Sámiid dilálašvuođat 2. máilmmi soađi áiggi

Seminára sámiid dilálašvuođaid hárrái 2. máilmmi soađis 1940-1945 
Sámi allaskuvllas, 3.6.2016, Njargadat-lanjas dii.10:00-17:00

Sámi allaskuvlla dutkit leat ohcame vejolašvuođaid álggahit prošeavtta sámiid dilálašvuođaid hárrái 2. máilmmi soađis 1940-1945. Dat lea sáhka diehtoháhkama ja juohkima birra mot sámiid dilli lei soahteveagaid ektui, makkár strategiijat ja birgen sámiin lei riikkaid vašálaččaid dáfus. Bearjadaga 3. beaivvi boahtte mánus dollo Sámi allaskuvllas rabas seminára sámiid dilálašvuođaid birra máilmmisoađi áiggi.

Semináras leat dakkár temát ja logaldallit:

• Váldologaldalli lea Arvid Pettersen, dovddus guovlluhistorjá čeahppi Porsáŋggus. Su sáhkavuorru lea sámiid 2. birra máilmmi soađis ja sin dilálašvuohta riikkaid vašálačča ektui.
• Nubbe váldologaldalli lea Romssa universitehta professor Jens-Ivar Nergård. Son muitala vásáhusaid birra jođiheamis Árrana prošeavtta rádjeoahpisteddjiid birra julevsámi guovlluin 2. máilmmi soađi áiggi. Dát dieđut leat earenoamáš relevánttat go guorahallat vejolašvuođaid cegget sierra prošeavtta sámiid dilálašvuođa máilmmi sođi áiggi. 
• Arne Johansen Ijäs ja Johan Klemet Kalstad muitaleaba iežaska bargguid birra. Arnes leat dieđut Gáivuonas ja Johan Lemehis fas Guovdageainnus.
• Harald Mjøen doaimmahii diehtoháhkama duiskalaččaid birra earenoamážit Altas-Guovdageainnus. Sus ledje oktavuođat Guovdageainnus – Gárasavvonis. Su bárdni Svein Mjøen muitala áhcis doaimmaid birra.
• Odd Mathis Hætta muittaša go Lemaha Johan, Máhtte ja Issát ledje beassán heakkas luođaid čađa Biljasveajis ja olleje Siebii. 
   

Mii bovdet earáid ge muittašit fearaniid, bárttiid ja dáhpáhusaid soađi áiggis.

Loahpageahčen mii guorahallat mot leat eavttut ja vejolašvuođa cegget prošeavtta earenomážit diehtoháhkama ja juohkima sámiid dilálašvuođa birra 2. máilmmi soađis.

Seminárii bovdet buohkaid, ja dat álgá diibmo 10. Buot lea nuvtta.

Sihke sáme- ja dárogiella geavahuvvo semináras. Muhto mis ii leat vejolaš dulkot.