Govas: Sámi allaskuvlla bealis: Nils Johan Heatta, Ylva Jannok Nutti, direktevra Johan Ailo Kalstad, Biret Ánne Bals Baal, rektor Laila Susanne Vars, Sámediggeráđi láhttu Mikkel Eskil Mikkelsen, Sámedikki hálddáhusa bealis: Ol-Juhán Sikku, Anna Kristine S. Hætta ja Katri Somby.
Govven: Inger Anne Siri Triumf, Sámi allaskuvla

čakčamánu 18. beaivi 2019

Sámi allaskuvla ja Sámediggi áigot nannet gulahallama ja ovttasbarggu

Sámi allaskuvlla rektoris Laila Susanne Vars lei 16.9.2019 čoahkkin Norgga bealde Sámediggeráđđeláhtuin Mikkel Eskil Mikkelsenin Diehtosiiddas Guovdageainnus.

Norgga bealde Sámediggeráđđi lei bivdán čoahkkima allaskuvlla ođđa rektorin oahpásnuvvan dihte suinna ja ođđa rektoráhta áigumušaiguin boahtte rektoráigodahkii. Čoahkkimis lei earet eará sáhka áigeguovdilis áššiid birra dego Sámi allaskuvlla ja Sámedikki SáMOS ovttasbargošiehtadusa birra, sámi buohccidivššároahpu birra ja muđui daid eará oahppofálaldagaid birra maid allaskuvla fállá. Muđui lei maid sáhka dan birra mot nannet ovttasbarggu Ovttas.no, Sámi lohkánguovddáža ja Sámi oahpponeavvoguovddáža gaskkas vai oahpponeavvoportála Ovttas.no doaibma šattašii vel beaktileabbo miehtá sámi.

Loahpas vel lei ságastallan dan birra mot doalahit buori gulahallama gaskkal Sámedikki ja Sámi allaskuvlla jođiheaddjidásis, ja sohppojuvvui ahte jahkásaš gulahallančoahkkin gaskkal rektora ja Sámediggeráđi lea buorre vuohki juohkit dieđuid ásahusaid gaskka. Muđui leat ásahusaid gaskkas čoahkkimat iešguđet ovttasbargoprošeavttaid olis ja dárbbu mielde.