Sámi allaskuvla rahpagoahtá fas Diehtosiidda
Miessemánu 13.beaivvi rájes lea fas vejolaš sihke bargiide ja studeanttaide geain leat earenoamáš dárbbut beassat Diehtosiidii.
Dássedit rahpat Diehtosiidda
Sámi allaskuvla lea báikkálaččat árvvoštallan movt rahpat fas oahppo- ja bargosaji, ja lea bidjan vuođđun ráđđehusa mearrádusaid mat dahkkoje miessemánu 7.b..
- Mihttu lea ahte dássedit galgat rahpat Diehtosiidda ja ahte oahppojagi álggaheapmi čađahuvvo Diehtosiiddas borgemánus, Sámi allaskuvla direktevra Johan Ailo Kalstad muitala.
Ráddjejuvvon lohku gallis besset oahppobáikái
Dán vuoru lea Sámi allaskuvla árvvoštallan dárbbuid mat leat ovddiduvvon, ja mearridan rahpat oahppobáikki maiddái eará studeanttaide go duodjestudeanttaide. Studeanttat geat dárbbašit bargat allaskuvllas vai eai maŋŋon iežaset oahpuin vuoruhuvvojit.
- Mii rahpat dál álggos Diehtosiidda 34 studentii geain lea dárbu dohko beassat iežaset oahppoprogrešuvnna dihte, Kalstad čilge.
Studeanttat geat gullet riskajoavkkuide, ávžžuhuvvojit ain ruovttus bargat ja čuovvut digitála oahpahusa.
Bargiide fas vejolaš mahccat kantuvrii
Bargit besset maid bargagoahtit Diehtosiiddas gaskavahku rájes.
- Dál lea vejolaš Diehtosiidda kantuvrras bargat fas nu ahte ii dárbbaš sierra lobi dasa, vaikko ruovttukantuvra ain lea ávžžuhuvvon čoavddus, dadjá Kalstad.
Kalstad ávžžuha muđui buohkaid čuovvut njoammuneastadeami doaibmabijuid mat leat fámus Diehtosiiddas.
- Buohkat berrejit doahttalit doaibmabijuid mat leat ásahuvvon dán dilis. Eambbo dieđut biddjojit ruovttosiidui. Loga fal daid dárkilit, direktevra ávžžuha.
Girjerádjosis sáhttá viežžat girjjiid
Girjerádjosii ii vuos beasa sisa, muhto sáhttá girjjiid diŋgot e-poastta bokte ja daid viežžat uksagaskkas (maiddái dalle go čohkká Diehtosiiddas). Jus ii sáhte viežžat, de girjjit sáddejuvvojit poastta mielde.
Čuovvovaš studeanttajoavkkut besset Diehtosiidii dán vuoru:
- Sámegiela ja sámi girjjálašvuođa bachelora ja master studeanttaide geat leat gárveme oahpu 2020 giđa
- Journalistihka master- ja bachelorstudeanttat
- Sámi mánáidgárdeoahpaheaddjeoahppu bargosajis studeanttaide geat leat gárveme bachelorbarggu 2020 giđa
- Sámi vuođđoskuvlaoahpaheaddjeoahppu 1.-7. ceahki ja 5.-10. ceahki masterstudeanttat geat leat gárveme masterdutkosa 2020 giđa
- Sámegiela- ja sámi girjjálašvuođa masterstudeanttaide geat leat gárveme oahpu 2020 čavčča.
Duoji bachelorstudeantat leat ovdalaš mearrádusa bokte ožžon sisabeassáma Diehtosiidii.
Studeanttat ožžot sierra dieđu go sidjiide lea rahpon sisabeassan.
Fuomáš ahte jus leat studeanttat geat gullet namuhuvvon joavkkuide geat eai váldde vuosttá sisabeassáma, de sáhttet studeanttat geain leat earenoamáš dárbbut oažžut sin saji. Váldde oktavuođa oahppohálddahusain (oahppohalddahus@samiskhs.no) jus oaivvildat ahte dus leat earenoamáš dárbbut beassat Diehtosiidii vai galggat doalahit iežat oahppoprogrešuvnna.
