Abstrákta dieđiheapmi

Jus háliidat ovdanbuktit du oahpahus- dahje dutkanbarggu, dieđihat dasa ja sáddet teavstta dahje abstrávtta sisa.

Konferánssa lávdegoddi árvvoštallá buot dieđihemiid, ja gávdná daidda heivvolaš saji konferánssa prográmmas. Logi sámi mánáidgárde- ja skuvlaoahpaheaddji, geat dollet ovdanbuktima, eai dárbbaš máksit konferánsadivada. Lávdegoddi árvvoštallá ja addá dieđu ovdal go dieđihanáigemearri giddejuvvo.

Deavdde skovi ja dieđit ovdanbuktima

Fuom! Vuollelis lea čilgejuvvon makkár ovdanbuktinvugiide sáhtát dieđihit. 

Áigemearri buktit/sáddet abstrávtta: 23.10.2023

Dás lea skovvi: https://nettskjema.no/a/356179

Ovdanbuktinvuogit

Konferánssas lágiduvvojit bálddalás sešuvnnat, ja čuovvovaš ovdanbuktinvugiid sáhtát válljet ovdanbuktit du oahpahus- ja dutkanbarggu:

Mánáidgárddi ja skuvlla gáfebeavdesagastallan (jorbbábeavddi sagastallan) – sádde sisa 2-5 dajaldagain mas mánáidgárddi ja skuvlla oahpahusášši čilgejuvvo. Konfereanssas dollo 5 min. áššeovdanbuktin, ja juohke gáfebeavdesagastallamis njeallje ášši ovdanbuktojuvvojit ovdal oktasaš ságastallama. Gáfebeavdesagastallama jođiheaddji jođiha ságastallama. Konferánssa lávdegoddi áinnas sávvá oahpahusa ságastallamiid mas sihke buori oahpahuspráksisa ja maiddái hástalusat oahpahusas leat ságastallanfáddán.

Bargobádji / Bargobáji ovdanbuktin: Sádde sisa teavstta mas bargobáji/ovdanbuktima fáddá ja ovdanbuktinvuohki čilgejuvvo. Konfereanssas dollo bargobádji dahje bargobáji ovdanbuktin. Sáhttá evttohit ieš organiserejuvvon bargobáji (45 -90 min.) gos joavkku muitala sin doaimmain/dutkamušain dahje oktagaslaš ovdanbuktin (20 min.) ovtta bargobájis. Konferánssa lávdegoddi áinnas sávvá ovdanbuktimiid mas oassálastit sáhttet searvat praktihkalaš, kreatiivvalaš ja estehtalaš bargguide, ja ságastallamiidda. Ovdanbuktimii sáhttá geavahit digitála veahkkeneavvuid, oahppomateriálaid, estehtalaš dahje árbevirolaš neavvuid dahje materiálaid.

Muitalus ja lávostallanbottoš  - sádde sisa 2-5 dajaldagain mas muitalus & lávostallanbottoža fáddá ja ovdanbuktinvuohki čilgejuvvo. Konfereanssas dollo 30 min. muitalus & lávostallanbottoš. Konferánssa lávdegoddi áinnas sávvá ahte árbevirolaš muitalusat leat muitaluvvon ja ságastallojuvvon.

Poster- ja filbmačájáhus - sádde sisa čilgehusa, mas fáddá, rámmát, designa ja bohtosat leat čilgejuvvon. Konfereanssas čájehit postera dahje filmma čájáhusas  ja dollo 10 min. ovdanbuktin mas jearaldagat ja ságastallamat leat oassin. Konferánssa lávdegoddi áinnas sávvá poster- ja filbmaovdanbuktimiid mat vástidit konferánssa ulbmilii ja fáttáide.

Dieđalaš oanehissáhkavuorru dahje báhpira ovdanbuktin –  sádde sisa abstrávtta ja konfereanssas dollo 20 min. báhpira ovdanbuktin, mas 5 min. sáhttá geavahuvvot jearaldagaide ja ságastallamii. Abstrákta dieđalaš oanehissáhkavuoruide galgá sisttisdoallat dutkangažaldaga/ulbmila, teorehtalaš vuođu, dutkanmetoda, ja (vurdojuvvon) bohtosa. Guhkodat galgá leat 200 sáni. Njeallje báhpira ovdanbuktojuvvojit juohke sešuvnnas. Konferánssa lávdegoddi áinnas sávvá dutkan- ja ovdánahttinprošeavttaid ovdanbuktimiid. Bábir sáhttá ovdanbuktit gárvves dutkanbohtosa, dutkama mii lea jođus dahje dutkanjurdagiid.