golggotmánu 19. beaivi 2021

Nuvttá bileahtat Inga Juuso – Tribute konsertii Sámi allaskuvlla studeanttaide

Giellavahkku oktavuođas lágiduvvo Inga Juuso – Tribute konsearta bearjadaga 29.10.21 Sámi allaskuvllas Guovdageainnus. Sámi allaskuvlla studeanttat ožžot nuvttá bileahta. Dieđit ovdal duorastaga 28.10.21.

Jagi 2000 rájes ja gitta Inga Juuso eret vádjolii 2014:s leat čoggon olu jietnabáttit Inga Juusos, mat dássážii leat orron lihkatkeahttá. Jietnabáttit čájehit su erenomáš attáldagaid fátmmastit iešguđetlágan musihkkaovdanbuktimiid, muhto seammás doalahit luođi fámu musihka guovddážin. 

Inga Juuso bearraša lobiin leat jietnabáttit dál dahkkon Inga Juuso – Tribute nammasaš skearrun. Skearrus deaivvada Inga Juuso luohti Patrick Shaw Iversena musihkain. Dál beasat gullat go Iŋgá-Máret Gaup-Juuso ovdanbuktá su luđiid musihkkariiguin Patrick Shaw Iversen, Roger Ludvigsen, Stein Austrud, Peter Baden, Svein Schultz, Rune Arnesen ja David Solheim.

Dieđiheapmi

Jus leat studeanta ja háliidat nuvttá bileahta konsertii, de sáddes e-boastta diehtojuohkin@samas.no  ovdal duorastaga 28.10.21.

Konseartalágideapmi:

  • Dii 20:00 rahpasit uvssat.
  • Dii 21:00 álgá konsearta. 
  • Báiki lea rabas gitta 00:00 rádjái. 

Fuomáš ahte lágideamis lea 18 jagi ahkemearri.

Jus it leat studeanta, de sáhtát oastit bileahtta dáppe:

Bileahttahaddi lea kr 200,- 

Lágideapmi lea Sámi musihkkafestivála, Sámi allaskuvlla ja Sis-Finnmárkku studeanttaid ovttastusa (SSO) ovttasbargu. Sámediggi lea dorjon lágideami.