guovvamánu 19. beaivi 2020

Sámi allaskuvlla prorektor oažžu ovddasvástádusa oahppokvalitehtii

Sámi allaskuvlla rektor Laila Susanne Vars lea sierra fápmudusa bokte addán ovddasvástádusa prorektorii Ylva Jannok Nuttii allaskuvlla oahpahuskvalitehta bargguide.

- Sámi allaskuvlla oahpuin galgá alla kvalitehta. Sámi nuorat galggašedje válljet Sámi allaskuvlla dan vuođul ahte oahpuin lea nanu fágalaš vuođđu, ja go min skuvllas lea oadjebas, buorre oahppobiras, dadjá rektor Laila Susanne Vars.

Rektoráhta bealis lea áigumuš áŋgirit ovddidit oahpahuskvalitehta boahttevaš jagiid ja maiddái eanet gozihit studeanttaid oahppobirasáššiid.

- Mis lea dál sajis ovttasbargu Romssa Universitehta Studeantaáittardeaddjin, lea buorre gulahallan Studeantastivrrain, ja studeanttat galget maid beaktilit beassat váikkuhit Sámi allaskuvlla ođđa strategiijai. Ylva lea guhka bargan allaskuvllas ja son dovdá hástalusaid bures. Go prorektor dál oažžu erenoamáš ovddasvástádusa oahpahuskvalitehtii, de lea dat okta vuohki nannet min kvalitehtavuogádaga maiddái jođiheaddjidásis, dadjá rektor.

Prorektor Ylva Jannok Nuttis lea fágalaš jođiheaddjiovddasvástádus buot Sámi allaskuvlla oahpahusaide ja erenoamážiid oahpahuskvalitehtii. Sus lea maid erenoamáš ovddasvástádus studeantarekrutteren doaimmaide, oahpuid evalueremiidda ja ođasmahttimii ja studeanttaid oahppobirasáššiide.

Prorektora fápmudus dávista UA-lága njuolggadusaid, Sámi allaskuvlla stivrra mearrádusaid ja eará gustovaš njuolggadusaid. 

Áššit main lea erenoamaš dehálaš strategalaš váikkuhus, galget ain mearriduvvot stivrras dahje rektora dásis.