji.

Oahpu sisdoallu: 

Gulahallanbiras láhččojuvvo geavatlaš doaimmaide. Studeanttat sámástit gaskaneaset ja oahpaheddjiiguin barggadettiin. Guovddáš oahppotemát čatnasit sámi árbevieruide, birgejumiide ja duovdagiidda. Temáid láidestanbajilčállagat leat: Lagašbiras 

• báikedoallu ja huksehusat 
• bivut
• servvoštallan ja bálvalusdilálašvuođat 

Birgen 

• áigedoahpagat (diibmu, jándor, mánut, jahkeáigodagat) 
• dálki, johtin ja dádjadeapmi 
• luondduvalljodagat
• sámi árbevirolaš birgenlágit 

Servodatlaš dilálašvuođat

• dáidda, duodji, girjjálašvuohta, osku ja juoigan 
• sámegielat bargo- ja kulturásahusat 
• media ja eará gulahallangaskaoamit 

Njálmmálaš gulahallamis giehtalagaid geavatlaš doaimmaiguin iešguđet birrasiin hábmejuvvojit álkis cealkagat. Dalle hárjehallat sátneluohkáid sojahanminstariid ja dássemolsašumiid ja guoskkahit dábáleamos suorggidemiid.

Gáibádusat beassat eksámenii

• Studeanta lea geatnegahtton čuovvut 80 % oahpahusas. 
• Rollaspeallu (eanemustá 3 studeantta) ráhkadeapmái ja njálmmálaš ovdanbuktimii searvan (sullii 10 minuhta). Sámegiela geavaheapmi bargoproseassa vuolde deattuhuvvo. Rollaspeallu sáhttá leat fearán, muitalus dahje máinnas dialogahámis. 
• Oanehis njálmmálaš ovdanbuktin olles luohkkái (sullii 5 minuhta) fáttás maid ieš lea válljen. 
• Reflekšuvdnaloggat mas árvvoštallá iežas gielalaš ovdáneami (unnimustá 3 logga ja juohke logga galgá leat sullii ½ siiddu) 
• Prošeaktabargui (eanemustá 3 studeantta) ja njálmmálaš ovdanbuktimii searvan (sullii 10 minuhta). Sámegiela geavaheapmi bargoproseassa vuolde deattuhuvvo. Prošeakta galgá vuođđuduvvot dasa mii lea relevánta oahpu sisdoalu ja máhtolašvuođa ektui. 
• Teaksta (1 siidu) mas čájeha gielalaš máhtu ja ahte máhttá hábmet álkis cealkagiid. Prošeaktabarggu temá addá jođu čállit teavstta. 

Ovdal eksámendilálašvuođa vállje studeanta bargomáhpas osiid čájehanmáhppii 

• 1 rollaspeallu dahje iežas njálmmálaš ovdanbuktima 
• 1 reflekšuvdnalogga 
• 1 temábargu   
• 1 teaksta prošeaktabarggu vuođul 

Barggut galget sisabuktojuvvot šihttojuvvon áigemearrái ja dohkkehuvvot fágaoahpaheaddjis.

Eksámen

Oktagaslaš njálmmálaš eksámen čájehanmáhpa vuođul mii bistá sullii 15 minuhta. Árvvoštallamis deattuhuvvo njálmmálaš giellageavaheapmi Eksámen árvvoštallo ceavzán dahje ii ceavzán.

Čiekŋudanvejolašvuođat

Go čađahat Davvisámegiella praktihkalaš dilis 2. oasi, de sáhtát joatkit Sámegiela lohkanbadjeohppui. Maŋŋel go leat čađahan Davvisámegiela lohkanbadjeoahpu, de lea dus sámegiela gelbbolašvuohta lohkagoahtit eará oahpuid Sámi allaskuvllas.

Bargovejolašvuođat

Sámegiela hálddašanguovllu bargosajiin gáibiduvvo sámegiela máhttu. Dát oahppu lokte sámegiela gelbbolašvuođa sidjiide geat barget sámegielat bargosajiin ja ámmátolbmuide geat barget sámi guovlluin.

Oahppoplána sámegillii

Studieplan norsk

Curriculum english

Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no