Váikkuhusat Sámi allaskuvlii go 27 bargis lea bargoheaitta
Guovddáš bálkášiehtadallamat gaskal stáhta ja bargiid fágaservviid oktasašlihttu Unio ii leat lihkostuvvan ja dat lea dagahan boatkaneami šiehtadallamis beliid gaskkas. Sámi allaskuvllas leat geassemánu 3. beaivvi rájes váldon 27 bargi bargoheaitagii ja das leat diehttelasat váikkuhusat allaskuvlla beaivválaš doaimmaide jus bargoheaitta bistá guhká.
Diehtu mii dássážii lea doaimmaid ektui
Studeanttaid ektui:
- Čálalaš ruovttueksámenat čađahuvvojit nu go plánejuvvon.
- Skuvlaeksámen maiddái čađahuvvo nu go plánejuvvon.
- Jus streaika bistá, de čuohcá njálmmálaš eksámeniidda.
- Loahpahandoalut 14.06. čađahuvvojit nu go planejuvvon.
Dieđut ođastuvvojit dađistaga jus bargoheaitta bistá ja studeanttaide geaidda leat váikkuhusat ožžot dieđu Canvasa bokta.
Stivrra ektui:
- Stivraseminára 12.06. čađahuvvo nu go plánejuvvon.
- Stivračoahkkin 13.6. dollojuvvo, muhto leat muhtin áššit maid stivra ii sáhtte meannudit. Dat leat áššit mat galget ráđđádallot bargiid fágaservviiguin ovdal go mannet stivrii.
Barggut maŋŋonit
Muđui leat barggut maid ii sáhte čađahit dál ja mat bargoheaitaga geažil maŋŋonit, omd. studeanttaid sisaváldin, virgádeamit, dutkiid almmuheamit ja prošeavttaid čađaheamit.
Bargit geain lea bargoheaitta čuvvot dieđuid mat bohtet Unio bokte.
Bargit geain ii leat bargoheaitta barget nu go dábálaččat, muhto eai sáhte bargat daid bargguid maid sii geat leat bargoheaitagis livčče galgan bargat.
