Duoji ja hábmema bachelorprográmma

Bachelorprográmmas lea vuolggasadji duddjon-, ja hábmenvugiin, estehtalaš vásáhusain ja teorehtalaš reflekšuvnnain. Bachelorprográmma deattuha duodjefágalaš čuolmmaid ja čovdosiid mat dorjot bistevašvuođa. Studeanttat sáhttet eanaš oahpuin iežaset beroštumi mielde válljet dipma- dahje garraduoji suorggi. Oahppu addá vuođđodieđuid sámi ja eará álgoálbmogiid duodje- ja dáiddadieđus.

Oahpahus- ja eksámengiella: Váldo oahpahusgiella lea davvisámegiella. DUO-1013 Knowledge of Indigenous Cultural Expressions and Arts oahppu lágiduvvo dábálaččat eaŋgalasgillii, ja čálalaš bargguid dán oahpus sáhttá buktit eaŋgalasgillii dahje sámegillii. Jus oassi logaldallamiin lea eará sámegielaide, dáro- dahje ruoŧagillii, de dat dulkojuvvo dárbbu mielde. Logaldallamat eaŋgalasgillii eai dulkojuvvo. Eará sámegielat studeanttaide geahččalit láhčit dili nu ahte sii sáhttet čállit bargguid ja oažžut oasi bagadallamis iežaset sámegillii.

Oahpahusbáiki: Sámi allaskuvllas ja neahta bokte

Diibmoplána ja deaivvadanplána

Sisabeassangáibádusat

• Dábálaš sisabeassangáibádusat alitohppui. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla, logahaga dahje gymnása) dahje reálagelbbolašvuohta. 
• Sámegielmáhttu 

• Duodje-, dáidda- dahje hábmengelbbolašvuohta 

  Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. 

  Duodje-, dáidda- dahje hábmengelbbolašvuođa gáibádusa sáhttá duođaštit čuovvovaš vugiid mielde: Norgga joatkkaskuvllas čađahan duodje-, dáidda- dahje hábmenoahpu, Suomas duodje-, dáidda- dahje hábmensuorggi artesánaoahpu, Ruoŧa gymnásas čađahan estehtalaš- dahje sámeprográmma. Duodje-, dáidda- dahje hábmengelbbolašvuođa sáhttá maiddái deavdit jus lea maŋŋel joatkkaskuvlla čađahan unnimusat jagi duodje-, dáidda- dahje hábmensuorggi oahpu ámmátskuvllas dahje fágaskuvllas, dahje universitehta- ja allaskuvladásis čađahan unnimusat 15 oahppočuoggá duodje-, dáidda- dahje hábmensuorggi oahpu. 

  Jus ohccis ii leat formála gelbbolašvuohta fágasuorggis, de sáhttá ohcci maiddái duođaštit duodje-, dáidda- dahje hábmenfágalaš gelbbolašvuođa iežas bargguid bokte. Dasto galgá juogo sáddet sisa ja oažžut dohkkehuvvot: 

  • Govaid unnimusat viđa duojis, dahje 

  • 2-3 duodje-, hábmen dahje dáiddalaš prošeavttain, mat čujuhit kreatiivvalaš proseassaide, ovdamearkka dihtii portfolio 

    Dárbbu mielde ovddiduvvo gelbbolašvuođa meroštallan fágalaš árvvoštallamii ja meannuduvvo dán vuođul. Sáhttá nai čađahuvvot ságastallan duodjegelbbolašvuođa árvvoštallama doarjjan.

Oahpu oppalaš sisdoallu

Bachelorprográmmas lea vuolggasadji duddjon-, ja hábmenvugiin, estehtalaš vásáhusain ja teorehtalaš reflekšuvnnain. Bachelorprográmma deattuha duodjefágalaš čuolmmaid ja čovdosiid mat dorjot bistevašvuođa. Studeanttat sáhttet eanaš oahpuin iežaset beroštumi mielde válljet dipma- dahje garraduoji suorggi. Oahppu addá vuođđodieđuid sámi ja eará álgoálbmogiid duodje- ja dáiddadieđus. Oahppu deattuha duodje- ja hábmenproseassaid main studeantta dovddiida duodjái, ja mas beassá ovdánahttit iežas duodjebuktaga ja ámmátlaš hálddašeami. Duddjon, reflekšuvdna, vásáhusat, duodje- ja dáiddalaš čehppodat ja buktagat deattuhuvvojit, ja teorehtalaš ákkastallamat ja jurddašeamit galget doarjut duddjon- ja hábmen bargguid. Oahppu addá studeanttaide hárjáneami geavahit sámegiela go galget buktit ovdan iežaset vásáhusaid duddjomis, ja go galget dieđalaččat ákkastallat bargguid.

Prográmma huksehus

1. lohkanbadji	2. lohkanbadji	3. lohkanbadji	4. lohkanbadji	5. lohkanbadji	6. lohkanbadji
OKT 101 Eamiálbmot filosofiija, 10 oč	DUO-1012 Bistevaš design, 20 oč	DUO-1014 Árbevirolaš duoji bajásdoallan ja ealáskahttin, 20 oč	Doarjjafágat dahje olgoriika lonohallan 30 oč	DUO-2003 Duodji ja ovdánahttin, 20 oč ja doarjjafága, 10 oč  dahje DUO-2002 Duodji ja ovdánahttin čiekŋudeapmi, 30 oč	DUO-2011 Duoji ja hábmema bachelorbargu, 20 oč
OKT 102 Dieđalaš čállin ja guorahallan, 10 oč	DUO-1013 Knowledge of Indigenous Cultural Expressions and Arts, 10 oč	DUO-1015 Plánen, hutkáivuohta ja duddjon, 10 oč			Doarjjafága, 10 oč
DUO-1001 Duddjoma ja hábmema bargovuogit, 10 oč

Bargo- ja joatkkaoahppovejolašvuođat

Bachelorgráda addá vuođđogelbbolašvuođa álgit Duoji masterii. Bachelorgráda addá vuođu bargat ásahusain main duodji, dáidda dahje hábmen lea guovddážis, e. e. museain, kulturskuvllain, teáhteriin ja filbmaprodukšuvnnain, dahje jođihit iežas duodje- dahje dáiddafitnodaga. Oahppu addá gelbbolašvuođa ovdanbuktit sámi duodjeealáhussii guoski dieđuid, máhtuid ja bargovugiid obalohkái. Praktihkalaš pedagogalaš oahppu (PPO) lasseoahppun bajida oahpahangelbbolašvuođa duojis dahje hábmemis vuođđoskuvllas, joatkkaskuvllas ja bajit dási oahpahusas.

Prográmmaplána Duoji ja hábmema bachelor 

Áigemearit ja dehálaš dáhtonat

Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no