Ođđasat
- Oahput mat álget čakčat - muitte ohcat
- Koronadávda: Sámi allaskuvlla bagadusat
- Studeantaáittardeaddji Sámi allaskuvllas 9.-10.03
- Sáme-symposia bovdejuvvon logaldallit
- Sámi allaskuvlla prorektor oažžu ovddasvástádusa oahppokvalitehtii
- Matematihkkaoahpahus álgoálbmogiid gaskkas
- Vuolgge north2north lonohallamii oahppojagi 2020-2021!
- Sámi allaskuvlla studeanttaid filmmaid čájehit Skábmagovain ja Helssegis
- Matematihkka ovdakursa neahta bokte
![](https://samas.no/sites/default/files/styles/hovedbilde/public/field/image/juniper_house_0.jpg?itok=CWUdC9S8)
Mátkemuitalus sámi vuođđoskuvlaoahpaheaddjeoahpu Kanáda mátkki birra
Sámi allaskuvlla vuođđoskuvlaoahpaheaddjeoahpu studeanttat ovttas oahpahedjiiguin ja bargiiguin leat geassemánus 2022 mátkkoštan Kanádai galledit Memorial University of Newfoundland –universitehta oassin Verdde-fierpmádaga doaimmaid. Verdde-fierpmádat lea davviguovllu alitoahpu oahppoásahusaid fierpmádat, masa gullet vihtta davviguovllu alitoahpu ásahusa. Fierpmádaga bokte lea sihke studeanttaide ja bargiide vejolaš vuolgit lonohallamii. Ovdal mátkki Sámi allaskuvlla oahpaheaddjeoahput leat searvan Verdde Thematic Network 2021 project for virtual exchange activities -prošektii, mii ráhkkanahttii joavkku mátkái.
Kanáda-mátki sirdojuvvui riikkaid COVID 19 –njuolggadusaid geažil ovddit jagis nu ahte beasaimet mátkkoštit Kanádai mannan jagi geassemánus. Mátkkis beasaimet oahpásnuvvat Memorial University doaimmaide ja campusii ja oahpat universitehta oahpaheaddjeoahpuid ja álgoálbmotdoaimmaid birra. Beasaimet fitnat Juniper Houses, mas doaibmá álgoálbmotstudeanttaid resurssaguovddáš. Lassin oahpásnuvaimet St. John’sa gávpogii mas Memorial University váldocampus doaibmá. St. John’sas oruimet Macpherson College geasseorrunsajis universitehta campusguovllus. Beasaimet oahpásnuvvat Memorial University oahpaheaddjeoahpu studeanttaide ja bargiide ja gullat logadallamiid sihke universitehta oahpahedjiin ja eará áššedovdiin.
Mátkošteimmet badjel jándora goappáge guvlui ja beasaimet fitnat St. John’sa gávpoga lassin Toronto ja Montreala gávpogiin. Mátkkis vásiheimmet mo earenoamáš somás joavku mis lea oahpaheaddjeoahpus ja mii boahtit álo muitit dán somás mátkki ja vejolašvuođaid maid dat buvttii midjiide sihke joavkun, oahpaheaddjestudeantan ja olmmožin. Dovddaimet iežamet hui bures boahtán ja vuostáiváldon Memorial University bealis ja sávvat ahte sii maid besset min galledit muhtin beaivve. Dán mátkkis leat báhcán olu somás fearánat, vaikko buot dáhpáhusat eai lean suohttasatge. Muhtin girdi šluhttejuvvui, ovtta girdis mii maŋŋoneimmet girdišilljumoivvi dihte ja goaffarat eai máŋgii čuvvon min muhto mearrideimmet ahte eat beroš das nu beare olu, muhto baicce návddašit earenoamáš vásáhusain maid beasaimet oažžut dán mátkkis.
![](https://samas.no/sites/default/files/styles/hovedbilde/public/signal_hill.jpg?itok=OhAozzQX)
Dán govas leat oahpaheaddjeoahpu studeanttat Janita Känsälä, Ellen Inga Sara ja Inga Merete Pulk St. John’sas Signal Hill alde ábi gáttis man nuppi bealde lea Eurohpa nannán. Signal Hill lea beakkán turistačuozáhat mii lea ožžon namas das ahte vuosttas sreaŋggahis signála mii rasttildii Atlántta ábi lea vuostáiváldon vuollelis dán mielis.
Teaksta: Janita Känsälä, 3. jagi vuođđoskuvlaoahpaheaddjeoahpu oahpaheaddjestudeanta, geassebargi oahppohálddahusas 2022
Govat: Sámi allaskuvlla vuođđoskuvlaoahpaheaddjeoahput
Janita Känsälä, Ellen Inga Sara ja Inga Merete Pulk