Buohcci eksámenis dahje eará jávkan? 

Maid galggat dahkat jus leat buohcci eksámenis dahje jus čuožžila eará fáhkkadilli? 

Jus leat buohcci eksámenbeaivvi dahje eksámenáigodagas dahje dus lea eará dohkálaš ágga, de fertet buktit dokumentašuvnna (doavtterduođaštusa dahje sullásačča). 

• Duođaštusas ferte boahtit ovdan ahte jávkan guoská eksámenbeaivái dahje -áigodahkii 

• Dákko buvttet duođaštusa: Doavtterduođaštusa dahje eará duođaštusa buktin

• Áigemearri: 5 beaivvi maŋŋel eksámenbeaivvi dahje sisabuktináigemeari 

• Jus it buvtte dohkálaš duođaštusa áigemearrái, de registrerejuvvo ahte don leat atnán ovtta eksámengeahččaleami. Don sáhtát oktiibuot golbmii geahččalit váldit eksámena. Dalle sáhtát ohcat váldit ođđa eksámena oahpus. Dábálaččat beasat dan váldit nuppes go eksámen lágiduvvo oahpus.  

• Jus leat buktán dohkálaš duođaštusa, de dus lea vuoigatvuohta oažžut váldit maŋiduvvon eksámena.  

• Jus leat buktán dohkálaš duođaštusa ruovttueksámenii, de sáhttá oahppohálddahus juolludit dutnje gitta 48 liigediimmu. Váldde oktavuođa oahppohálddahusain ovttatmano telefovnna dahje e-boasta bokte: eksamen@samas.no  

• Máhppaárvvoštallama dahje guhkit áiggi bargguid sisaaddima olis ferte fágaovddasvástideaddji árvvoštallat guhkidit áigemeari goappáge dáfus ovttasráđiid oahppohálddahusain. 

Maŋiduvvon dahje ođđa eksámena ozat váldit dáinna skoviin: Dieđiheapmi maŋiduvvon, geardun- dahje ođđa eksámenii  

Mii lea dohkálaš jávkan eksámenis? 

Dohkálaš jávkan ferte dokumenterejuvvot. Ovdamearkkat dasa mii rehkenasto dohkálaš jávkamii lea: 

• Iežat buozanvuohta, dahje máná/muhtin eará geasa dus lea fuolahusovddasvástádus buozanvuohta 

• Jápmin lagas bearrašis 

• Máná oažžun dahje áhpehisvuohta 

• Gohččun almmolaš eiseválddiin mii hehtte du searvama, omd. militeara bálvalus, diggeášši, politihkalaš ovddasteapmi álbmotválljejuvvon orgánas  

Mii ii lohkko dohkálaš jávkamin ja mii dasto ii atte vuoigatvuođa čađahit maŋiduvvon eksámena: 

• eksámenballu, oađđinváttisvuođat 

• johtolatmaŋŋoneapmi 

• priváhta mátkkit  

• buozanvuohta ovdal eksámena dahje eksámenráhkkananáiggis. Jus guhká leat buohcan, de árvvoštala ohcat permišuvnna ohpus.  

Áhpehisvuohta 

Áhpehis studeanttain lea Universitehta- ja allaskuvlalága § 10-6 mielde vuoigatvuohta oažžut maŋiduvvon eksámena jus eksámendáhton lea gaskkal golbma vahku ovdal riegádahttináiggi ja guhtta vahku maŋŋel riegádahttima. Nuppi váhnemis lea vuoigatvuohta oažžut eksámena maŋiduvvot jus eksámenáigi lea gaskkal riegádahttima ja guokte vahku maŋŋel riegádahttima.