Gávttehasat šleŋggohallet olgun
January 20. beaivi 2023

Sámi álbmotbeaivvi oktavuođas lágideamit olles vahkku

Sámi allaskuvllas leat 2023 Sámi álbmotbeaivvi ávvudeami oktavuođas lágideamit mánnodagas bearjadahkii. Eanas lágideamit leat Diehtosiiddas, earret go Mai-Britt Utsi ja Jussi Ylikoski logaldallamat, mat leat digitála hámis.

Populearadieđalaš ovdanbuktimat

- Min prográmmas lea dutkan guovdážis, ja leat ge allaskuvlla fágačeahpit geat dollet oanehis populearadieđalaš logaldallamiid ja Dieđut ráiddus lea ges girjealmmuheapmi seamma fáttás go man birra duodjeprofessor Gunvor Guttorm logaldallá. Vuosttašamanueansa Solveig Joks ovdanbuktá osiid su dutkanbargguin mas lea sáhka mehciid áimmahuššamis, muitala Sámi allaskuvlla direktevra Anne-Marie Gaino.

Lassin fágalaš ovdanbuktimiidda, de lea maid diehtojuohkin gos muitaluvvo makkár vejolašvuođat Sámi allaskuvlla bargiin ja studeanttain leat mannat olgoriikii lonohallamii.

- Dása ávžžuhit maiddái du gii it leat vel bargi dahje studeanta Sámi allaskuvllas, boahtit gullat. Mis leat stipeandaortnegat maid bokte lea vejolaš muhtun áiggi eará árktalaš guovlluin dahje eará eamiálbmot guovlluin fitnat viežžame ja juogadeame vásáhusaid, dadjá direktevra.

Filmmat ja nástealbmi guoimmuhit

Dasto lea maid guoimmuheapmi prográmmas. Allaskuvllas lea ovttasbargu Internationála Sámi Filbmainstituhtain, ja sii čájehit ođđa filmmaid nu go Ellos eatnu ja  Olbmot ja rievvárat Kardemummagávpogis, mii lea sámegillii ja heive buohkaide. Diehtu bileahtaid birra filmmaide almmuhuvvo maŋŋel.

- Kardemummagávpotfilbma čájehuvvo beaivet, de soaitá heivet mánáidgárddiide ja smávvaskuvlii maid finadit filmma geahččame. Leat goit bures boahtin deike, dadjá Anne-Marie Gaino.

Allaskuvla lea maid bovden Ánte Mihkkal Gaupa boahtit Nástegođiin Diehtosiidii. Son oahpista guldaleddjiid nástealbmái fearániiguin, muitalusaiguin ja luđiiguin.

Liŋkka digitála logaldallamiidda boahtá prográmmii ovdal logaldallama. Logaldallamat eai báddejuvvo, nu ahte ii leat vejolaš maŋŋil geahččat.