Govven: Mattias Sikku Valio

August 30. beaivi 2021

Dieđit ovdanbuktin evttohusa Sámi oahpahuskonferánsii

Sámi allaskuvla ja Norgga Sámediggi lágidit gaskariikkalaš Sámi oahpahuskonferánssa 05-07.10.21 Diehtosiiddas, Guovdageainnus. Mii bovdet oahpaheddjiid ja mánáidgárddebargiid sáddet evttohusaid maid sáhttet ovdanbuktit konferánssas. Áigemearri sáddet ovdanbuktin evttohusa lea čakčamánu 5. beaivve.

Konferánssa ulbmilin lea beassat lonohallat eamiálbmogiid oahpahanvásáhusaid ja buktit oidnosii sámi mánáidgárddiid, skuvllaid, ja alitoahpahusa, ja maiddái internationála eamiálbmotoahpahusa, vásáhusaid ja muitalusaid. 

Konferánsa fáttát:

  • Mánáid ja nuoraid árgabeaivi oahpahusas
  • Árgabeaivvegiella
  • Luondu oahppama vuolggasadjin
  • Eamiálbmogiid máhtuid ja gielaid nanosmahttin ja ealáskahttin
  • Eamiálbmogiid bajásgeassima ja oahpahusa dekoloniseren

Ovdanbuktin evttohusa dieđiheapmi

Ovdanbuktin evttohusat sáhttet leat buotlágan fáttáin mat nu láktasit namuhuvvon fáttáid bajábealde dán teavstta. Don sáhtát sáddet evttohusa čuovvovaš ovdanbuktin vugiide:  

  • Oanehis ovdanbuktin smávva joavkkuide. Das bistá ovdanbuktin gaskal 5 minuhtta ja 10 minuhtta.
  • 20 minuhtta logaldallan váldokonferánsalanjas. Logaldallamis lea vel lassin 10 minuhtta áigi jearaldagaide ja ságastallamii, oktiibuot 30 minuhtta.

Sádde evttohusa Ylva Jannok Nutti e-boasta čujuhussii ylvajn@samas.no. Bija nama fáddái ja golbma dahje njeallje cealkaga man birra áiggut ovdanbuktit.

Konferánsagielat

Konferánsagielat leat sámegiella, eŋgelasgiella ja davviriikalašgielat. Mii sávvat ahte sámegielat logaldallit geavahit sámegiela. Logaldallamat váldokonferánsalanjas dulkojuvvojit.  

Dáppe gávnnat prográmma