Ođđasat
- Oahppu ii deatte - ođđa podkasta
- Muitosánit ávvuoahpheaddji Edel Hætta Eriksen eretvádjoleami oktavuođas
- Studeanttaviesu almmolaš rahpan
- Sámi allaskuvlla almmolaš rahpandoalut
- Etnešguovttos: Konsearta kantiinnas 16.08.23
- Ođđa rektorin oahpásmuvvat
- Ollu oahput ja alla ohcciidlogut Sámi allaskuvllas
- Ođđa vejolašvuohta ohcat čavčča oahpuide
- Sámi allaskuvlla ođđa stivra
![](https://samas.no/sites/default/files/styles/hovedbilde/public/field/image/journalistihkka_redigert.jpeg?itok=XXpPZCCM)
Sápmi dárbbaša journalisttaid
Áiggošit go čalmmustahttet boasttuvuođaid servvodagas dahje gávdnat čovdosiid? Vuoi áiggošit go ipmirdit movt sosiála mediat doibmet, dahje áiggošit go filbmabuktagiin, dokumentárain dahje ealligovaiguin bargat? De oahpat dan bachelor journalistta oahpus Sámi allaskuvllas.
Journalistihkka ođđa áiggis
Sámi allaskuvlla journalistta oahppu lea oalát rievdan. Liv Inger Somby lea hábmen ja ođasmahtten bacheloroahpu. Somby lohká ahte journalistihka oahppu lea rievdan nu ahte heive dálá mediasuorggi dillái.
- Vuosttažettiin de lea journalistihka váldooassin, muhto mii maid fállat sihke filbmaoahpu ja mo sosiálamediat doibmet, muitala Somby.
Liv Inger Somby maid oaivvilda go oahpu háhká, de máhttá maid buorebut árvvoštallat mo servodat doaibmá.
- Oahppu ii deatte, nu lea sápmelaš álo oaivvildan – leaš dál árbevirolaš- dahje bálkábarggus, lohká oahppokoordináhtor Liv Inger Somby.
Njuolga journalistta oahpus prošeaktajođiheaddjin
Nu lei Malene Larsen Gaino geaidnu mannjel go gearggai journalistta bachelorain Sámi allaskuvllas.
- Mun álgen NRK Sápmái prošeaktajođiheaddjin go gárvejin oahpu, muitala Malene.
Malene Larsen Gaino válddii joatkkaskuvlaoahpu Lofuohtas, ja sus lei jurdda ahte šaddá lossat álgit allaskuvlii gos lohkanmearri ja oahpahus lea sámegillii. Muhto dát ii baldán su vuolgit Guovdageidnui ja Sámi allaskuvlii studeret.
- Dat lei lossat, muhto dasa hárjánii, mieđiha Malene.
Son ávžžuha nuoraid váldit journalistta oahppu danne go beassá kreatiivvalaččat bargat ja jurddašit, seammás beasat deaivat olu iešguđetlágán olbmuid ja mátkkoštit.
-Dat lea hui “friddja” bargu. Journalistabarggus beasat "stoahkat" go barggat govaiguin, filmmaiguin ja jienain, lohká Malene.
Jearralin vel Malenes maid son muitá buoremusat journalistta oahpus?
- Mis lei oba somá go Nilut Cupa sáddiimet njuolgga. Muđuige lei mis hui buorre ja somás joavku gos álot lei juoga somá mii dáhpáhuvai, loahpaha Malene Larsen Gaino.
Jus leat golmma jagi joatkkaskuvlla čađahan (oppalaš lohkangelbbolašvuohta) dehe lea sámegielladuogáš ja vihtta jagi bargohárjáneapmi mii lea addán dutnje ávkalaš reálagelbbolašvuođa, de ávžžuhit du ohcat dán bachelorohppui. Dát oahppu bistá golbma jagi ollesáiggis (180 oahppočuoggá). Bachelorgráda maiddái rahpá dutnje vejolašvuođa čiekŋudit álgoálbmotjournalistihkkii (mastergráda). Jus it hálit leahkit ollesáiggestudeantan, de lea vejolaš lohkat muhtin ovttaskas fága. Omd. Sosiála media.