Ođđasat
- Logi diŋgga maid fertet diehtit ovdal njuiket studeantaeallimii
- Go leat álgime ohppui
- Báikkálaš sisaváldima ohcanáigemearri guhkiduvvon
- Gudnebálkkašumit Sverre Fjellheimii ja Inga Mortenssonii
- Fas vejolaš ohcat oahpuide
- Historjjálaš doalut Sámi allaskuvllas
- Stivraláhttut válljejuvvon ja nammaduvvon
- Anja Somby virgáduvvon sámi buohccidivššároahpu prošeaktajođiheaddjin
- Sámi allaskuvlla studeanta lea juo ožžon bargofálaldagaid
![](https://samas.no/sites/default/files/styles/hovedbilde/public/field/image/dscf3518.jpg?itok=Sc1s4A06)
Stuora beroštupmi Sámi oahpahuskonferánsii
Sámi oahpahuskonferánsa lea guktii maŋiduvvon korona pandemiija geažil ja disdaga de viimmat álggahuvvui golbma beaivásaš konferánsa. Konferánsa lea ovttasbargu gaskal Sámi allaskuvlla ja Sámedikki, mas prošeakta Sámi mánát ođđa searvelanjas (SáMOS-prošeavtta) lea vuolggasadji.
Konferánssa ulbmil lea beassat lonohallat eamiálbmogiid oahpahanvásáhusaid ja buktit oidnosii sámi mánáidgárddiid, skuvllaid ja alitoahpahusa, ja maiddái internationála eamiálbmotoahpahusa vásáhusaid ja muitalusaid.
- Konferánsa lea dehálaš gulahallan- ja deaivvadanarena oahpaheaddjiide ja bargiide geat barget mánáidgárddiin, vuođđoskuvllain ja joatkkaskuvllain, ja muđui maid giellabargiide. Min álgojurdda lea leamaš čohkket buohkaid ovtta dáhki vuollái ja dáinna lágiin hukset sámi oahpaheddjiid ja mánáidgárddeoahpaheddjiid oahppobálgá go beassat gelbbolašvuođa ja eallinagi vásáhusaid juogadit, muitala Sámi allaskuvlla prorektor ja lágidanjoavkku jođiheaddji Ylva Jannok Nutti.
Konferánsii lei álggos sadji 80 oasseváldái korona pandemiija eastadan doaimmaid dihte. Maŋŋel go Norgga ráđđehus ložžii korona eastadandoaimmaid, de mearridii lágidanjoavkku lasihit saji konferánsii ja 125 oaseválddi dieđihedje konferánsii. Dainna lea lágidanjoavku hirbmat duhtavaš.
- Mii mearrideimmet lasihit konferánssa sajiid go olbmuin lei stuora beroštupmi searvat konferánsii. Mii leat ožžon máhcahemiid oasseváldin ahte sii leat váillahan dakkár gulahallanarena oahpahedje- ja mánáidgárddesuorggis. Dát dieđusge muitala midjiide ahte lea hirbmat dehálaš ahte oasseváldit miehtá Sámi leat beassan čoahkkanit Diehtosiidii, loahpaha Jannok Nutti.
Govas lea Sámi allaskuvlla prorektor ja lágidanjoavkku jođiheaddji.
Govven: Ánne Kátjá Gaup/Johtti Productions