Ođđasat
- Fágakommišuvdna Sámi allaskuvllas
- Studeanttat Yakutias
- Allaskuvlla dutkit ja studeanttat Hawaiijas
- Sámi allaskuvla buorimusas
- Majoritehtagiella dominere sámi skuvlla gielladuovdagiid
- Čuojat juoigga! Riddu Riđus Ijahis Idjii
- Sjatta oahpestiddjen!
- Aelkesth ööhpehtæjjine!
- Háliidat go oahppat eambbo duodjedoahpagiid?
![Einar Bergman Im Memoriam Portrett av Einar Bergland](https://samas.no/sites/default/files/styles/hovedbilde/public/field/image/einar.jpg?itok=MmzsKK4q)
Muitosátni Einar Berglandii
Einar Bergland 1934 - 2015
Einar Bergland lei mielde Sámi allaskuvlla álggaheaddjin. Go Sámi allaskuvla ásahuvvui 1989:is, lei son guovddážis hábmemin oahpaheaddjeoahpu min luhtte. Son lei dalle juo bargan muhtin jagi sámi oahpaheaddjeoahpuin Álaheajus.
Einar lei fágalaččat ja teorehtalaččat nanu skuvlejuvvon pedagoga, sus lei guhkes hárjáneapmi oahpaheaddjin máŋgga osiin skuvlaásahusain, ja lei čeahpes gaskkusteaddji. Su čehppodat lei ávkin Sámi allaskuvlla bargui go pedagogihkka galggai ovdánahttot ja gaskkustuvvot sámi servodahkii. Mii háliidit muittašit su dan stuora ja ođasmahttinbarggu ovddas maid son barggai dán suorggis.
Einar lea leamaš oahpaheaddjin pedagogihkas ollugiidda geat odne leat oahpaheaddjin sámi servodagas. Mii diehtit ahte su muitet iluin, ja ahte son gaskkustii sihke teorehtalaš dieđuid oppa máilmmis ja dieđuid Einara iežas vásihusain sámi giliin olggobeale Sis-Finnmárkku. Studeanttat liikoje Einarii ja Einar liikui studeanttaide.
Mii muittašit maid su buori ja hávskkálaš mielbargin gii dávjá ságastalai áigeguovdilis áššiid birra ja gii maid áinnas logai ja buvttii cealkámušaid čállosiidda maid mii leimmet čállán. Son maid lei mielbargi gii lei hui humoristtalaš ja gii sihke movttiidahtii ja boagustahtii min earáid. Su humoristtalaš attáldagaid geažil lei son earenoamáš čeahpes ságastalli. Dát attáldagat ledje ávkin allaskuvlii ásahussan, ja lassin illodahtii maiddái bargoskihpáriid máŋgga oktavuođain olggobeale bargoáiggi.
Einar lei duođas berošteaddjin hábmet buori sámi alit oahpahusa. Dákko dáfus dagai son váldorahčamušaidis 1980-jahkelogu gaskkamuttus gitta ealáhatagi rádjái. Einar lei ieš sápmelaš, ja son deattuhii ge ovdanbuktit vásáhusaid, dieđuid ja árvvuid maid son lei oahppan iežas álbmogis.
Mii leat giitevaččat sihke dan ovddas gii son lei ja maid son čađahii.