Girjealmmuheapmi “Sátnehámiid guođohit”
12.05.26 Árrangáttis
Sámi allaskuvlla professor Johanna Ijäs Gaup lea čállán oahppogirjji alitoahpo dásis “Sátnehámiid guođohit”
Dan oktavuođas bovdet girjealmmuheapmái kantiinas miessemánu 12. b dii 15-15:30. Mii guossohat gáhku ja gáfe, ja lea maid vejolaš oastit girjji doppe.
Girjji birra:
Dieđát go mii erohusaid lea dán guovtti cealkagis: ”Son lea bargan snihkkárin guokte jagi” ja ”Son lea bargan snihkkáriin guokte jagi”? Nabai dán guovtti cealkagis: ”Muhtun váhnemat lohket mánáidasaset juohke beaivve” ja ”Muhtun váhnemat lohket mánáideaset juohke beaivve”? Nabai dieđát go manne galggašii čállit ”namahis reive” ii ge ”namakeahtes reive”?
Dán girjji ulbmil lea fuomášuhttit movt sánit sojahuvvojit ja geavahuvvojit giellaoahpalaččat. Čilgehusaid lassin girjjis leat bargobihtát main beassá hárjehallat sániid sojaheami ja geavaheami. Girjjis leat maid bargobihtát riektačállináššiid birra, ja loahpas lea sátnelistu masa leat čohkkejuvvon sánit maid čállin dahje geavaheapmi sáhttá muhtumin dagahit váttisvuođaid.
Girji lea ráhkaduvvon universitehtaid ja allaskuvllaid gielladikšunoahpahusa várás, muhto oasit heivejit maiddái earáide geat háliidit oahpásnuvvat davvisámegiela čállinrávvagiidda.