Násteolmmái

Starman – Sophus Tromholt Photographs 1882-1883

Jagi 1882 vulggii iešoahppan astrofysihkar Sophus Tromholt (1851-1896) Bergenis Guovdageidnui dutkan ja govven dihte guovssahasa. Jagi 2013 dohkkehii UNESCO Sophus Tromholta govvačoakkáldaga oassin máilmmi kulturárbái (UNESCOs Memory of the World registerii), ja dál leage aitto almmuhuvvon girji “Starman” Tromholta ja su govaid birra.

Girječálli Marthe Tolnes Fjellestad boahtá Guovdageidnui duorastaga 29.11. muitalit girjji ja Tromholta govaid birra. Girji lea eŋgelas gillii ja das lea vuđolaš čoahkkáigeassu davvisámegillii. Press Lágádus lea deaddilan girjji.

Sophus Tromholtas lei stuora beroštupmi guovssahassii, ja vaikko geahččalattai, de fertii vuollánit šaddamis vuosttamužžan gii nákce govvet guovssahasa. Dan saddjái son ráhkadii fotográfalaš portfolio mii sisttisdoallá luonddu, árbevirolaš eallinvugiid ja birgenlágiid sámi kultuvrras, ja portreahtaid sullii 50 namuhuvvon olbmuin Guovdageainnu guovlluin. Viimmat leat dál, sullii 140 jagi maŋŋil, čohkkejuvvon dát govat ovtta girjái.

Sámi allaskuvlla girjerájus bovde boahtit oahpásnuvvat Násteolbmáin ja su govaide girječálli bokte.

Gos: Sáhkaskáiddis

Goas: Duorastaga 29.11.18 dii.: 12:00 – 13:00

Guossoheapmi

Bures boahtin!