Bovdejuvvon logaldallit Sámegiela ja girjjálašvuođa symposiai leat Jane Jusso (gurut ravddas), Vuokko Hirvonen (gasku) ja Ole Henrik Magga (olgeš ravddas).
Diehtosiidda govva: Govven Mai-Lis Eira
Jane Juuso govva: Priváhta govva
Vuokko Hirvonen govva: Govven Mattias Sikku Valio
Ole Henrik Magga govva: Govven Sara Marja Magga

borgemánu 26. beaivi 2021

Dál lea vejolaš dieđihit Sámegiela ja girjjálašvuođa symposiai

Čakčamánu 22. b. ja 23. b. lágiduvvo Sámegiela ja sámi girjjálašvuođa symposia Sámi allaskuvllas Guovdageainnus. Bovdejuvvon logaldallit symposiai leat Jane Juuso, Vuokko Hirvonen ja Ole Henrik Magga.

Sámi allaskuvla, Oulu universitehta Giellagas-instituhtta, Ubmi universitehta ja UiT Norgga árktalaš universitehta lágidit Sámegiela ja sámi girjjálašvuođa dutkan- ja bagadallansymposia Sámi allaskuvllas Guovdageainnus 22.-23.9.2021. Oktasaš sámesymposiat leat lágiduvvon jagi 1993 rájes, ja daid ulbmilin leamaš álggu rájes čohkket sámegiela ja sámi girjjálašvuođa dutkiid ja doavttirgráda- ja masterstudeanttaid iešguđege guovlluin.

Bovdejuvvon logaldallit

Jane Juuso lea Isak Saba guovddáža jođiheaddji ja son lea “ovddidan sámegiela oahpahanvuogi, mii vuođđuduvvá kognitiiva teoriijai. Dáinna vugiin sáhttit gieđahallat, burgit ja juoba luovosnuvvat dakkár jurdagiin ja dovdduin, mat estet sámegiela geavaheami” (Ulla Aikio-Puoskari 2016: Gullos sámegiella. Sámediggi/ Sámegiela doaimmahat. s.15)

Vuokko Hirvonen lea sámi girjjálašvuođa emeritaprofessor. Girjjálašvuođa lassin Hirvonen lea beroštuvvan dutkanetihkas ja skuvladutkamis. Hirvonen lea nammaduvvon Ubmi universitehta gudnedoavttirin 2019 ja Oulu universitehta jagi alumnan 2020.

Emeritusprofessor Ole Henrik Magga lea bargan guhkká sámi- ja eamiálbmotpolitihkain ja son lea leamašan professor Oslo ja Romssa universitehtain ja Sámi allaskuvllas. Ole Henrik lei vuosttaš sápmelaš, guhte lea čállán doavttirgráda iežas eatnigielain

Prográmma gávnnat dáppe. 

Dieđiheapmi

Jus háliidat searvat Sámegiela ja girjjálašvuođa symposiai, de sáddet e-boastta sagi2021@samas.no. Dieđihanáigemearri lea bearjadaga 03.09.2021

Muital dieđiheamis áiggutgo searvat symposiai báiki alde Diehtosiiddas vai gáiddusoktavuođa bokte. Jus searvvat symposiai báiki alde, muital maid vejolaš biebmoallergiijaid birra. 

Fuom! Galgá dieđihit jus áigo oažžut liŋkka. 

Lágidanjoavkku ruovttusiiddu.