Sádde abstrávtta dáppe 
Áigemearri sáddet 31.03.2026

Konferánssas lágiduvvojit bálddalas sešuvnnat 

Dollagátteságastallan – Sámi ja eamiálbmot pedagogihkka ovdavázzit

Jus dus lea vásáhus árbevirolaš máhttu ovddosguvlui fievrrideamis, máhttu ja vásáhus sámegielat dahje eamiálbmot oahpahussuorggis, buresboahtin juogadit vásáhusaid, jurdagiid ja máhttu dán láidestuvvon dollagátteságastallamii. Sádde sisa 2–5 cealkkaga das man birra háliidat ságastit. Konferánssa lávdegoddi sávvá máŋggabealat ságastallanfáttáid.

Oanehaš ovdanbuktimat mánáidgárddi ja skuvlla árgabeaivvis

Mánáidgárde- ja vuođđoskuvlaoahpaheaddji, mánáidgárdebárgit dahje rektor – don gii háliidat juogadit iežat buriid bargovugiid earáiguin. Dán sešuvdnii sávvat ovdanbuktimiid mat čalmmustahttet árgabeaivvi doaimmaid. Dat sáhttet leat joavkku-, luohkká-, dahje ásahusrutiinnat mat gusket árgabeaivvi, dahje doaimmat mat galget nannet sámi ja eamiálbmot árbevirolaš máhttu, sámegiela dahje eamiálbmotgiela oahppama, dahje eará fágaid oahpahusa sámegillii dahje eamiálbmotgillii. Sádde sisa oanehaš 2-5 cealkkagovvádusa makkár doaimma háliidat ovdanbuktit ja juogadit earáiguin. Dán sešuvnnas doallat 15-minuhtta ovdanbuktimiid, ja maŋŋil juogadit vásáhusaid ovdanbuktimiid vuođul.

Hutkás sámi ja eamiálbmot mánáidgárde- ja vuođđoskuvlaoahpaheaddjit 

Mánáidgárde- ja vuođđoskuvlaoahpaheaddjit rahkkádit ovttas mánáiguin ja ohppiiguin olu materiála oahpahusa oktavuođas. Dán sešuvdnii sávvat ovdamearkkaid dákkár ovttas buvttaduvvon materiálas, mo dat leat ráhkaduvvon ja makkár pedagogalaš ja fágalaš jurdda materiála duogábealde lea. Sávvat maiddái vásáhusaid dákkár proseassaid birra. Sávvat dán sešuvnna ovdanbuktimat doibmet inspirašuvdnan eará oahpaheaddjiide ja -oahpaheaddjestudeanttaide.  Sádde sisa 2-5 čealkkagovvádusa das makkár materiála áiggut čájehit, makkár formáhtas dat lea ja mo háliidat dan ovdanbuktit. Dán sešuvnnas doallat 15-minuhtta ovdanbuktimiid.

Árbevirolaš ja estehtalaš bottut 

Mii bovdet du fállat árbevirolaš ja estehtalaš bottoža earáide.  Sádde sisa 2–5 cealkkaga, mas bottoža fáddá ja ovdanbuktinvuohki čilgejuvvo. Konferánssas dollo 30 minuhtta bottoš.

Poster- ja filbmačájáhus

Sávvat buresboahtin poster- ja filbmaovdanbuktimiid mat vástidit konferánssa ulbmilii ja fáttáide. Sádde sisa abstravtta, mas fáddá, rámmát, designa ja bohtosat leat čilgejuvvon. Abstravtta guhkodat sullii 200 sáni. Konferánssas čájehit postera dahje filmma čájáhusas, ja dollo 10 minuhtta ovdanbuktin mas jearaldagat ja ságastallamat leat oassin. 

Dieđalaš ovdanbuktimat

Sádde sisa abstrávtta; konferánssas dollo 20 minuhtta ovdanbuktin, mas 5 minuhtta sáhttá geavahuvvot jearaldagaide ja ságastallamii. Abstrávtta guhkodat sullii 200 sáni. Buresboahtin erenomážitge dutkan- ja ovdánahttinprošeavttaid ovdanbuktimiid mat čatnašuvvet konferánssa fáttáide. Sáhtát ovdanbuktit gárvves dutkanbohtosa, dutkama mii lea jođus, dahje dutkanjurdagiid.

Konferánsagielat 

Konferánsagielat leat sámegiella, eŋgelasgiella ja davviriikalaš gielat. Mii sávvat ahte sámegielat logaldallit geavahit sámegiela. Logaldallamat váldokonferánsalanjas dulkojuvvojit.