čakčamánu 20. beaivi 2022

Ođđa dutkan buktá oidnosii monne- ja luomečoaggiid máhtuid

Odne almmuhuvvoje ođđa dutkanbohtosat Landscape Practices konferánssas, Sámi allaskuvllas. Dutkan čájeha čielgasit ahte monne- ja luomečoaggin lea eanet go dušše ieš dat čoaggin. 

Dutkanbohtosat čájehit ahte monne- ja luomečoaggiin leat mávssolaš máhtut mo hálddašit iežaset guovlluid. Sis lea fuolla iežaset guovlluide, ja dat bohtet oidnosii sin njuolggadusain dasa mo lihkadit ja láhttet guovlluin. Daid sii leat háhkan guhkesáigge geavaheami bokte. Eana, dálki, luopmánat, lottit ja monit doibmet ovttas ja dán sáhttá gohčodit árbevirolaš máhttun, go dat lea sihke sirdašuvvan buolvvaid gaskka ja olbmo leat háhkan dan iežaset čoagginpráksisa bokte iežaset guovlluin.

Dán rádjái lea dáhkkon unnán dutkan monne- ja luomečoaggin práksisiid birra. Golmma beaivásaš konferánsii leat bovdejuvvon earret eará dutkit mat leat sullasaš dutkamiid dahkan eará guovlluin. Dutkanjoavku álggahii prošeavtta jagi 2019:s ja lea dutkan práksisiid mat leat čadnon luome- ja monnečoaggimii Sámi mearraguovlluin nugo Porsáŋggus, Várjjagis ja Divttasvuonas. Sámi allaskuvlla vuosttašamanueansa Solveig Joks lea jođihan dutkanprošeavtta ovttas ovttasbargoguimmiiguin, nugo Steinar Nilsen Ájluovttas, Svanhild Andersen Mearrasiiddas Billávuonas, Harrieth Aira Árran Julevsámeguvdásji ja Stine Rybråten NINA Lillehammeris.

Geahča govaid konferánssas

Landscape Practices Conference 2022