Jus dus ii leat vejolašvuohta čuovvut oahpahusa dahje váldit eksámena ovtta áigodagas, dahje jus háliidat váldit bottu oahpus, de sáhtát ohcat permišuvnna. Dus sáhttá leat vuoigatvuohta oažžut permišuvnna oahpus jus don man nu sivas hehttejuvvot oassálastimis ohppui, ovdamearkka dihti máná oažžuma, buozanvuođa, militeara bálvalusa dahje luohttámušdoaimma geažil studeantapolitihkalaš dahje álbmotválljejuvvon orgánain.

• Permišuvnna sáhtát ohcat olles lohkanbadjái dahje olles oahppojahkái.
• Jus dus lea luohttámušdoaibma studeantapolitihkalaš dahje álbmotválljejuvvon orgánas, sáhttá dus leat vuoigatvuohta oažžut permišuvnna dihto vahkuide dahje beivviide.

Ná ozat permišuvnna:

• Oza permišuvnna dáinna skoviin: Ohcanskovvi: Permišuvdna dahje oasseáiggi oahppu
• Bija mielddusin dohkálaš duođaštusa mii duođašta du vuoigatvuođa oažžut permišuvnna. Dat sáhttá leat omd.
  • Doavtterduođaštus dahje sullasaš
  • Gohččun militearabálvalussii
  • Duođaštus luohttámušdoaimmain ja/dahje álbmotválljejuvvon orgána čoahkkindáhtoniin
• Permišuvnna sáhtát ohcat váikko goas oahppojagis.
• Studeanta sáhttá ohcat permišuvnna olles lohkanbadjái, oahppojahkái, dahje muhtin oassái lohkanbajis.
• Danin go buot oahput eai lágiduvvo jeavddalaččat, sáhttá muhtin oktavuođain leat hástaleaddji sáhttit joatkkit oahpuin njuolga maŋŋel permišuvnna. Danin ávžžuhit váldit oktavuođa oahppohálddahusain ovdal ozat permišuvnna, vai sáhtit plánet viidáset progrešuvnna ja beassat čielggadit makkár váikkuhusat permišuvnnas leat du progrešuvdnii. 

Riegádahttinpermišuvdna

• UA-lága § 10-6 mielde lea studeanttas vuoigatvuohta oažžut riegádahttinpermišuvnna máná oažžuma ja dikšuma geažil.
• Maŋŋel permišuvnna lea studeanttas vuoigatvuohta joatkit oahpuin seamma dásis go lei ovdal permišuvnna.
• Oahppoásahus galgá láhčit dili nu ahte studeanttat geat leat mánnáoažžunpermišuvnnas sáhttet joatkit oahpuin nu jođánit go vejolaš maŋŋel permišuvnna.
• Dáppe eanet dieđut: Vuordime máná? | Sámi allaskuvla

Eará permišuvnnat

• UA-lága § 10-7 mielde lea studeanttain vuoigatvuohta oažžut permišuvnna oahpus militeara bálvalusa geažil (gč. suodjaluslága § 17 ), luohttámušdoaimmaid geažil studeantapolitihkalaš dahje álbmotválljejuvvon orgánain, dahje eará earenoamáš ákkaid geažil.
• Studeanttaide galgá juolluduvvot permišuvdna nu guhka go dárbu lea.
• Permišuvdnaáigodagas leat studeanttas ain studeantavuoigatvuođat ja vuoigatvuohta váldit eksámena.

Jávkan luohttámušdoaimmaid oktavuođas

• Jus studeanttas lea luohttámušdoaibma studeantapolitihkalaš dahje álbmotválljejuvvon orgánain, de dat rehkenasto dohkálaš jávkamin.
• Permišuvdna/ dohkálaš jávkan ii galgga goitge mielddisbuktit ahte fágalaš gáibádusat ohppui vuoliduvvojit (gč Prop. 126 L (2022–2023) čuoggá 14.7.2). Dat mearkkaša ahte vaikko studeanttas lea dohkálaš jávkan, de ferte ain čađahit bargogáibádusaid/gáibádusaid beassat eksámenii mat bohtet ovdan oahppoplánas, ja hárjehallama.
• Studeanta ii beasa gáibádusain beasat eksámenii, muhto sáhttá oažžut ođđa sisabuktináigemeari dahje eará áiggi čađahit barggu, dahje sáhttá oažžut eará bargguid maiguin buhtte jávkama.
• Permišuvdna / dohkálaš jávkan ii galgga lohkkot jávkamin oahpuin gos lea dihto % oassálastingáibádus.
• Fuomáš ahte eksámenat eai sirdojuvvo dahje viiddiduvvo jávkama geažil. Jus studeanttas lea permišuvdna/ dohkálaš ágga jávkamii, de sus lea vuoigatvuohta čađahit maŋiduvvon eksámena.

Oahppovuoigatvuohta guhkiduvvo permišuvdnaáigge

• Du oahppovuoigatvuohta guhkiduvvo seamma guhká go don leat permišuvnnas. Dat gusto maiddái jus don válljet máksit lohkanbadjedivvaga, registreret iežat studeantan, čuovvut oahpahusa ja váldit eksámena.
• Jus dus leat eksámenat mat leat báhcán gaskii, ja dus lea vuoigatvuohta čađahit maŋiduvvon dahje gearduneksámena de guhkiduvvo maiddái áigi (gč. Sámi allaskuvlla eksámen- ja loahpalaš árvvoštallama láhkaásahusa §7-4) go dus lea vejolašvuohta dieđihit iežat eksámenii seamma guhka go permišuvdna bistá.